الجزء 12
انا بقيت الليل كامل فالكوميسارية.. والتهمة ثابتة فحق داك الحيوان ... غيشدوه مللي يسمحو الاطباء ويبرا وانا كما قالوليلي البوليس ماغنتحاسبش حيث ضربتو لان ذلك يعد دفاع على النفس...المرض لاخور خاطر بمستقبلو كطبيب باش يرضي غريزته.. بنادم كيداير.. مشيت للدار ووليد معايا.. دخلت لبيتي وهو مهضرش شوية شاف فيا وقال..
- هادشي اللي جانا من الخدمة دالليل .. مكتسمعيش لكلامي ها شنو وقع..
- وليد.. واش مشايفش باللي الهضرة على هاد الموضوع فهاذ الوقت ماشي مناسبة..
- هانا ساكت.. اصلا خاصني نسكت احسن.. الهضرة دابا مغتفيد بوالو اللي عطا الله عطاه..
حاولت ننعس بلا هضرة.. دموعي بلا منحس بداو يطيحو على المخدة .. قطرات غزيرة وحدة مور وحدة.. تفزكات المخدة ديالي.. اه مكنتش كنستنى هادشي من وليد.. كنت كنستنى يعنقني بالجهد ويقولي انا معاك متخافي من والو.. كنت كنستنى .. يجي يقولي انا معاك اهدى .. يدوز يديه على خدي ويمسح دموعي .. ويطيب لي خاطري.. مدارهاش .. نعس وتقلب للجهة الاخرى..
مقدرتش ننعس بقيت الليل وانا كنشوف..وصلات الوقت نضت بدلت حوايجي ومشيت نخدم ومهضرتش مع وليد.. وحتى هو ماحاولش يهضر وخلاني.. كنت محتاجة نمشي ندفع للكونجي.. ونرتب المسائل ديالي.. مللي وصلت للسبيطار.. كانت المفاجئة اني لقيت كلشي فخبارو اللي وقع.. كلشي كيهضر وكلشي داير الموضوع حديث الساعة.. دخلت وكلشي كيوشوش فودن لاخور وكيشوف فيا.. احساس خايب بزاف.. حنيت راسي ومشيت للادارة.. لقيت فالطريق وحدة من الميناج قالتلي نتي اللي اغتاصبك الطبيب .. شفت فيها بغضب وقلت .. حاول وصاف مغتصبنيش ..
دزت ومشيت وهي تقول : ايوا الله اعلم احما مشفناش شنو وقع بالضبط كلها يعرف راسو..
- حسبي الله ونعم الوكيل.. حسبي الله ونعم الوكيل ..
دخلت للمدير وقالي :
- دكتورا هدى.. انا متضامن معاك فداكشي اللي وقع البارح ولكن ماشي هاكا بهاد الفضيحة قهراتنا الصحافة اليوما.. راه السبيطار انا اللي كنتحمل مسؤوليته.. تفهمي موقفي الله يهديك..
- اش كتقصد .. واش انا اللي قلتله اجي تعدا عليا؟ واش كنتي باغيني ندير نخليه يدير ما بغا؟؟
- شوفي ابنتي .. لمصلحتك كنصحك تنتاقلي من هاد المدينة .. باش متعدبيش هاد الموضوع صعيب .. خصوصا على المرا..
- مقادراش نتيق .. لاش نهرب وانا الضحية .. لاش نتعامل بحال المجرمة فحين خاص نتلقى تضامن ماشي معاني وحشيان الهضرة ووشوشة فالودنين عليا علاش ..
- هادشي اللي عطا الله ابنتي ..
خديت كونجي وخرجت كاعية من عندو .. كنتمشا وكلشي كيشوف فيا باجنب .. وكيخنزر تقول دابحة ليهم شي واحد.. حتى الصحافة جاية دير خبر اووف هادشي بزاف.. مقدرتش نتحمل ومشيت للدار.. دخلت لقيت لبنى وفرح وابتسام كيستناو ومخلوعات غا شافوني جاو عنقوني.. اويلي كيدار وصليهم الخبار.. هاد البلاد كينتاشرو فيه غا الفضائح.. بداو كيواسيوني .. وهي تهدر الحاجة: هادشي اللي خدينا من الخدمة دالعيالات.. شفت فيها وبغيت نهضر نرد عليها ولكن سكتت حيت اللي بحال الحاجة مكيفهموش هادشي.. خديجة جلست مع ماماها وبدات كتدير ضحكة الشمتان..
0 Commentaires