اخو البنات -الفصل الاول -الحلقة 1

قصة اخو البنات 
الجزء الاول 
فكل اسرة كتلقا الدراري طاغيين على البنات وكيتحكمو فيهم .. سواء كان صغير او كبير عليهم .. طبعا لأن مجتمعنا ذكوري .. كيعطي الحق للراجل يدير ما بغا ويتحكم فالمرا.. قصتنا غتنصب فهاد الاتجاه وغتحكي قصة اسرة نموذجية تحكي معاناة الكثير من القصص المشابهة .. للي كيتحكمو فيها الذكور على الاناث 
 قصتنا غتحكي عن اسرة السي التهامي مول المحلات ديال الثوب .. كان معروف بزاف وكان واحد الانسان اللي كيتعامل بصدق معروف بالامانة ديالو .. كان عندو ابن وحيد كيقرا ...اسمه وليد... السي التهامي كان عندو سبعة دالبنات وحتا وحدة منهم مكتقرا .. ومعندهم حتى حرفة فيدهم .. جالسين غا فالدار .. واكلين شاربين ناعسين .. لحد الان كلشي كان مزيان .. لحد ما واحد النهار كان غادي وليد لعند المحل ديال باباه .. شاف الناس مجموعين على المحل بطريقة غير طبيعية كلشي كيشوف .. دخل فالزحام لقا الناس مجموعين على باباه وهو طايح فالارض .. مشا بسرعة مخلوع باش يشوف باه حتى كيسمع : ولدي وليد الباراكة فراسك .. متيقش راسو بالصدمة واش فجأة كلشي سالا .. باه مات .. للاسف السي التهامي جاتو سكتة قلبية .. مات وحتى واحد مكان داير بحساب هادشي .. صدمة كبيرة لعائيلته .. .. داز العزاء وكان وليد هو الراس الكبيرة بعد باه رغم صغر سنه الا انه كان لازم انه يشد المحل ديال باه .. ويستأنف الوصاية على عائيلته .. خرج من القراية .. وشد المحل ديال باه .. دازو سنوات .. وليد ولا نسخة طبق الاصل عن الواليد ديالو .. فالخدمة لانه ذكي كلشي كان كايشهد بهادشي ..

ذالجزء 2 
انا وليد فعمري ثلاثين عام .. كبرت قبل سني كنتعامل مع رجال فعمر صغيرهم خمسين عام .. حكم العمل هو هادا عمرهم محسبوني صغير وحتى انا حاسب راسي قدهم فالعمر .. وتعاملي وجديتي فالعمل هي اللي كتفرض عليا نكون قدهم .. مكنعرف لا مسارية ولا كرة ولا قهوة ولا راحة ولا مشاعر .. هادشي ديال الدراري الصغار انا كبير .. حتى فاللباس مكنعرف لا تيشرت دالبارصة ولا سراول مقطعين .. مكندير تشويكة ولا تحسينة دالشباب .. حياتي بين الثواب والبياعة والشراية .. انا هو الباطرون على الخدامة وهما كلهم فنفس عمري .. ولكن عمري مجلست معاهم ولا درت معاهم شي خرجة .. كنكمل خدمتي كنمشي للدار .. كنلقا فاستقبالي الواليدة وخواتاتي .. كلهم كيخليو اللي فيدهم وكيجيو يخدمو لي .. ها اللي توجدلي ماناكل وها اللي ترتبلي حوايجي وها اللي توجدلي الحمام ندوش .. كلها والدور ديالها وحتى وحدة مكطلع عينها فيا .. الكلمة ديالي هي اللي كتمشي على الكل .. حتى على الواليدة .. ومللي ننعس انا حتى حس مكيتسمع فالدار .. الرجال كيشقاو النهار كامل ومللي يجيو خاص يرتاحو .. الهضرة ممنوعة والنقاش ممنوع .. كنجيب ليهم ما ياكلو .. هادا اقصى حقوقهم .. وكونهم تحت حمايتي فهذا اكبر شرف ليهم .. ممنوع عليهم الخروج .. وممنوع عليهم يقراو .. وممنوع عليهم يناقشو قراراتي .. انا اللي نختار ليهم وانا اللي نعرف مصلحتهم .. والحاجة اللي نقررها انا هي الي تكون.. حتى لو هما مبغاوهاش .. قراري انا وارادتي هي اللي غتنفذ ..