الجزء 38
- لبنى قلتلك راك غتعجبيه .. اهو جا يخطبك
- انا ممتيقاش راسي.. اكيد كنحلم.. واش بالصح قال لبنى انا
- اه راه جايب عائيلته ههه مبروك احبيبة .. يالله زيد راه خوك كيعيط عليك .. هانتي حيدي عليك دوك النظاظر لاش شارية العدسات مللي ديما لاصقة فيهم .. زيدي قدامي
- واخا واخا .. راه فيا الخوف... شدي فيا عفاك .. دخلي نتي انا نتبعك ..
- غا زيدي قدامي..
مشينا والرعب فيها غا دخلنا وكلشي بدا يشوف فيها .. العريس ناض كان فرحان بيها بزاف مشينا جلسنا حدا وليد.. احساس زوين بزاف.. نتمنى حتى انا نعيشو مع وليد.. وهو دغيا كيقول للناس راها مرتي ..
وليد: لبنى السيد جاي يخطبك على سنة الله ورسوله.. الرأي ديالك مهم .. شنو قلتي واش موافقة..
حشمات لبنى وكلشي كان كيستنى تهضر حنات راسها وقالت: اللي شفتيه نتا اخويا انا موافقة عليه..
كلشي رتاح بديك الهضرة اللي قالت ..الفقيه قال الله يرضي عليك ابنتي بنات الاصل هادو هما سيماتهم.. واش نقراو الفاتحة..
بسم الله الرحمان الرحيم.. كلشي بدا يقرا الفاتحة.. لبنى فرحانة بزاف.. هادي اللي عمرها توقعات تعيش هاد اللحظة.. وحتى حاجة مبعيدة عند الله..
مشاو الناس بعدما اتافقو على كلشي .. العرس غايكون من هنا شهر.. كلشي فرحو ليها
بالليل بعد ما قصرتا على لبنى وكلشي فرحان ليها النهار داز طويل .. قالي وليد راه جاب كمان لابتسام .. وطلبني نعطيه ليها..
- وليد.. عطيه ليها نتا وفرصة تتقرب ليها..
- لا منقدرش ..
- حتى على قبلي مديرهاش .. عفاك
بدا يشوف فيا متردد.. وانا كنشوف فيه بنظرات توسل .. عفاك
- واخا.. نتي عارفا منقدرش نقاوم نظراتك..
- كنبغيك ..
- حتى انا ..
مشيت عيطت على ابتسام وقلتليها وليد بغاك.. خافت ومفهمات والو.. شديت فيدها وديتها عندو وهي خايفة .. قاليها : ابتسام.. انا خوك.. وعمري نبغي ليك الحاجة الخايبة.. داك النهار كنت معصب وهرستليك الكمان ديالك.. وهانا شريت ليك واحد اخور.. جبدو ليها وهي تنباهر مكانتش كتستنى منه يديرها.. عنقاته وبلا متحس بدات تبكي .. شكرا اخويا شكرا.. البنات استغربو بزاف ولكن عجبهم الحال.. حيت خوهم بدا يتقرب منهم .. ولكن الحاجة كان عندها رأي آخر.. دزت من حداها وهي تقولي.. وليتي كتحكمي بولدي كما بغيتي..نزلتي قيمته وخليتيه يدير شي حوايج على قبلك مخاصهمش يدارو..
- ولدك ولا راجل مزيان .. ولا بغيتي يبقى يظلم فخواتاته حياته كاملة..
سكتات ومشيت .. مشيت ننعس يا ريت لوكان كتفكر بطريقة اخرى.. انا مغاناخدش ولدها منها.. ومستحيل فيوم من الايام نقلبو عليها ولا على خوته.. كنتفهم تفكيرها ولكن انا ماشي كيما كتفكر فيا .. تأليف دودي
الجزء 39
الصبح بكري قبل مانمشي للخدمة دزت للمصحة .. شفت الطبيب قالي راه ميمكنش نشوف سليمة.. وبدات العلاج.. قالي منكدبش عليك حالتها صعيبة بزاف.. والجديد انها بدات كتبكي وتغوت بلا متحس.. كتبكي بالجهد .. قلتله عمرنا ما شفناها كتغوت بالعكس هي ديما حسها مقطوع.. قال بللي هاد الغوات حسن ليها فهاد الحالة باش تخرج هاد الطاقة السلبية اللي فيها..
