الخطيئة- الحلقة الثامنة والثلاثون
تأليف دودي العيساتي
الموظف: عمر الخالدي .. عندك زيارة
عمر: 😠 شكون ..
الموظف : والديك 😏
ناض عمر وهو قالب وجهو .. شد فيه الموظف وداه لمكان الزيارة .. دخل لقا والديه .. ناضت امه كتبكي وعنقاتو ..
الضاوية: ولدي 😭😭 علاش اولدي علاش كدير هادشي فراسك ..
عمر: 😔
الضاوية: جلس اولدي .. قولي واش كتاكل ؟ كتنعس .. علاش هربتي اولدي علاش زايد على راسك المشاكل.. علااش اولدي علاش .. من ديما كنقوليك نهى ماشي ديالك .. وحلم على قدك .. هادوك الناس فين نوصلوهم .. دارو فينا خير خدمونا بارك الله فيهم علاش نطمعو فيهم..
عمر: عندك الحق امي .. عندك الحق ..
الضاوية: ضيعتي حياتك على قبل وهم .. عمرو مكان غايتحقق .. وحرقتي قلبي عليك ،،
المصطفى: ماشي وقت هاد الهضرة دابا .. بلا متأنييه .. صافي
الضاوية : قلبي معالم بيه الا الله .. ماشي عدل ولدي الوحيد يتلاح يكمل حياتو فالحبس ...
الموظف: الزيارة سااالات..
شد الموظف عمر وداه وبقات امه كتبكي موراه..
اما هو بقا غادي ومرفوع ورجعات بيه الذاكرة لفترة المراهقة .. نهار بقات نهى وعمر كيلعبو بالما ..
نهى: هههه متفزكنييش هههه
عمر: نتي اللي بديتي .. هاكي دابا هههه
حتى فزكو كلهم ..
نهى: ناري ليوما غادي تدابز معايا ماما،.
عمر: متخافيش اجي مورايا ..
دخلو للكوزينة من الباب اللوراني .. لقاو تما الضاوية..
الضاوية: 😳 اش هادشي ..
عمر: ماما تصرفي 😬
الضاوية: 😑
تصرفات الضاوية وعطات الحوايج لنهى تبدل
عمر: اتشو ..
الضاوية: سمعني اولدي .. نتا راك ولد الخدامة.. سمعتيني.. حنا معندنا والو.. انا الخلصة ديالي انا وباباك متجي مصروف نهار واحد ديال نهى.. حلم على قدك اولدي .. حلم على قدك باش ميجيش شي نهار اللي تلقا فيه راسك خاسر كلشي .. وبقيتي تابع وهم عمرو ميتحقق ..
دخل عمر للزنزانة .. وهو كيفكر ..
عمر: هاهو امي .. جا داك النهار اللي حذرتيني منه ..جا النهار 😓
جابت الخدامة لنهى الماكلة وفيقاتها ..
نهى: فين هاجر..
الخدامة: مشات الالة ..
بقات نهى كتاكل بزز عليها .. حتى سالات ..وهي ترجع عندها الخدامة ..
الخدامة: لالة نهى.. كاين واحد الراجل كيقلب عليك..
نهى: شكون هادا
الخدامة : معرفتوش ومقالش
نزلات نهى تشوف شكون ..
نهى: 😳 لؤي؟
لؤي : بنت عمي العزيييزة توحشتك
نهى: اش فكرك بيا .. مشفناك لا فموت والديا ولا فعرسي.. ولا فموت جدة وخويا ..
لؤي : شفتي شحال عندي الزهر كون جيت فعرسك كوراني دابا فالقبور هههه
نهى: 😏.. جلس..
لؤي : شكرا احبيبة ..
نهى: جيني من اللخر الؤي اش بغيتي
لؤي :(حط رجل على رجل) بغيت حقي ..
نهى: حقك؟
لؤي : حقي فميراث جدة .. وولد عمي ..
نهى: عاد تفكرتي باللي عندك جداك وعندك ولد عم .. 😠
لؤي: بلا هضرة بزاف .. انا عندي فهاد الفيلا بحالك.. وعندي فالاوطيل.. بغيتي ولا كرهتي
نهى: خرج براا .. خرج 😪
طاحت نهى بانفعالها .. وجابولها الطبيب
فاقت نهى ولقات راسها فبيتها وحداها الطبيب .. ولؤي والخدامة..
الطبيب : ممكن تخليوني معاها بوحدنا ..
