19
مشيت للدار وانا حاسة بدموعي شلال.. نكدب الا قلت راني قدرت نصبر على هادشي.. غاتاخد فراشي وحدة اخرى.. وغتعيش معاه.. غايأسس حياة جديدة.. نساني بسهولة.. بقيت كنبكي بلا منحس.. بكيت الليل كامل .. حتى نشفو دموعي.. ولكن دموع القلب مازال.. حسيت بحريق كأن ابني كيعطيني رسالة بأني نكون قوية ومنخلي اي واحد فالدنيا يقلقني.. كنواعدك اولدي.. كنواعدك انه اخر دمعة تنزل من عيني هي هادي.. اخر مرة نبكي على وليد.. من هنا الفوق غنكون قوية بزاف ومغنسمح لحتى واحد يجرحني.. غنكون قوية على ودك اولدي.. كنواعدك
الغد ليه اتصلت بطبيبة نسائية كنعرفها.. ودرت موعد معاها .. وفعلا طلبات مني نمشي عندها للعيادة .. دخلت وجلست نستنى .. شفت نساء جاو مع رجالهم.. كل وحدة مع واحد.. والسعادة كتبان فوجههم.. ناض واحد السيدة تدخل وانا كنراقبها.. زوجها كان حريص عليها.. وشاد فيها .. وكيعاملها بلطف .. انا لوكنت مع وليد .. اكيد كان غيديرلي هاكا.. ولا اكتر.. دابا راني بوحدي وجاية ندير الكنترول بوحدي.. بحال شي وحدة معندها حد فالدنيا..شحال كنت كنستنى هاد اللحظة.. وليد تخلا عليا ومعمرو فكر حتى انه يطمئن على الحمل ديالي او يشوف صورة البيبي.. مكانش مهتم ابدا.. وليد وليد.. صافي خاصني ننساه.. ونعيش حياتي كما اختار هو حياته..
- مدام هدى تفضلي ..
نضت ودخلت.. وفحصاتني الطبيبة ولقات كلشي هو هداك وعطاتني صورة عيوني .. طلبت منها تشوفلي جنسه.. كان ولد.. عمري انا.. حبيب ماماه.. فرحت بزاف.. مشيت للدار بقيت كنشوف داك الصورة ديال ايكوغرافي.. ولدي ما احلاك..
اتصلت فابتسام وعاودتليها كلشي وحلفتها ما تقول والو لوليد.. واعداتني .. وقالتلي راه حددو يوم الاثنين يديرو فيه العرس.. صدماتني بهادشي.. سكتت وبدلت الموضوع .. قالتلي راه بغاو يجيو عندي وباللي فرح عندها شي موضوع بغات تستشرني فيه.. قلتليهم مرحبا.. الغد ليه جاو عندي..
سليمة : هدى انا راني معاك ..
ابتسام: كلنا معاها.. هدى ختنا واللي يمسها يمسنا
فرح: هدى.. بلاصتك بقات خاوية..
هدى: متخافيش نهار الاثنين تعمار..
فرح : حتى وحدة فالدنيا مغتقدر تعمر بلاصتك..
هدى: خلينا من هادشي قوليلي .. فخباري بغيتي تهضري معايا فشي حاجة..
فرح: اه واخا الوقت غير مناسب ولكن.. بغيت نقوليك باللي كاين واحد الاستاذ بغا يتزوج بيا.. وبغيت ناخذ رأيك..
هدى: لوكان الخوخ يداوي كون داوا راسه.. مقدرتش ننصح راسي ونختار اختيار صائب .. كنظن ماشي انا الانسان المناسب اللي تاخدي رأيه
الجزء 20
هدى: ابتسام عندي ليك خبار زوينة..
ابتسام : فرحيني ..
هدى: انا هضرت مع السيد اللي قلت ليك..وغايجي هنا يشوف تصاميمك ويكون خير..
ابتسام: معرفتش كفاش غنرد ليك هاد الخير اللي كديري معايا..
هدى: ياك قلنا حنا خواتات..
دوزنا نهار زوين.. متدخلتش مع فرح فزواجها حيت كيما قلت لوكان الخوخ يداوي كون داوى راسو.. مشاو وانا بقيت كل يوم كنحسب ومبغيتش يوصل يوم الاثنين.. خسارة والف خسارة.. مجتمعنا خايب بزاف وكيحكم على المرأة بالاعدام.. واخا تكون ضحية.. وصل يوم الاثنين وانا كنستنا يجي عندي وليد يقولي راني مغنتزوجش وبغيت نرجع انا وانتي من جديد.. مجاش.. قررت نمشي نشوف شديت طاكسي ووقفتو بعيد على الدار.. كيبانلي الناس داخلين وخارجين .. فعلا الدار باينة فيها عرس.. قلت لمول الطاكسي يستنى معايا شوية وانا غنخلصو.. بقيت كنشوف بزاف .. شوية بانلي وليد خارج للباب لابس جلابة بيضة.. عريس بمعنى الكلمة.. محسيتش براسي حتى نزلو دموعي.. السيد ناشط مع راسو .. وعايش الدور.. انا كنت مرحلة فحياتو ودازت.. نزوة.. مقديتش نصبر قلت للشيفور يديني.. مشيت للدار.. مباشرة لبيتي ونعست وعنقت المخدة.. غمضت عيني بالجهد كتبانلي غي صورته.. صافي صافي كلشي سالا.. من اليوم وليد ميت بالنسبة لي.. داز شريط زواجنا قدام عيني.. كلشي وكل لحظة.. كلشي كأنه لم يكن .. كلشي كدوب.. نعست بزاز.. واسترخيت.. وزيرت على المخدة.. داز ليلي اسود.. الصباح نضت مشيت للخدمة.. محاملة حتى واحد.. بانتلي واحد البنت جابوها..جابها راجلها.. مشيت ندوز عليها .. كانت عيانة بزاف.. وكتنزف بالدم..
- شكون اللي دار ليك هادشي..
- راجلي.. عفاك انا عييت.. هو عنيف معايا بزاف .. حتى فالفراش .. وكيضربني..
- وشنو اللي مصبرك على هادشي.. طلبي الطلاق..
- مبغاوش عائلتي كيقولولي واش باغا تفضحينا.. الطلاق ممنوع.. شنو الفايدة من انه يسكني فقصر ويعاملني هاكا.. انا حاسة راسي بحال شي حيوان معاه.. غا منيكة كيلعب بها كيف بغا..
- اسيدي فضحي عائيلتك احسن ما تموتي على قبلهم..
خرجت عندو بلا منحس وانا ديجا عامرة من الرجال ومحاملة فيهم الشعرة.. صبنت الجدارة ديالو مخليتش فيه.. هو بقا غا يشوف مقدرش يهضر.. يالحيوان واش صحابليك البنت شريتيها بفلوسك.. واش معندك قلب الكلب .. كلكم كلاب كلكم بحال بحال.. بقيت كنغوت والفرمايات شاديني عليه حسيت بقوتي فشلات عليا وانا نشد فوحدة منهم جلستني وعبراتلي الطونسيو..
0 Commentaires