الجزء 11
كان كل شي غادي بشكل روتيني .. كل وحدة عايشة فقنت .. ووليد غامس راسو فالخدمة .. حتى واحد النهار جا عندو واحد من اصحاب الوليد ديالو القدامة .. وهنا غتبدا الحكاية ..
- وليد .. ولدي لاباس عليك
- عمي محمد .. نهار كبير هادا .. زمان هادا ماجيتي عندنا .. ولا الغربة غتاخدك منا
- راك عارف اولدي الحياة كيفاش دايرة مكترحمش .. اليوما جيت طالب ليك فواحد الحاجة وبغيتك تعاوني فيها الا قديتي اولدي ..
- الله يا ودي .. انا تحت امرك .. نتا كنتي عزيز بزاف على الوليد الله يرحمو .. وكنتي من اعز اصحابه
- ربي يخليك اولدي .. بغيتك تعاوني باش نلقى شي سكن مأمن لبنت خويا .. تعينات طبيبة فالمدينة .. راك عارف خاصها شي سكنى اللي نطمئنو عليها فيها .. نتا ولد البلاد وعارف الديور مزيان ..
- بنت خوك ونخليوها تسكن برا .. مجاتش علينا .. تجي للدار الكبيرة ومرحبا بيها .. الوالدة غتحسبها بحال بنتها ...والبنات غيتهلاو فيها.. وغيعاملوها بحال ختهم .. متخممش من هاد الناحية ..
- الله يجازيك بخير اولدي .. فعلا ذاك الشبل من ذلك الاسد.. اهل الكرم وباك كان معروف بهادشي .. انا غنجيبها انشاء الله وغنطمئن عليها معاكم ..
- تنورو ..
مشا السي محمد وخبر بنت خوه بهادشي ..
انا هدى .. فعمري 28 سنة طبيبة .. روحي مرحة .. وعندي ثقة بالنفس عالية .. كنأمن بنفسي .. وكنبغي نعاون الناس .. علاش لا .. حنا مخلوقين باش نعاونو بعضياتنا .. كنآمن بحريتي ومكنسمح لحتى واحد يقيسهالي .. ممرتابطاش .. مكنتفاهمش بزاف مع الرجال .. ومازال كنستنى ينزل شي واحد من السما يفهمني .. داكشي معندوش شروط محددة .. داكشي كيجي بوحدو .. اه الحب كيجي بوحدو هادشي باش كنآمن .. خاص يتفهمك وصاف .. ويحترم كيانك .. ويقدس وجودك فحياته .. هادشي اللي خاص يكون ..
الجزء 12
وصلنا للمدينة .. ومشينا لدار الحاج التهامي .. الطريق كلها وعمي كيعاودلي عليه وكيف كان الله يرحمه رجل طيب .. وكان كيدير الخير فالناس .. هادشي اللي عاودلي .. فكان ليا الشوق نتعرف على عائلته ..
عند وليد : امرت خواتاتي يوجدو غرفة خاصة للضيفة للي جاية عندنا .. واكدت عليهم حتى وحدة ماتحشمني معاها .. وميتخالطوش معاها بزاف .. مابقاش بزاف ويوصلو ..
استقبلت السي محمد ومشفتش بنت خوه هي جات ومدات يديها تسلم عليا .. حنيت راسي وقلت ليها .. احم احم حنا مكنسلموش على العيالات .. دخلي الواليدة كتستناك ..
هدى: وصلنا واستقبلنا السي وليد اللي كان كيشكرلي فيه عمي .. فتحلينا الباب سلم بحرارة على عمي .. هو باقي صغير ..كان يصحابلي شي واحد اللي شارف .. وماشي مستيلي بحال الى مازال عايش فالثمانينات .. شديت الضحكة .. وقربت منه ومديت يدي بكل ثقة .. السلام انا هدى طبيبة .. تشرفت بيك !
مرفعش عينيه عندي وقالي حنا مكنسلموش على العيالات .. وتلاها مع عمي .. انا ديك الساعة تمنيت لوكان حدايا شي فردي نتيري فيه على هاد الستون اللي دار ليا .. تمنيت الارض تنشق وميطراليش هادشي .. كرهتو فهاد الساعة .. اش هاد الغطرسة واش هاد المستوى كيتعامل بيه مع المرأة .. دخلت ومشفتش فيه لقيت شي بنات سلمت .. كانت كل وحدة كتشوف فيها باحتقار وكتعبرني من رجليا حتى راسي بحال الى بغاو يقتلوني .. سلمت على الحاجة ..
الحاجة: جلسي حدايا ابنتي .. كيدايرين مالين الدار .. نتي بنت خو السي محمد .. كان عزيز بزاف عند المرحوم .. بغيتك تحسي بحال الا راكي وسط عائيلتك ..
فالاول خفت ولكن هضرة الحاجة طمئناتني ولكن الستون ديال وليد مبغاش يتحيد لي من بالي ..
وراتلي وحدة من البنات البيت ديالي وطلباتني نرتاح على ما يعيطولي الغدا..
دخلت للبيت كان واسع ومرتب .. حطيت حوايجي وتكيت كنفكر .. يا ترى اش كيستناني فهاد الدار
بدلت حوايجي .. وجات واحد البنت عيطات عليا .. قصص دودي
- الغدا واجد اختي
- واخا احبيبة .. انا هدى تشرفت بيك
- انا فرح ..
- فرح .. الزويونة واش نتي هي الصغيورة .. كتبانيلي صغيورة فيهم .. قوليلي فاش كتقراي ؟
-حنات راسها وقالت: معمري مشيت للمدرسة .. حتى وحدة فينا مكتقرا ..
