الجزء 19
مللي جات ابتسام وشافت ختها اش كادير عجبها الحال .. واستغليت الفرصة نجبدها .. وانتي ابتسام اش كيعجبك ديري..
- انا كنحماق على الفنون كلها .. كنخيط كلشي وعرفتي .. كان واحد الدري عندو جيتارا كيعجبني نتفرج عليه من السرجم وكنتمنى تكون عندي الة موسيقية حتى انا .. ولكن وليد ميبغيش .. كنحلم ..
- علاش لا .. نتي الا كيعجبك الفن راه مكفرتيش .. وشنو كيعجبك عاود
- الرسم حتى هو ..
- وشنو هو حلمك ..
- حلمي نولي مصممة ازياء .. اللي بغيتي نخيطوليك
- انا نبقى نقلبليك على التصاميم الى بغيتي فالبيسي
- بالصح شكرا ليك بزاف.. كما عاوداتلينا فرح عليك .. قلبك ابيض وباغا تعاونينا ...
- كتقراو شوية مع فرح؟ القراية راه ضرورية
- اه كتوريلنا
- مزيان وانا غنحاول نقنع وليد يخليكم تمشيو امراكز محو الامية
- شكرا بزاف اختي ..
بالليل وصل سي السيد .. مشينا نتعشاو وكان كيتفادا الهضرة معايا.. شوية قلتله
- السي وليد .. ممكن نهضر معاك فحاجة مهمة كتخص البنات .. مور العشا
تخلع وارتبك وقال .. واخا
مللي كملنا العشا .. ناض وتبعتو للصالون .. قالي تفضلي
- السي وليد كما كنعرف نتا قريتي وعارف شناهيا القراية .. البنات حتى وحدة فيهم مكتعرف حتى حرف وحنا فواحد الزمان اللي القراية فيها مهمة بزاف .. لذلك بغيتك تخليهم يمشيو لمركز محو الامية .. وانا غنديهم .. وغنرجعهم.. وحتى الحاجة غتمشي
دار واحد الضحكة صفرا .. وقال.. فاش غتنفعهم القراية واش غيتخرجو دكتورات ولا
- القراية ماشي خدمة.. القراية نور .. يقدرو يقراو القران يقدرو يقراو الكتوبة ..
- الخروج لا .. الا هازاك النفس عليهم .. قريهم نتي .. البنات مغيخرجو من هنا الا على ديورهم ولا على قبورهم .. وننبغيش تجبدي معايا هاد الهضرة مرة اخرى
خلاني وناض خرج .. مشا لبيتو نضت لقيت البنات كانو كيتصنتو علينا كلهم.. وفوجههم علامة اليأس حيت رفض وحيت كنت نقطة امل ليهم شفت فيهم قلتليهم عندكم غرض تقراو .. جاوبوني كلهم بحزن باه.. قلتليهم ولا عليكم .. غتقراو بزاز على وليد ...
الغد ليهم مخدمتش .. خرجت الصباح بكري .. كانت عندي مفاجئة للبنات .. مللي جيت دخلت وعيطت عليهم .. البنات انا جبت معايا ضيفة .. جاو يشوفو شكون
-كنقدم ليكم الاستاذة سارة .. غتقريكم هنا فالدار يوميا وبلا ميعرف وليد .. فرحو بزاف وحتى الحاجة .. جبت ليهم الادوات اللي يحتاجو.. وحتى السبورة.. بداو الدرس وكانو مركزين بزاف وعاونو الاستاذة بزاف.. انا كنت مستعدة نخلص اللي كان باش نشوف فيهم هاد الحماس اللي شايفاه دابا
0 Commentaires