خرجو كلهم فمرة وبقا الطبيب معاها
الطبيب : نهى.. انا مبغيتش نهضر حداهم .. نهى نتي حاملة ..
نهى: 😰 حاملة ؟ واش متأكد ..
الطبيب : اعراضك كلها كتدل على انك حاملة .. نهى انا قبل منكون طبيب انا صديق العائلة فاللول .. هضري معايا بصراحة .. شكون هو الاب ديال ولدك ..
نهى: متقول لحتى واحد هادشي عفاك
الطبيب : متخافيش ..
نهى: 😓
شوية خرج الطبيب ودخل لؤي
لؤي: على سلامة بنت عمي
نهى: خرج براااااا
لؤي : صافي هانا خارج .. غانمشي نجيب حوايجي .. مجاتش نخلي بنت عمي بوحدها فالدار وما معاهاش راجل.. see you later
نهى: كلب 😤
الخطيئة- الحلقة التاسعة والثلاثون
تأليف دودي العيساتي..
نهى: اش غاندير يا ربي .. المصائب لا تأتي فرادى.. ما حيلتي لهاد السخط اللي جا باش يورث معايا .. ما حيلتي للحمل.. اوووف كيفاش غابت على بالي هادي..كيفاش مدرتش احتياطاتي.. ولكن.. غا جوج دالمرات .. واش ممكن ؟ .. اوووف اش غاندير دابا ..
بقات نهى كنتناكر مع راسها حتى صونا ليها التلفون ..
نهى: الو.. هاجر
هاجر: حبيبة كيبقيتي ..
نهى: شوية وصاف.. جا داك الزفت دولد عمي .. لؤي كتعرفيه.. جا قالك عندو فالورث
هاجر: لا لا لا.. متقوليهاش.. وجا يسكن معاك؟
نهى: اه .. غانطرطق ..
هاجر: هانا غانجي عندك
نهى: عتقيني دغيا عفاك..
بعد لحظات دخلات هاجر للفيلا لقات لؤي مسرح رجليه فالفوتوي وكيتفرج التلفزة..
هاجر: هااي نتا.. اش كدير هنا .. واش هاد المستوى..
لؤي: شكون نتي .. واش عمي ولد شي بنت اخر وانا مفخباريش..
هاجر: انا هاجر.. صاحبة نهى..
لؤي : ااه صاحبة نهى.. ومالك داخلة كتغوتي فداري..
هاجر: دارك.. منين جاتك..
لؤي : انا غانفهك الزويونة.. انا وريث شرعي لولد عمي.. يعني عندي فهاد الفيلا .. وفالاوطيل .. وفالاراضي .. وزيد وزيد وزيد
هاجر: الله يحسن عوان نهى.. انا غانتاصل بحاتم .. هو اللي يتفاهم معاك ..
هزات هاجر تلفونها وبدات تصوني ..فنفس الوقت نزلات نهى ..
نهى: حبيبة .. 😗
لؤي : بنت عمي .. لاباس عليك.. كيبقيتي دابا .. اجي عندي بزاف منقولك..
نهى: 😑
هاجر: الو حاتم .. لاباس عليك،، ممكن تجي عندنا .. لدار نهى..
حاتم: اكيد.. هاني جاي
هاجر: متتعطلش عفاك..
لؤي: انهى.. اجي بغيت نهضر معاك فموضوع مهم.. اجي جلسي
نهى: كاين شي حاجة اهم من انك جيتي تستولي عليا
لؤي : هادا شرع الله ابنت عمي..
نهى: شنو بغيتي..
لؤي: بما اني وليت معاك شريك فكلشي .. اجي نتشاوكو حتى فالحياة ونتزوجو..
نهى: واش باغي تجيبلي شلل.. واش انا محاملاكش وباغي نتزوجك مازال..
لؤي: ايوا الى بغيتي نتشاركو فكلشي.. انا عو راجل الدار دابا
حاتم: شكون نتا واش كدير هنا ..
نهى: حاتم.. 😭
جرات عندو دغيا وهو كيتفحصها ..
حاتم: مالك .. اش دارليك 😰
لؤي: نتا اللي شكون .. واش دخلك بينا.. انا لؤي القايدي.. ولد عم نهى
حاتم: متشرفين. 😏
نهى: هادا خطيبي 😠
تفاجأ حاتم بهضرة نهى وبقا كيشوف فيا بصدمة..
