الجزء 13
دخلت لبيتي وانا مفقوصة.. دعيت الله يخرج هادشي على خير.. جات دقات عليا خديجة..
- شنو بغيتي..
- والو غا جيت نشوفك كيوليتي .. كنتي كتشوفي عليا راسك حيت نتي شريفة ومتلمستيش هاهئ هانتي جاتك قدك.. فضيحة ميتمناها حتى واحد لراسه..
-نتي اسوء انسان على وجه الارض ومعندك حتى علاقة بالشرف.. انا شريفة بزاز عليك ..
- هئ هئ نشوفه بعدما قاسك راجل اخور واش خويا غيقرب ليك.. انا بعدا مكنضنش واش يديرها حيت خويا راجل .. تهلاي الشريفة العفيفة ديالنا.
خرجات وانا بقيت مفقوصة.. هضرتها خلاتني نفكر.. واش وليد شاك بحالهم باللي هاداك الحيوان تمكن مني.. واش بالصح ميوليش يقرب ليا.. خاصني نتأكد.. واخا انا غاننفجر وماباغا حد فهاد اللحظة.. مللي جا وليد.. كالعادة مهضرش معايا وانا ندير المبادرة..:
- وليد.. مالك معايا..
- والو.. شنو كاين..
- بغيتي تنعس ولا
- اه انا عيان بزاف .. وخاصني ننعس..
تاكا وتقلب للجهة الاخرى.. زيرت على راسي وتحنيت عندو بستو من عنقو وهو مادار حتى ردة فعل..
- وليد.. واش مبقيتيش باغيني ..
- هدى الله يرشي عليك خليني ننعس انا ماباغي صداع..
- صداع؟؟ واش شايفني كندابز..
- هدى.. ماناوياش تقيليني عليك فهاد الليل وتخليني نرتاح..
- لا مغانخليكش تنعس حتى تنوض نهضرو..
- انا غانوض ونهنيك مني كاع نقلب فين ننعس .. تهنايلي مع راسك دابا..
- وليد..
بقيت كنبكي بلا منحس.. اش هادشي يعني خديجة عندها الحق وليد مبقاش باغيني.. الله يا ربي لا .. يا ربي وليد تبدل على ودي انا.. ميمكنش يفكر هاكا.. مشيت كنقلب عليه .. لقيتو فبيت لبنى ناعس .. وساد الباب.. خليتو ومشيت لبيتي.. دوزت ليلة فالجحيم كل الاحتمالات جات لبالي .. واش اللي تدافع على راسها كتولي مذنبة فهاد المجتمع اللي مكيرحمش .. يا نموت محروقين .. يا نعيش مفضوحين.. هادي هي .. لا انا مغانموتش .. مغانموتش ..
الصباح نضت مشيت نشوف وليد ملقيتوش .. معرفتش فوقاش خرج.. دوزت نهار خايب فين مشيت عجوزتي كتلوح عليا هضرة.. ونظرات وضحكات خديجة مستفزة.. مبقيتش قادرة نصبر .. فالليل جا وليد.. تعشا فهدوء.. ومشا بلا ميهضر معايا نعس فبيت لبنى من جديد.. هاد الوضع ولى لا يطاق.. كغاندير نصبر وانا كنتلقى معاملة المذنب.. الغد ليه خديت صحيفة.. بديت نقرا فيها حتى بانلي الخبر ديالي.. وناشرين حتى الصورة ديالي .. هادو بأي حق يديرو هادشي .. اتصلت بيهم شبعتهم معيور.. ملقاو مايديرو..سدو عليا المكالمة.. قررت نرفع عليهم قضية.. كيشوهو بيا راه القانون يمنع نشر صور اشخاص بدون موافقتهم.. خرجت مشيت للمحكمة ورفعت دعوة عليهم.. وعرفت ان صاحبنا تشد الحبس وغادي يستدعيوني باش نحضر المحاكمة ونشوف القاضي.. هادشي مزيان.. مشيت للدار وانا نلقى مكالمة من الواليدة..
-الو هدى واش داكشي اللي كتبوه عليك فالجريدة صحيح؟
-لا اماما غا واحد حاول يتعدا عليا ودعيتو.. ماكين والو من داكشي اللي مكتوب تما غا كيكبرو من الموضوع...
- الله يا بنتي.. الله ياخد الحق منهم كيشوهو بنات الناس..
0 Commentaires