اخو البنات -الفصل الثاني - الحلقة 11

الجزء 15
مشينا للدار وانا قلبي شاعلة فيه العافية.. علاش مفرحش واش مبقاش باغيني نحمل منو.. علاش هاد البرود فعلاقتنا.. 
- وليد .. هضر معايا.. مالك قول .. 
- بقينا عام مع بعض.. علاش حملتي فهاد الوقت بالذات.. 
- هه شنو كتقصد.. 
- علاش نفاعلتي مللي قال المحامي ديال الطبيب ديك الهضرة.. واش صحابليك مكنفهمش .. السيد كان تايق فراسو مزيان.. الانسان اللي بريئ ومداير والو كيكون تايق فراسو .. 
- وليد.. اش هادشي كنسمع.. 
- هدى .. انا عييت .. ومكنستاهلش منك هادشي.. انا تحديت العالم على قبلك.. ونتي باش جازيتيني.. بالفضيحة.. شكون غيتيق دابا باللي الولد اللي فكرشك مني.. خصوصا الى ربح الزمر القضية.. طيحتي كرامتي فالارض.. 
- طيحت كرامتك فالارض..؟ وليد.. انا صدمة حياتي خديتها منك نتا.. 
ناض كما العادة وانسحب من النقاش.. شنو ذنبي.. المرا ديما كتكون مذنبة.. اشمن حقوق.. اشمن والمرا مازال تعتبر عيب.. شنو الفرق بينا وبين العصر الجاهلي.. هما كانو كيدفنو البنات فمرة .. وهادو كيدفنوهم طول حياتهم.. 
ولدي.. انا اسفة حيت غنولدك فدنيا خايبة بزاف فحال هادي.. خايفة من داكشي اللي غيوقع من بعد.. الغد ليه كنت ناعسة حتى كنسمع الحاجة كتغوت.. الفضيحة العائلة كلها فخبارها بفضيحتنا .. هادشي اللي بقا لينا انا من الاول مكنتش موافقة على هاد الزواج.. من الاول.. هادشي اللي جانا من الخدمة دالعيالات.. مبغيتش شي وحدة تخرج كلكم غتجلسو فالدار حتى وحدة مغتخرج.. مللي خرجت لقيت مريم مع ماماها كتبكي .. جات تدابز معايا وتقول نتي سبابي عائلة راجلي جراو عليا من الدار وغيطلقوني بسبابك نتي .. منك لله اهدى.. الله ياخد فيك الحق.. بقيت مصدومة.. دخلت لبيتي دغيا وسديت عليا.. الحال غا زايد كيخسر.. هادي واحد الضحية.. مريم شنو ذنبها فحاجة وقعاتلي انا.. بقيت مكمشة.. جات عندي سليمة.. خفت لتقدابز معايا حتى هي وتقولي راكي خسرتيلينا حياتنا.. وشوهتينا ما فيا ميسمع شي حاجة اخرى.. 
- هدى.. صبري احبيبة كلشي هادشي غايدوز.. انا مكرهتش نقتل رجال الدنيا كلهم.. ها شنو كيجينا منهم.. متستسلميش.. ومتحشميش من راسك نتي مرا وقدوة.. انا تعلمت منك القوة.. عفاك خليك واقفة على رجليك.. واللي بغا يقول شي حاجة يقولها.. مكيهمش واللي باعك بيعيه.. هو اللي خسرك.. واياك تستسلمي على قبل هاد الضغط اللي دايرين عليك.. ومتلغيش شخصيتك على قبل المجتمع.. وقفي وهادا الوقت اللي نقولو فيه باراكة.. حتى لفوقاش حنى غنموتو حتى لفوقاش نسكتو.. 
عنقتها بالجهد .. سليمة انا فرحانة حيت كنسمع منك هاد الهضرة.. كنواعدك مغنسكتش .. وغنجيب حقي..