لؤي: دغيا تخطبتي مضيعتيش الوقت ابنت عمي.. عموما مزيان باش تمشي لدارو ونرتاح فالفيلا ديال.. ونقدر نبيع حقي فيا ..
نهى: شنو تبيع .. مستحيل نسمحليك بهادشي..
حاتم: نهى تهدني .. انا غادي نحليك هاد المشكل
نهى: فكل بلاصة فالفيلا عندي ذكرى.. مستحيل نتحمل
حاتم: ياك نتي كتيقي فيا .. انا غادي نحليك المشكل.. متخافيش ..
وجه الكلام للؤي ..
حاتم: ممكن نمشيو نهضرو .. ونديرو شي كافي
لؤي : على الراس والعين 😬
خرج لؤي مع حاتم..
حاتم لنهى: غانرجع ليك احبيبة واخا؟
نهى: كنستناك..
خرجو وبقات هاجر معا نهى
هاجر: اش هادشي سمعت من امتا ..
نهى: مكانش عندي حل.. زواجي من حاتم هو اللي غايعتقني من بزاف الحوايج..
هاجر: بحالاش
نهى: ااا .. لؤي واللي بحالو.. انا دابا مابقالي حد ..
هاجر: عندك الحق.. حاتم راجل قوي .. وغايحميك
نهى: 😔
تأليف دودي العيساتي
الخطيئة- الحلقة الاربعون..
تأليف دودي العيساتي
بقات نهى مع هاجر فالفيلا حتى رجل حاتم..
حاتم: حبيبة..
نهى: شنو وقع فين هادك الملعوق..
حاتم: غايمشي بحالو ومعمرك غاتشوفيه ..
نهى: كيفاش.. اتافقت معاه يتنازلك على حقو فالورث مقابل مبلغ عمرو كان يحلم بيه .. وغايمشي للامارات تما غنخدمو فشركة واحد صاحبي .. عرض مغري بزاف..
نهى: نتا رائع.. 😍 كنحماق عليك..
حاتم: اش قلتي.. كتحماقي عليا.. ممتيقش راسي.. وو عاودي شنو قلتي قبيلة،.. نهى يعني نتي موافقة تتزوجي بيا..
نهى: فكرت مزيان.. نتا الرحيد اللي وقفتي بجنبي.. وكنتي صادق معايا.. بقا هنا غانرجع دابا..
طلعات نهى الفوق وبعد لحظات رجعات وهازا فيديها شي حاجة..
نهى: كنت واعدتك بواحد الهدية.. هاهي .. عربون موافقتي على زواجنا.. وحتا هاد البابيون ..
حاتم: نهى نتي بهرتيني.. فعلا انا اسعد واحد فالدنيا 😍 انا غادي نديرلك عرس اسطوري .. غادي..
نهى: لا.. عفاك .. انا معقدة ومرعوبة من العراسات.. غير حفلة صغيرة هنا فالفيلا،. كافية..
حاتم: كنواعدك عمرك تحسي بشي خوف ونتي معايا.. وغادي نسيك فكلشي .. كاع المصائب اللي دازت عليك،. غانسيهوملك.. غاتعيشي معايا ملكة وغانشريلك قصر..
نهى: غانسكنو هنا.. هاد الفيلا عزيزة عليا بزاف .. ومبغيتش نخسرها.. ولا نبعد عليها
حاتم: حبيبة نتي آمري وانا عليا نفذ..
هاجر: ياااه على عصافير الغرام.. شوقتوني نتزوج.. 😍
نهى: ههه ايوا هي الى ضبرتيلك على شي راجل..
حاتم: شكون غايديها فيها ههه
هاجر: يااك اسي حاتم.. واخا دابا تشوف..
نهى: هاجر لالة البنات ههه والف من يتمناها
حاتم: مقلت والو صافي هههه
نهى: هاكاك
حاتم: كنبغيك
نهى: حتى انا ..
حاتم: احسن كلمة سمعتها فحياتي.. انا فرحاان فرحان.. مكرهتش نغوت ونقول كنبغييييك
نهى: هههه صافي
حاتم: فوقاش نتزوجو..
نهى: مكرهتش من غدا ..
حاتم: انا ممتيقش راسي وأخييرا.. انا غانمشي نتافق مع العدول.. فأسرع وقت .. نتزوجو.. اكيد كنحلم..
