الجزء 17
كلشي سالا وفعمضة عين.. رجعت مع وليد باش ناخد حوايجي .. فالطريق قالي راه شديتلك واحد الدار .. قريبة من هنا سكتت ومجاوبتوش.. وكنت حريصة اني منبينش ضعفي واحتياجي ليه.. كبريائي مكيسمحليش.. جمعت حوايجي ووصلني لديك الدار.. ومشا.. درت دورة فالدار لقيت فيها كل ما نحتاج.. فوقاش دار هادشي معرفتش .. احتمال واحد هو انه كان كيفكر فالطلاق من شحال هادي.. وبدا كيوجدليه.. حطيت حوايجي .. وحريت للي نحتاج.. ومشيت لدار با .. شديت الكار على اني نرجع مللي يستدعيوني فالمحكمة.. نكمل قضيتي مع الحيوان الي ميتسماش.. مشيت للدار واستقبلوني بالدموع.. وقفو معايا عائلتي وساندوني معنويا .. هادشي اللي كنت محتاجة .. حتى واحد فالدنيا ميقدر يحس بيك قد باباك وماماك.. هما اللي يستحقو التضحية فقط.. هما اللي يقدرو يموتو على قبلك.. اما شي اخور لا.. مهما سمعتي من كلمات ومن اشعار .. حتى الحب ميقدر يغلب انانية الانسان... تأليف دودي
بقيت فالدار وانا كنحاول نستوعب داكشي اللي وقع .. من نهار دخلت لدار وليد .. كاع داكشي للي درت لخواتاته.. حبي ليه.. زواجي منه.. واخيرا طلاقي منه.. واش كنت كنحلم.. هادشي كله خلاني نعيد حساباتي.. واش وليد فعلا بغاني.. ولا كيف كتقول ماما تزوجني باش يثبت لراسو انه ماشي رجعي وباش يبان فالمجتمع انه تزوج طبيبة.. ونهار اللي طحت طلقني.. تفسير منطقي.. ولكن داك الحب اللي كنت كنشوف فعينيه وضعفه معايا.. واش صحيح انه طلقني حيت خاف على سمعته ولا حيت شاك فيا اني على علاقة مع الزمر ..هاد الساعة معارفة والو من غير اني ندمت حيت تزوجت بيه.. ندمت على كل لحظة معاه .. لانه باعني بارخص ثمن وبسهولة.. وفأول امتحان ليه معايا .. سقط فيه..
وصل نهار المحاكمة.. شديت الطريق للدار الجديدة ووجدت نفسيتي واني مغنفاعلش مهما كان.. حضرت الجلسة وليد محضرش مع انه عارف وقتها والمحامي ديالي ترافع وقدم تقرير الطبيب الشرعي اللي اكد ان الدكتور فعلا حاول يتعدا عليا .. ولكن لم يتم الاغتصاب الكامل.. محامي المتهم حاول يتماطل ولكن القاضي اقتنع ان المتهم مذنب .. فحكم عليه بسنتين سجنا نافذا وتعويض يقدم للضحية .. انا محملتش راسي ديك الساعة .. باش غتنفعني انا عامين.. واش القانون كيحمي المرأة هاكا.. تعصبت بزاف وخرجت ومشيت للدار وراسي غينفجر.. الكونجي مازال ماسالا .. ديك الساعة مشيت رجعت لدار با .. اش غنبقا ندير هنا.. مشيت حتى سالا الكونجي رجعت للخدمة.. محاملا حتى واحد وكلشي كيتفادا التعامل معايا.. الجريدة اللي رفعت القضية عليها بدات كتحاول دير الصلح وتنشر اخبار فصالحي .. انا متمسكة بحقي في القضية .. مابقيت كنتيق فحتى واحد .. اللي عطيتو قلبي وحياتي باعني فلحظة لاش غانتيق فحد اخور مازال.. بقيت خدامة وشادة تيقاري.. واحد النهار كنت فالدار حتا جاني ميساج من البنك باللي تم تحويل مبلغ لحسابي .. من حساب وليد.. تجاهلته وحلفت منقيس الفلوس اللي غيبقا يصيفط لي
18
واحد النهار كنت فالسبيطار خدامة والوحم صعيب .. دايزة عليا كحلة.. جات عندي ابتسام..
- كيبقيتي اصحيبتي ..
- كما كتشوفي .. كيدارت خلاتك ماماك تخرجي..
- وليد هو اللي قنعها..
- وليد.. مزيان وانتي كيدايرا ..
- انا مزيانة جيت نديك معايا تشوفي المشروع ديالي.. انا عمري ننسى الفضل ديالك عليا. واخا يكون العالم كله ضدك انا نكون معاك.. حيت نتي اللي رجعتينا نعيشو بعدما كنا ميتين..
- نتي بنت اصل وقلبك كبير.. انا نسالي الخدمة نجي معاك..
- واخا انا غنستناك..
كملت الخدمة ومشيت مع ابتسام.. وراتلي الورشة ديالها.. هادشي زوين بزاف.. قوليلي ابتسام.. واش مستعدة تكملي على هاد الشكل ..
- انا فيا طاقة كبيرة.. كنستنى غا الفرصة..
- انا غانعطيك واحد الفرصة.. وخاصك تستغليها.. غادي نتصل بابن عمي فطنجة عندو شركة كبيرة دالتكستل وغادي نطلب منه يضمنك باش تديري عرض باسم الشركة ديالو وباسمك من جهة غيتشهر اسمك ومن جهة غيربح هو.. وانا متأكدة انك غتنجحي..
- شكرا بزاف اهدى عمري ننسى ليك هاد الخير..
بقينا كنهضرو وسولتها على مريم .. قالتلي راه رجعات لدارها .. وفتحات المطعم.. فرحتليها مع انها دارت معايا العيب ومطمرش فيها الخير بحال ابتسام.. وطلبت منها يجيو هي وفرح وسليمة عندي للدار.. وافقت فورا..
- مبغيتيش تسوليني هلى شي حد اخور..
- شي حد؟ لا .. اه
- من قبيلة وانا كنقرا فعينيك سؤال على وليد.. وكنشوف التردد فيهم..
- اش كيدير.. لاباس عليه..
- يمكن يكون لاباس.. هو مكيجلسش معانا بزاف بحال قبل.. ولكن كاين خبر ماشي حتى لتما خاصك تعرفيه.. احسن ما تعرفيه من شي حد اخور..
- وليد جراتله شي حاجة؟؟
- وليد.. غيتزوج..
- كيفاش؟؟
- كما سمعتي .. الواليدة مشات خطباتله بنت خالتي فالعروبية!! وكتوجد باش يديرو العرس السيمانة الجاية..
- وهو موافق؟
- هو اللي طلب منها تخطبلو للي بغات..
- الله يكمل ليه.. ابتسام انا خاصني نمشي .. عيانة والوحم صعيب بزاف.. غنستناكم نتي والبنات واخا؟؟
- واخا بالسلامة..
0 Commentaires