تما تصدمت .. وعلاش ؟؟ واش باقي شي حد فهاد الزمان مكيقراش
- اه .. حنا .. بابا كان كيقول المرا غا ديال الزواج .. وحتى وليد مبغاش ..
- وليد؟؟ مغريباش عليه .. من اول مرة عرفته مسموم .. شفت فيها وقلت ليها : ونتي باغا تقراي ؟؟
-ضحكات بابتسامة تعبر عن التمني !! حلم حياتي .. مكرهتش كنتمنى نقرا .. واش تعلميني؟؟
- اه اكيد غنعلمك؟؟ وغنديك حتى المدرسة؟؟
- ولكن وليد مغيبغيش ؟؟
- انا غنحاول نقنعو انشاء الله ..
مشينا تغدينا .. تصاحبت انا وفرح واخا صغيرة ولكن حبوبة .. الحاجة كانت فرحانة بيا .. ولكن الاخريات لا .. كل وحدة كانت كتشوف فيا من تحت لتحت .. شوفاتهم كانت كتخلع ..
الجزء 13
داز النهار مزيان وفالليل كنت جالسة انا والحاجة كنهضرو حتى قالتنلي نوضي ابنتي غطي راسك ولبسي حوايجك راه مول الدار غيجي دابا .. دهشت ونضت درت داكشي اللي قالت .. خرجت عندها باش نشوف هاد عنتر اش كيقول وكنت ناوية نشدها معاه على داك البلان اللي دارلي الصبح .. جلست حدا الحاجة حتى كتبانلي قدامي حالة استنفار .. سولت الحاجة مال البنات .. قالتلي ياك قلتلك مول الدار جاي وخاص يوجدولى كلشي راه يكون عيان بالخدمة .. تصدمت .. علاه مالو ملك ولا باش يخدم عندو خواتاتو .. وبزاف على التسلط .. شافت فيا وسكتات .. وصل سي السيد وفتح الباب .. كلشي شاد الصف وكيشوف فيهم شوفة المخزن .. كلشي واقفينلو .. الا انا ومو .. تجاهل خواتاتو بحال الى مكاينينش .. وجا باس الراس لمو .. وانا تجاهلني بحال الى مكايناش .. مشا دخل لبيتو .. وانا بقيت حالة فمي فهاد بنادم اللي عايش فالقرن الرابع عشر .. مازال كيستعبد بنادم .. ومحاسب حتى واحد فالدنيا .. اش هاد الزمر ..
صاوبو البنات الطبلة وحطو عليها العشا .. وهو جا وساكت ومكيهضر مع حتى واحد .. جا جلس على الطبلة نضت وجلست حتى انا وبالعاني بغيت نستفزو وهو مكيطلعش عينو فيا ماماه جلست حتى هي قالتلو كيداير اولدي .. كيدايرا الخدمة شاف فيها وبدا يهضر معاها بطريقة خشنة وانا ماشافش جيهتي وانا نشرك معاه الهضرة
- التجارة ديال التوب فالغالب كيكونو زبناءها عيالات .. واش هاكا كتعاملهم كلشي كيما كتعامل البنات فالدار؟ ولا هما عندهم معاملة خاصة؟
سكت وفنفس الوقت مهزش عينيه فيا .. بقا ساكت مشحال .. وهو يهضر ..
- درنا الخير فيك باش متلاحيش فالزنقة ؟ لوكان ما وجه السي محمد .. ديك الساعة كنتي غتشوفي المعاملة الخاصة؟؟
نضت بلا منحس .. واش كتذلني حيت مسكنني .. اسيدي انا برزقي ونقدر نسكن فاي بلاصة .. حسن ما نبقى تحت رجليك .. اسي وليد
دخلت للبيت وبديت مجمع الحوايج اللي كنت درت فالبلاكار .. مغنزيد حتى دقيقة فهاد الدار .. بنادم مريض فمخو ..
شوية لقيت فرح جات .. وبقات كترغب فيا
- عفاك بقاي .. انا كان عندي امل تعاونيني .. عفاك صبري على قبلي .. عفاك
بقات فيا وشديتها وبقيت كنشكي عليها .. ولكن قنعاتني بقات فيا .. غنحاول ندير المستحيل باش نقريها ونحقق ليها حلمها ..
دوزنا شحال ديال الوقت .. ومشات تنعس وانا بقيت كنفكر فداكشي اللي وقع .. الصراحة هو مهضرش معايا عطاني التيقار وانا اللي جبدتو .. هو ما غلطش .. نضت على حالتي ومشيت لبيتو .. طبعا هو كان اكبر بيت واصغر بيت فالدار .. دقيت .. مجاوبش .. ضرني خاطري .. يمكن مكاينش فالبيت حليت الباب .. ودخلت .. فعلا مكان حتى واحد فالبيت .. بقيت كنتأمل فالتصاورو اللي معلقين .. مشيت لقيت شي فاكتورات حدا الناموسية مشيت هزيتهم بقيت كنشوف .. حتى سمعت شي صوت بحال الرعد فودني
- اش كاديري هنا ؟
تلفت دغيا ويدي على قلبي .. انا.. اانا
- سيري لبيتك .. ومتخلينيش نسمع مالين الدار شنو دارت الطبيبة
- بلا متزيد فيهم .. انا جاية نعتذر منك على داكشي اللي درت قبيلة ..
شاف فيا لاول مرة بنظرة مستغربة .. كأنه مكانش كيستنى مني ديك الهضرة ... بقا ساكت خرجت من بيتو ومشيت بلا هضرة .. هاد بنادم غيحيرني .. وغيسطيني .. كيفاش كيفكر ..
0 Commentaires