نهى: لا مكتحلمش.. نتا فايق وانا باغا نتزوج بيك
حاتم: كنبغيييييك
بعد جلسة الغرام والحب بين نهى وحاتم .. واللي كانت هاجر المتفرج الوحيد فالمشهد.. مشاو وبقات نهى فالفيلا.. وبقات كتفكر..
نهى: اش هادشي كديريه انهى.. علاش بغيتي تتزوجي.. كان عليك تمشي من هنا وتمشي لاي بلاد فالعالم تهربي وتولدي ولدك وتربيه.. نتي وياه.. هاد الولد جاك من الله باش يقويك ويخليك تقدري تكملي حياتك.. مبقيتيش بوحدك فهاد الدنيا.. ولكن كيفاش غانولدو بلا اب.. ومللي يكبر .. ويسولني.. واش نقولو نتا ولد واحد مجرم.. لا .. انا غانبقى هنا ونتزوج حاتم.. ونقوليه باللي هادا ولده.. وغاياخد اسم راجل محترم.. ويفتخر بيه مع الناس.. عمر هاد الاسم غاننساه الى الابد.. الى الابد .. انا غانتزوج حاتم.. ونعيش حياتي اللي ضاعت خلاص..
تأليف دودي العيساتي
الخطيئة- الحلقة الواحدة والاربعون..
تأليف دودي العيساتي
خرج عمر للاستراحة فالسجن.. ومكايهضر مع حتى واحد .. حتى جا عندو محمد
محمد: اش رجعك هنا تاني اصاحبي ..
عمر: اهلا.. رجعني قلبي ..
محمد: خاصمنا شي جلسة باش تعاودلي بالتفاصيل اش وقع..
عمر: واخا..
بعد ايام وجدات نهى لحفلتها فالفيلا باش تتزوج بحاتم..اللي اتافقات معاه يسكنو فالفيلا بعد الزواج.. لبسات كسوة بيضة .. ودارت مكياج خفيف للعروس..
هاجر: تبارك الله على العروسة.. ولكن علاش وجهك صفر.. مالك ياكما مريضة..
نهى: انا خايفة بزاف .. مقادراش ننسى اش وقع ليا فالزواج اللول..
هاجر: نساي اصاحبتي.. دابا غاتبداي حياة جديدة..
نهى: كنتمنى.. نعيش حياة زوينة مع حاتم.. ولو اني متأكدة اني عمر مغانقدر ننسى..
هاجر: نوضي يالله .. حاتم كيستنى مع العدول..
نزلو نهى وهاجر .. واستقبلهم حاتم اللي كلن منبهر بنهى وجمالها..
حاتم: معمري فحياتي شفت شي وحدة بجمالك..
نهى: ☺️ خلينا نكتبو ..
حاتم:غاتكوني معايا اسعد وحدة فحياتك..
نهى: ربي يخليك ليا اراجلي العزيز..
حاتم: ويخليك ليا امرتي العزيزة..
كتبو العقد وبدات هاجر كتزغزت.. بداو يحتفلو ويفرقو الحلويات على الناس اللي جاو عندهم..
بعدما سالاو الحفلة.. ومشاو الناس ..طلعات نهى لبيتها باش تبدل حوايجها..
هاجر: يالله نخليكم دابا .. مغانكونش عزول..
حاتم: شكرا بزاف انهى حيت وقفتي معانا فهاد النهار..
هاجر: هادا واجبي .. نهى راها ختي
مشات هاجر .. وبقا حاتم مع نهى فالبيت..
حاتم: انا اسعد واحد فالدنيا..
نهى: حاتم ممكن نقولك واحد الحاجة..
حاتم: اكيد .. قولي ..
نهى: 😔 انا..انا ماشي فيغج .. انا درت علاقة مع امير قبل ما يموت ..
حاتم: 😅 ها!! ام حبيبة انا هاد الامور مكتهمنيش.. المهم عندي هو انك معايا دابا.. كنبغيك..
نهى: ربي يخليك ليا
دازت ليلة نهى وحاتم.. كأنهم كيعرفو بعض من زمان..فالصبح ناض حاتم .. وحط بجنب نهى باقة من الورد الاحمر.. وورقة مكتوب فيها "شكرا يا احلى حاجة وقعاتلي فحياتي..كنبغيك..انا غانوجدليك مفاجأة..مغانتعطلش😘"
حط الورقة حدا الورد وبدل حوايجو وخرج خلاها ناعسة... بعد ساعة فاقت نهى.. ولقات حداها الورد.. ضحتات وهزاتو تشم فيه.. بانت ليها الورقة وهزاتها .. قراتها وضحكات..
