الجزء 4
بجنب غرفة الام كانت غرفة اخرى .. من داخل الغرفة حياة اخرى ..
انا فاطمة الزهراء عمري 35 سنة .اكبر وحدة فخواتاتي.. ممزوجاش بمعنى اخر باايرة .. هكا كيقولو عليا عماماتي .. ماشي مهم .. حسن منتزوج ونعيش الحياة اللي عاشتها ماما.. حياة كلها قهر .. كنتذكر كل شيء .. انا اكتر وحدة معقدة فخواتاتي من شيء اسمه الزواج .. حتى انه كان بابا بغا يزوجني واحد المرة من واحدالسيد من صحابه .. درت راسي مريضة ومسكونة .. ولحد الان كل الناس كيهضرو عليا وحتى واحد مكيبغي ييجي يخطبني حيت خايفين مني .. مكيهمش .. الحقيقة هي اني ماباغاش نتزوج .. كنتذكر كل مشهد من نهار عقلت على راسي .. كلها كوابيس .. كلها مشاهد خايبة .. القهر فعيون امي .. وبكاها قدامي انا بوحدي وانا كنواسيها بيديا الصغار .. الضرب والغوات اللي كنت كنسمعو .. جداتي اللي كانت كتضربني وعمامي وعماتي قبل ميتولد وليد .. انا كنكره وليد .. هو السبب فتعاستي .. وفتعاستنا .. هو سباب حياتنا كلها .. بغيت غا ننعس .. مبغيت والو من الدنيا .. غا يعطيوني التيقار ويفرقني عليه داك وليد للي مكيحتارمنيش رغم اني كبيرة عليه .. كيبغي يتحكم فيا .. انا بغيت نبقى بوحدي وننعس صافي ننعس .. ومكرهتش نموت ونتهنا .. نموت ونرتاح..
الجزء 5
انا لبنى .. الاخت اللي بعد الكبيرة فعمري 33 سنة وشوية. .. انا الخايبة فخواتاتي .. اه الخايبة .. كلهم زوينات .. انا لاطاية لا زين .. كيتشوفني شي وحدة تبقا تضحك عليا وتعقدني ... وزايداه الشوف عندي ضعيف ودايرا النظاظر ديال الكيسان... يمكنلكم تتخيلوني كيفاش دايرة ..انا اللي خديت النصيب الاكبر من الحظ السيء فخواتاتي .. هما على الاقل عندهم الزين وكيوقفو ولو للحظة قدام المراية يشوفو راسهم ويفتخرو بزينهم .. انا كنكره شي حاجة سميتها المرايا .. مفهمتش منين جابو هاد الله يعطينا سعد الخايبات .. سعدي بغيتو ليكم نيت باش تعرفو حياتي كيف دايزة.. معمري عرفت الحب .. اصلا كيفاش غنعرفو وانا اللي شافني كيتخلع .. هاها مازال عاقلة على ولد الجيران كان كيعجبني ولكن هو مكيعرفنيش كنت كنستغل غياب خويا وكنهضر عندو من السرجم بلا ميشوفني هو .. السيد طاح وبغا يتزوجني ..كيما كان كيقول بغا شي بنت دارهم .. بقا كيلح عليا نوريه وجهي .. قالي بغيتك لشخصيتك وقلبك الحنين ولعقليتك مكيهمنيش زينك .. بغيت غا ناخد فكرة عليك .. تيقتو وصحابلي دبصح الرجال كيبغيو العقلية قبل الوجه والزين .. كنت وغالطة بزاف واي وحدة كتعتقد هادشي تكون حتى هي غالطة ..زعمت ووريتلو وجهي .. شفتو تصدم بسرعة قالي عندي شي غرض مهم ..غنتلاقاو منبعد.. ومن تما ماعاودتش شفتو .. معلوم اش يدير بوحدة بحالي .. معارفاش تزين راسي ونبان زوينة ..السبب هو وليد قاطع علينا كلشي ..تقول هو اللي والدنا .. حتى وحدة متا مكتبغيه .. علاه اللي دايرر فينا قليل؟
الجزء 6
انا مريم ... فعمري 31 سنة .. انا البنت الوسطى .. حتى واحد معارف اني كاينة اصلا .. كنبغي الشقا والكوزينة .. والتسياق والتخمال .. هادشي على امل تشوفني شي شارفة شي نهار وتديني لولدها واخا يكون مزوج ب اربعة ماشي مهم ..المهم هو نخرج من الروتين اللي معيشنا فيه وليد ومن الجبروت ديالو .. نخرج من هاد الحبس ومغاديش يشوف كمارتي مرة اخرى.. مفهمتش علاش انا مكيبغيوش يتزوجوني الرجال .. شحال من وحدة خطباتني لولدها .. مللي كيشوفني ولدها كيقول لا .. يمكن فيا شي تابعة ولا شي عكس .. ملقيتش الطريق للفقها .. اما انا كون مشيت نضبر على راسي نحيد العكس .. وندير شي تفوسيخة .. يمكن هادا الجن العاشق .. كيبعد عليا الخطاب وكيخللي الرجال يشوفوني فصورة خايبة .. هادشي قالتولي واحد المرا كانت ساكنة حدايا .. تلاقيتها وقالتلي راه كاينة وحدة كتشوف وكتحيد العكس وخاصني نجيب ليها الف درهم باش تحيد العكس مني وتخللي الرجال يهبلو مللي يشوفوني قدامهم .. الف درهم .. شي حاجة صعيبة بزاف .. انا عمري ما شديت فيدي خمسة دراهم .. وليد كيتسخر هو كلشي ولا كيصيفط شي واحد من الخدامة ديالو كيحط السلعة فالباب وكيمشي وكدخلها ماما .. معندوش داك القضية ديال يخللي لينا الفلوس فالدار .. فرأيه اش نديرو بيهم ،، ها ها حتى من اللباس كيجيب لينا غا الثواب وكتخيط ختي وماما .. غا الجلالب .. وبالنسبة للحوايج ديال العيالات كنقضيو باللي كان .. والله يجعل الباراكا فالوصفات الطبيعية .. عايشين حياة بدائية بزاف .. الله ياخد الحق فيك اوليد
0 Commentaires