اخو البنات -الفصل الاول -الحلقة 4

الجزء 7 
انا خديجة .. فعمري 28 سنة انا اصغر من وليد البنت الرابعة.. انا هي العاشقة الولهانة .. ممعقداش بحال خواتاتي .. اصلا علاش غنتعقد .. انا زوينة بزاف... قريب نخرج من هاد الجحر .. اه غيخرجني منه حبي وحياتي .. كمال .. اه هادا ولد عمي من صغري كنبغيه وكيبغيني .. قد وليد هو فالعمر ولكن هو حنين بزاف .. وكيجيبلي ما بغيت .. حتى وحدة من خواتاتي ماعارفة بعلاقتنا .. واخا كنتشاوفو فين وفين ولكن .. الحب ديالنا كبير.. طبعا كلشي غيتساءل كيفاش كنشوفو ووليد ساد علينا كلشي .. ساهلة ! هو راه ولد عمي .. ومللي كيجيو مو وخواتاتو كلشي كيتشغل بيهم وكنسلت باش نشوفو هو من السرجم .. كنهضرو بزاف .. حتى كيقربو يمشيو الضياف كيمشي هو .. علاقتنا هي هادي .. عينيا كبار وكوحل .. والفم حمر وبشرتي بيضة .. زوينة بمعنى الكلمة .. ماشي غرور ولكن الحقيقة .. غنعيشو انا وكمال ديالي حياة زوينة غيخرجني من هاد القوم .. وغنعيشو فدارنا بوحدنا .. نديرو وليدات .. غنتساراو بزاف .. وغيديني لكاع البلايص اللي كيعاودولي عليهم بنات عماماتي .. دوك البلايص اللي كيمشيو ليهم لنات عمي .. نمشي للسوق ونمشي حتى الحمام ونمشي للحديقة .. نحيد غبينتي فكلشي

الجزء 8 
اناسميتي ابتسام فعمري 25 سنة..انا هي البنت الخامسة .. اعشق شي حاجة سميتها ابداع .. كنعشق الموسيقى .. وكنعشق الرسم.. وكنعشق الفنون كلها .. وكنخرج الابداع ديالي فالخياطة كنخيط كلشي .. قفاطن ..جلالب .. كساوي .. كنبدع اللي بغات شي حاجة كنفصلها وكنخيطها .. الكروشي والطلامط .. يكفي نشوف الحاجة مرة وحدة .. باش نصاوبها حسن من اللي شفتها .. حتى التريكوات كنصاوبهم .. كلشي كيقولي تبارك الله عليك .. موهبة من عند الله .. عمري تعلمت فشي نادي .. كنخيط احسن ما يكون .. كنرسم اي حاجة وكنبغي الموسيقى .. حلم حياتي هو تكون عندي الة موسيقية بحال اللي كانت عند واحد الدري من الجيران .. الجيتار او الكمان .. حاجة زوينة بزاف .. ولكن شكون يخليني .. وليد مانع علينا كلشي .. كيقول باللي حرام.. راه الحرام هو هادشي اللي كيدير فينا هو .. الحرام هو يحبسنا ويضيع حياتنا فخدمته كأننا عبيد عنده .. الحرام هو يعاملنا بهاد الطريقة فقط لاننا بنات ولانه معندناش شي حل من غير نطاوعوه .. كان حلمي نولي مصصمة ازياء مشهورة .. نخيط ونوري الابداع ديالي للعالم .. كلشي يشكر فيا .. وكلشي يقولي تبارك الله عليك .. كنتمى نخرج الطاقة ديالي فالحاجة اللي كنبغي .. ماشي نعاود نفس المسلسل ديما .. ماشي نستنى حتى يوصل العيد ونخيط .. بغيت نخرج الطاقة .. فيا طاقة كبيرة بزاااف ..

الجزء 9 
انا سليمة.. فعمري 23 سنة .. انا البنت السادسة فخواتاتي .. كنكره الحياة .. شخصيتي ضعيفة بزاف .. خوافة وكنخاف من ظلي .. انا رقيقة فالمشاعر ديالي بزاف .. ومرهفة الاحساس .. ولكن الخوف معقدني فحياتي .. كنخاف من اي حاجة ومن كل شيء .. متوسطة الجمال .. ولكن الزهر ديما معاكس معايا .. الفوبيا مرضاتني .. خويا هو اللي مرضني حيت كيقسى عليا .. وكيخرج فيا اعصابه ومكيحنش فيا .. حتى ماما .. عمرها فكرات تسمعني وتشوف مالي .. باش وليت هاكا منعرف .. علاش وليت كنخاف هاكا معرفتش ...شنو وقع .. صور كتتكرر قدامي ديال غوات وديال دباز .. معرفتش شكون كيدابز . .. ولا عماماتي وهما كيشوفو فينا شوفات ديال الاحتقار وكل وحدة كتعبر فينا بالسنتيم .. كتقلب فينا على ديفو باش تديرو موضوع باش تهضر بيه .. الدونية في النظرة ديالهم .. البهايم عندهم القيمة حسن من المرا .. حيت خدامين وفيهم النفع .. العيالات مفيهم .. والبنات كتار خصوصا الا متزوجوش .. كيعتابرو عالة على المجتمع .. الله يلعن التقاليد اللي رجعاتنا هاكا .. كرهت علاش تزاديت ..

الجزء 10 
انا فرح .. البنت الصغيرة فخواتاتي .. فعمري 19 سنة .. مكنعرف والو فالدنيا .. كنشوف فخواتاتي مفاهمة والو .. علاش هما هاكا وعلاش ولاو هاكا .. البؤس عنوان حياتهم...كل وحدة عايشة فعالمها .. كنشوف من السرجم بنات فالسن ديالي ولا صغر مني كيمشيو للمدرسة .. حتى انا بغيت نمشي .. حلمي الوحيد اني نقرا ونتعلم .. ونقرا كتوبة .. ونكتب .. ونعرف ويتحيد الغشا من على عيني .. خواتاتي كيدابزو معايا حيت عزيزة عند ماما وكيحسدوني وكيكرهوني .. ولكن انا مكنكره حتى وحدة فيهم .. حتى وليد اللي داير فينا هاد الحالة مكنكرهوش .. حيت حتى واحد معارف الظروف ديالو .. هو براسو تحط فموقف خايب وصعيب .. تحمل مسؤولية وهو فسن صغيرة .. قرانو كيعيشو حياتهم وهو هز حمل كبير .. اسرة قدها .. انا واحد البنت اللي طموحي كبير .. كنتمنى يتحققو احلامي شي نهار .. مازال ميأست ومغنيأسش .. ومتأكدة باللي غيوصل داك النهار .. مازال غيوصل ..