نهى: حاتم يا حاتم.. نتا رومانسي بزاف.. يمكن ربي كيعوضني بيك .. على المعاناة اللي شفتها فحياتي كلها.. شكرا بزاف ليك حيت نتا فحياتي.. انا خاصني ننسى كلشي.. وننسى الماضي ومنشوفش مورايا..
ناضت نهى ودخلات الدوش.. وهي فكامل نشاطها .. بعدما سالات الدوش خرجات وهي كتغني.. بدلات حوايجها ودارت الميكاب ديالها وصوبات شعرها.. شوية وهو يدخل حاتم..
حاتم: صباح العسل ..
نهى: حاتم فين مشيتي وخليتيني..
حاتم: 😘انا ديما حداك..
نهى: قولي شنو هي المفاجأة اللي وجدتي ليا
حاتم: اجي معايا...
مشات نهى مع حاتم.. ومافاهمة والو حتى وصل للمرسى..
نهى: فين غانمشيو
حاتم: ستناي.. 1.2.3 الي ..
سالا حاتم العد وفجأة طلعو شي بالونات من واحد اليخت... وسط تصفيقات شي ناس مكتعرفهمش...
نهى: 😍 وااو.. حاتم اش هادا
حاتم: بما ان حبيبتي مغانمشي معاها حتى لبلاصة باش نديرو شهر العسل.. قررت ندير لحبيبتي احلى دورة فالبحر بهاد اليخت هادا..ندوزو احلى عسل فيه..
نهى: حاتم .. نتا احلى راجل عرفتو فحياتي..
حاتم: غانعيشك احلى حياة احبيبة.. وغانسيك فكاع جروحك..
عنقاتو بالفرحة ..وطلعو بجوج لليخت ..دوزو فيه نهارهم وهما فرحانين..
فالحبس كان المصطفى والضاوية كيزورو عمر..
المصطفى: كيداير اولدي..
عمر: ايام كتشبه بعضها.. دايزة..
الضاوية: الله ياخد الحق فاللي لاحتك هنايا وعايشة حياتها وكتزوج
عمر: شكون اللي كتتزوج😳
المصطفى: سكتي ماشي وقت هاد الهضرة..
الضاوية: مغانسكتش.. باش يعرف علامن ضيع راسو..
عمر: هضري ..
الضاوية: نهى تزوجات البارح..
عمر: 😓 حاتم ياك..
الضاوية: الله ياخد فيها الحق..
عمر: عندك الحق.. الاغنياء كيتزوجو الاغنياء اللي بحالهم..
الضاوية: نساها اولدي نساها .. شوف المحامي قالينا راه ممكن يخرجوك الى احسنتي السلوك.. متديرش مشاكل فالحبس اولدي ..
عمر: يخرجوني !! 😏فوقاش بعد 15 عام مع حسن السلوك!.. وحتى لو خرجوني.. عند من غانخرج... خليني هنا حسن لي .. واريح لناس كتار...😒
فاليخت كان حاتم ونهى مستمتعين بالجو ديال البحر .. شوية بدات نهى كتدوخ...
حاتم: حياتي مالكي..
نهى: والو فيا الردان .. وشاداني الدوخة.. اكيد بسبب البحر..
حاتم: مكنتش عارف ان البحر كيدوخك.. واش باغا نرجعو..
نهى: اه الى بغيتي عفاك..
حاتم: واخا غانرجعو.. المهم هو تكوني مرتاحة..
رجعو للمرسى وحرجات نهى بسرعة مشات لواحد الجنب بدات كتتقيا ..
حاتم: حبيبة واش سافا..
نهى: اه.. باينة البحر اثر فيا...
حاتم: يالله نمشيو للدار تنعسي شوية.. وشربي شي كنينة ..
نهى: لا كنينة لا .. مكيعجبونيش.. انا غانعس وغانفيق نكون لاباس..
حاتم: واخا خلينا نمشيو..
ركبو نهى وحاتم.. وبقات نهى كتفكر..
نهى:"هاد الوحم غايفضحني.. شحال ما بقيت .. كيغاندير.. انا غانصبر 10 ايام.. نقوليه راني حاملة.. الله يدوز هاد الايام على خير"..
وصلو للفيلا ودخلو .. طلع حاتم نهى للبيت ونعسات وغطاها.. وخرج بعدها.. تأليف دودي العيساتي
0 Commentaires