الجزء 3
من داخل الدار الكبيرة .. كانت كل غرفة كتحكي حكاية .. غرفة الام اللي مات راجلها .. واللي عينيها كيحملو الف قصة وحكاية .. امرأة استسلمات لحكم الراجل .. هي فبالها انها استسلمات لطاعة الزوج وان طاعته واجبة ... معارفاش انها استسلمات للظلم ماشي للطاعة .. والله مكيرضاش بالظلم.. الام فاطنة فعمرها خمسين سنة .. تجاعيد كيملئو وجهها .. وجه مملوء بالخوف واليأس من الحياة .. شمعة وطفات .. صغرها وشبابها مشا فخدمة زوجها التهامي ..
خوفها قائم على بناتها .. فين وكيفاش وشنو غيوقع الى ماتت .. واش غيبقاو فكنف اخوهم .. ولا غيجي النهار اللي غيتزوج ويدير ولادو وغتطلب منو مراتو يجري على خواتاتو .. افكار كتراكم فعقلها .. كيرجع بها التفكير لصغرها .. عاشت طفولة بحال بناتها .. واليديها ماتو وخلاوها هي وخواتاتها مع خوتهم .. عيالات خوتهم تهلاو فيهم ... اه تهلاو فيهم بالشقا والضرب .حتى جراو عليهم من الدار..تكرفصو فالعائلة من هادا لهادا ومقدروش يهضرو على حقهم حيت هما بنات .. والبنت خاصها تسكت ومتهضرش ... لحد ما جا السي التهامي طالب فيها ... شافتها مو كتخدم وكتشقا وبدراعها عند شي حد من العائلة .. شافت فيها المرا دالزمان اللي تخمل وتشقى وتخدم .. داتها لولدها .. دوزات شباب صعيب كانت فيها كتخمل وكتشقى حتى وهي حاملة ببناتها .. كانت كتاكل العصا مزياان .. ولدات تلاتة دالبنات هادي مور هادي .. وبعد كل ولادة وبمجرد انهم يلقاو المولودة بنت .. مكايحتارموش المخاض ديالها ولا عدابها ولا مرضها .. كيعنفوها وكيطلبو منها تنوض ديك الساعة تشقى ومكانوش كيحملو البنات اللوالة .. ومكرهوش يدفنوهم حيات .. كأنها المسؤولة والمذنبة لانها ولدات البنت .. كأنها ارتكبات جريمة .. المرة الرابعة مللي حملات .. كان كيهددها راجلها بالطلاق وباللي غيرميها فالشارع هي وبناتها الا مولداتش ليه الولد .. كانو كيعاملوها بواحد الحقارة.. دوزات حمل صعيب بزاف.. تسع شهور ديال الخوف فين غتمشي الا طلقها .. هي معندها حتى واحد فالدنيا .. شكون غيصرف عليها .. بالنسبة ليها العداب والضرب فداك الدار اهون بزاف من الزنقة .. نهار شدها الوجع .. كانت كتشد وكتزير على سنانها .. مكرهاتش فداك الساعة ميخرجش البيبي .. خايفة وكتقول غيخرجوني للزنقة مباشرة بعد الوضع .. صرخاتها تعالات والكل كينتظر شنو غتولد..هزات القابلة بين يديها البيبي وشافت عندها وقالت مبروك ولد .. تما تنفسات ونعسات .. النعاس اللي تسع شعور وهي مفتقداه .. حماتها ديك الساعة فرحات وزغرتات ولدو ولد وسماوه ولييد.. اسم اختارو ليه باه .. ولي العهد .. تما بداو كيعاملوها كانسانة .. لحد ما بدات كتولد البنات من بعد وليد ولدات اربعة دالبنات ورجع التعامل السيء ليها من جديد ولكن وليد هو اللي كيشفع ليها ومكيخرجوهاش لحد ما ماتت عجوزتها وخفاف عليها العداب شوية ولكن الطغيان بقا ..هكا عاشت حياتها
0 Commentaires