الجزء 14
نهاري وليلي ولا بحال بحال.. مكنتش كنستنى هادشي.. المحنة كتبين المعدن.. كتبين اللي كيبغيك واللي كيمتل عليك.. ياخوفي من اني نعرف شكون معايا وشكون ضدي يا خوفي نتصدم فشي واحد.. كما العادة جا وليد ومهضرش مشيت عندو ..
- مازال مصر تعاملني بحال المجرمة..
- اش بغيتي نصفق ليك.. ولا اللي يسوا واللي ميسواش كيهضر عليك قدامي.. ولا فظهري.. كلشي كيشمت فيا .. انا اللي كانت سيرتي بحال البلور فالسوق وحتى واحد مكان يقدر يهضر على شعرة فعائلتي خوتي كنت ساد عليهم وكلشي كان كيهضر علينا بالاصل الطيب.. كنت خايف يفضحوني خواتاتي صدقت مفضوح من شكون .. من مرتي.. عرضي .. اكثر نقطة حساسة فحياتي..
- وليد انا ممتيقاش هادشي اللي كنسمع .. يمكن كنحلم.. اكيد.. علاش نحشمو وحنا ضحايا.. علاش نخافو.. علاش.. فضحتك اوليد.. قلتيها مزيان مللي قلتيها..
ناض وخرج وخلاني كنبكي ومكملتش هضرتي..
- الله ياخد الحق .. حسبي الله ونعم الوكيل..
مقادراش حتى نفكر او نتوقع من وليد يتخلا عليا.. اكيد هادشي غايدوز.. وغيجي يقولي جبيبة انا راني معاك.. عمري مغنتخلا عليك.. وصلت لواحد المرحلة اللي مقدرتش نتنفس بها .. عيوني طابو بالدموع والماكلة مبقيتش كناكلها.. جاني احساس بالردان .. نضت دغيا للطواليت كنحاول نرد .. كرشي خاوية تماما من الماكلة.. كنحس بمصارني كيتعصرو.. حسيت قوتي فشلات عليا طاحولي وكابي وانا نطيح فالطواليت وغيبت..
حليت عيني لقيت راسي فالناموسية ومغطية ووليد حدايا.. قلبي فرح مللي لقيتو.. انا كنت عارفة باللي غير غضبان ولكن قلبو مازال معايا ومقدرش يشوفني بديك الحالة ويخليني.. سكتت ومهضرتش .. وحتى هو مهضرش .. حاولت ننعس.. دازت يوماين فالصمت.. جاني استدعاء من المحكمة مشيت ومشا معايا المحامي وحتى وليد.. داك الحيوان استفزني ذول الجلسة كان كيشوف فينا انا ووليد وكيضحك ضحكة استفزازية.. انا مبقيتش كنشوف فيه حيت بغيت نوض نشنق عليه.. ترافع المحامي ديالي .. ومن تما ناض المحامي ديالو..
- سيدي القاضي .. المدعية كتقول بأنها تعرضات لمحاولة اغتصاب من موكلي.. بغينا نسولو المدعية اش كانت كادير بالليل بوحدها مع موكلي مع انه ماشي دوامها.. حنا معندنا اي شاهد يثبت انه هو اللي تعدا عليا.. موكلي قال انها من راودته عن نفسها .. وقمشات راسها وغوتات وتعدات عليه بالضرب بالة حادة.. موكلي طبيب مشهور ميمكنش يغامر بالمستقبل ديالو.. وهي اللي عرضات عليها راسو وهو كإنسان مقدرش يقاومها ففعلت فعلتها .. بعدما خدات داكشي اللي بغات وخافت لا يفضحها ..لان علاقتهم قديمة..
مقدرتش نصبر على هاد المحامي اللي كيطعن فشرفي .. نضت وبديت كنغوت .. حسبي الله ونعم الوكيل .. هادشي كدوب كدوب.. محسيتش براسي حتى لقيت نفسي مغيبة من جديد. فقت ولكن هاد المرة فالمستشفى.. ووليد كان حدايا ولكن كيبعد نظراته عليا وساكت .. استغربت لهدوءو هنا وفالمحكمة.. خدا مني الطبيب عينة ديال الدم وانا جالسة وبقيت كنستنى .. دازت نص ساعة.. وجا قالي دكتورة هدى مبروك عليك راكي حاملة.. ابتسمت وهبطو دموعي.. شفت فوليد المفاجئة كانت اني شفت انسان مختلف تماما على اللي كان نهار كنت شاكة فحملي.. مادار حتى ردة فعل.. نزلو دموعي اكتر وقلتله ..
- وليد.. واش مفرحانش .. غايكون عندنا بيبي..
- خلينا نمشيو للدار..
0 Commentaires