الجزء 16 
اتصلت بالمحامي واصريت نتمسك بحقي فالقضية.. انا تعرضت لاعتداء من داك الشخص.. ولازم ناخد حقي .. فالعشية جا وليد.. شفتو مكانش هو هداك .. غادي وجاي.. مبغيتش نهضر معاه انا غناخد حقي ومغيهمنيش وضروري نغيرو هاد التفكير السلبي اللي كيحكم على المرا انها تدفن راسها حيت هي ضحية.. جا عندي وقال.. 
- هدى خاص نهضر معاك.. 
- شنو كاين.. 
- انا .. حنا.. 
- هضر شنو كاين.. 
- حنا خاصنا نتفارقو.. زواجنا من اللول كان غلطة.. انا وياك مختلفين بزاف.. وممتناسبينش .. حاولنا ولكن منجحناش.. الحب ماشي هو كلشي.. سمحيلي بزاف ولكن انا منقدرش نستمر معاك.. حنا غنطلقو.. وكل واحد يعيش حياته .. واخا عمري مغننساك.. وغنتعدب وانا بعيد عليك.. ولكن .. انا كنتعدب وانا معاك.. اهون عليا نبعد.. مبقيتش قادر.. 
انا كنسمع هضرتو وكنشوف فيه... والمفاجئة انه حتى دمعة وحدة منزلات من عيني .. قمة القوة.. عندو الحق حبنا غلطة وزواجنا اكبر غلطة .. حنا تسرعنا فالزواج باسم الحب.. لا انكر اني كنت مستعدة ننسى كلشي لوكان رجع وضمني.. ولكن ايضا منقدرش نزيد معاه وهو بايعني... 
- مزيان.. كما بغيتي اوليد.. كنتمنى ليك السعادة .. 
- حنى غنمشيو نطلقو ومتخافيش كلشي غايكون كما بغيتي .. النفقة وحقوقك كلها غتاخديها واكتر.. وانا مستعد نصرف عليك حتى بعد الطلاق .. وولدنا حتى هو.. غنصرف عليه وغانشري ليكم دار فين تسكنو.. غتكونو فحمايتي.. 
انا بقيت غا كنشوف ومنطقت بحتى كلمة.. هادشي صعيب ولكن معرفتش منين جاتني ديك القوة.. انا نسمع هادشي من اللي كان فيوم من الايام كيقولي الموت هي اللي غتفارقنا.. واخا يوقع اللي يوقع ميمكنش نتخلا عليك.. من اللي كان كيخاف اني نسمح فيه .. اللي كيقولك انا عمري نتخلا عليك هو اول واحد كيتخلا وكيبيعك .. وبالرخيص.. كمل كلامه وقال.. 
- انا غنتصل بالمحامي نقولو يدير الاجراءات وغدا الصباح وجدي راسك نمشيو .. تأليف دودي
ناض ومشا .. مشفتوش من تما النهار كامل وحتى بالليل ماباتش حدايا.. بديت نضحك .. 
شحال كنحلمو.. غريبة الدنيا بزاف.. الانسان يقولينا كلمة زوينة نتيقوها.. ونعيشو فالاحلام.. اتصلت بماما وقلت ليها انا غنجي للدار.. بدات كتنوح وانا نسكتها وغوتت عليها .. الله يسمحلي ولكن انا اللي حالتي خايبة ومخاصش تكمل عليا.. جمعت حوايجي كلهم.. ومخليت والو.. الغد ليه بكري .. لقيت وليد كيستناني .. عيني مطلعهاش فيا.. مشينا وطلقنا.. وعطاني واحد الالتزام بانه غيتكفل بالمصاربف ديالي وديال الولد.. انا مكانتش كتهمني ديك الورقة ابدا.. باش غتنفعني.. انا متأكدة لوكنت شي وحدة اللي معندها شكون يصرف عليها مكان غيدير التزام ولا والو .. كلشي كيمشي بالعكس.. انا حيت ممحتاجاش وبرزقي وبالخلصة ديالي .. هه الدنيا فشكل...