الجزء 17
مشيت للخدمة وانا مشطونة على البنات .. كنفكر دابا هادو ماقاريينش طبيعي يكون تفكير ديالهم سلبي .. والمشكل الاكبر ان حياتهم ماشي مهمة.. مالاحظت اي خوف فعيون وليد على ختو وهي كتقطع قدامه .. هادا انسان ولا شنو بفف .. دوزت نهاري وانا هاد العائلة شاغلة بالي .. خديجة اللي متغطرسة.. ولا فرح اللي باغا تقرا.. ولا مريم اللي باغا تتزوج وكتجرب فراسها العجب.. خرجت من الخدمة.. ومشيت للمكتبة شريت شي كتيبات لتعلم الكتابة والقراءة .. باش تتعلم فيهم فرح.. مشيت للدار وعطيتهوم ليها فرحات بزاف بيهم.. دزت عند مريم نطمئن عليها واش شربات دواها
- زين كبقيتي
- الحمد لله مزيانة
- قوليلي علاش شاكة باللي عندك شي توكال ولا سحر
- واكلشي باين.. واش انا خايبة.. واش فيا شي ديفو .. علاش مكيبغيوش يتزوجوني الرجال
- نتي عارفة راسك مافيك حتى ديفو.. يعني الديفو فالرجال.. علاش مفكرتيش فهادي
شوفي امريم.. الحياة ماشي غا الشقا والتخمال .. والحياة ماشي غا زواج.. عيشي لراسك الحياة فيها بزاف مايدار .. علاش متجربيش تقراي.. علاش متجربيش تتعلمي شي صنعة.. الحلويات والطبخ مثلا علاش لا فالمستقبل تفتحي شي ريسطورون ديالك..
- بعيد هادشي بزاااااف.. مستحيل
- حتى حاجة مامستحيلة فهاد الدنيا.. حتى حاجة..
- وليد مغيعطينيش فرصة انا عارفة هو كيتحكم فينا كما بغا
- وليد .. خليه عليا انا .. شنو رأيك نبداو انا غنبقا نخليلك البيسي تشوفي فيه وصفات وتجربيهم.. مزيان حتى تتعلمي .. ونتي تبارك الله حادكة ومغيصعابش عليك هادشي
- واخا موافقة ..
- مزيان .. ديك الساعة الى خصاتك شي حاجة من برا غنجيبهالك
- هدى.. شكرا بزاف .. عمري مغنتسى وقفتك معايا ..
- هادا واجب 😇
نضت من عند مريم ومشيت لبيتي .. مع العشا مشيت نتعشا .. كلشي جلس والسكات كما العادة وهو يهدر وليد : فين هي مريم
انا: مريم مازال خاصها شوية ترتاح .. راها مريضة
وليد: التبوحيط كيداير
انا: المرض مخطا حتى واحد السي وليد وبحال والو تكون فبلاصتها حتى نتا
الحاجة: الله يحفظ ولدي... اش هاد الهضرة
انا : علاش الحاجة.. قلت شي عيب .. المرض حاجة عادية واي واحد كيمرض .. ولا وليد حيط ومكيمرضش
شاف فيا بواحد النظرة اللي لوكانو الشوفات كيقتلو اكيد كانت غتقتلني.. ناض من على الطبلة
الحاجة: كمل الماكلة اولدي فين نايض
وليد: تسداتلي الشهية 😒
بقيت شوية حتى انا ونضت مقدرتش ناكل.. مشيت لبيتي معرفتش داك الاحساس اللي حسيت شنو .. كرهت راسي فهاد اللحظة.. اش جابني لهاد الدار.. حسيت بالقهرة.. نعست وتكمشت باش نوض الصباح للخدمة .. الليل كامل وانا كنتقلب مقدرتش نشرح هاد الاحساس اللي حسيتو.. غريب بزاف
0 Commentaires