خرجت من تما وانا مأزمة.. مسكينة سليمة مكتستاهلش هادشي اللي كيوقع ليها .. مشيت للخدمة دوزت نهاري كالعادة.. مشيت للدار من بعد لقيت البنات كيختارو فالثوب اللي صبفط ليهم وليد باش تخيط ابتسام دهاز ديال لبنى.. ولقيت الخطاب صيفطو حوايج وكادوات.. زوينين .. اقترحت على البنات نخرجو نتسخرو ونشريو حوايج اللي غتحتاج لبنى.. فعلا داكشي اللي درنا.. وليد مكانش عندو مانع.. مشينا بعدما قلناها لخديجة اللي لحقت علينا ...تسارينا القيساريات كلها وشرينا لبنى شوميزات دو نوي والكريمات والكساوي.. وكل ما كتحتاج العروسة.. ومشينا اتافقنا مع النكافة اللي غتصاوب ليها.. البنات كانو فرحانات بالخرجة.. جينا للدار ورجلينا طايبين بالدوران.. لقينا وليد كيستنا ..
وليد: تسرحو ليكم الرجلين.. فاين كنتو حتالهاد الساعة..
هدى: شي كاس دالما .. عيينا .. مازال غنرجعو غدا.. مالك عروسة خاصها بزاف الحوايج غا نتا معندكش تجربة..
وليد: ياك الالة .. ايوا شنو بانليك نجربو..
هدى: معامن😡
وليد: بنت الحاج ..
مازال مكمل هضرتو حتى طرت عليه كنشنق عليه اينا حاج؟
وليد: الحاج .. باباك ياك حج مسكين..
بداو كلشي كيضحكو... ههه غيسطيني ..
المغيارة..
داز النهار زوين وجات معانا للدار حتى خديجة.. تجمعنا بعد العشا كلنا فبيت لبنى كتقيش شنو شرات.. وبدينا نسولوها على شي حوايج +18هه وكتعاودلينا قالتلينا راه كتقتل الحاج بهاد الكساوي وبالشطيح حتى كيسخف وكينعس وعمرو مكمل معاها القصارة.. بقينا كنضحكو.. قالت باللي مكيقدرش يرفض ليها طلب وهي دايرا عليهم باطرون فداك الدار حيت الشارف فيديها وكيشري ليها مابغات وكيغرقها بالدهب والفلوس.. وليني هاد خديجة طاحت فداكشي اللي بغات..
دازو ايام وفاطمة الزهراء كتتبع العلاج ديالها وسليمة كدوز بمرحلة صعيبة وممنوع علينا نشوفوها.. وابتسام كتخيط الدهاز لختها وانا وليد الحب كيكبر بنا .. وصل نهار العرس وجدنا احلى عروس ومريم وجدات احلى الاكلات لعرس ختها لي صالاد واللحم بالبرقوق.. والحلوى.. هي فنانة بمعنى الكلمة.. الطبخ تفنات فيه.. كلشي لبستا التكاشط وجبنا السربايات.. بداو يسربيو الماكلة وكل من كلاها من الرجال والنسا كيسول شكون صوب هاد الماكلة فعلا كانت كتحمق.. كنجاوبو حنا بالشاف مريم.. كلشي حماقو على الماكلة.. خرجات لالة لعروسة كانت كتبان بحال القمر .. كتحمق.. كلشي تبهر فيها .. شطحنا ودردكنا.. جاو عائلة وليد.. بنات عماماته وعمامه.. اول مرة كنعرف باللي كل وحدة فيهم حاطة عينها على وليد.. بقيت حاضياهم غا هما
0 Commentaires