الخطيئة- الحلقة العشرون
تأليف دودي العيساتي
بقاو كيستناو حتى جا القاضي اللي ينطق بالحكم
القاضي: بعد المداولة والادلة التي بين ايدينا خلصنا الى ان التهمة ثابتة في حق المتهم لذا حكمت المحكمة حضوريا على المتهم عمر الخالدي بالسجن مدى الحياة
حطات نهى يدها على قلبها وتصدمات مكانتش حاسة ان هاد الاحساس صعيب حتى لهاد الدرجة ناضت الضاوية كتبكي وتغوت فالمحكمة جات نهى تخرج وهي تسمع عمر
عمر: نهى انا بريئ انهى مقتلت حتى واحد انهى متيقيهمش عفاك متيقيهمش
جرو عمر وخرجات نهى بقات فقلبها غصة على قبل هادشي اللي وقع ،. مدى الحياة يعني غايدوز حياتو فالحبس
رشاد: لالة نهى ..
نهى : المؤبد اسي رشاد؟ هادشي علاياش تافقنا؟
رشاد: كنتأسف بزاف ولكن القضية من الاول كانت باينة نحمدو الله اللي متحكمش بالاعدام
نهى: وشنو الفرق .. دابا راه غايدوز حياتو فالحبس
رشاد: كنتأسف مرة اخرى .. انا درت اللي فجهدي خليتلك الراحة
نهى : راحة ؟ منين غاتجيني الراحة
صونا التلفون لنهى وجاوبات
هاجر: فينك انهى
نهى: شنو كاين
هاجر: حاتم قالب عليك الدنيا وتلفونك كان طافي
نهى: كنت فالمحكمة .. كنحضر لعمر
هاجر: ها وشنو
نهى: حكمو عليه بالمؤبد
هاجر: صافي؟ قليلة فحقو كانو عليهم يحكمو عليه بالاعدام في مكان عام
نهى: اش هاد الهضرة كتقولي سكتي سكتي اووف
طفات التلفون وركبات طوموبيلتها ومشات للشركة لقات حاتم قالب عليها الدنيا شافها وجرا عندها عنقها
حاتم : حبيبة فين كنتي تشطنت عليك
نهى: علاش اشنو كاين
حاتم: واش ماشي من حقي نخاف عليك؟
نهى: 😔 انا عيانة وبغيت نمشي للدار نهضرو من بعد
حاتم : نوصلك
نهى : لا عندي طوموبيلتي .. بالسلامة
مشات نهى للدار وهي مغمومة دخلات لبيتها ومهضرات مع تا واحد .. بقات كتفكر كيفاش حتى وصلات لهادشي واش هي السبب فهادشي .. علاش وكيفاش.. افكار تدور فعقلها اللي كان غاينفجر بالتفكير بقات هاكاك حتى الليل سمعات تلفونها كيصوني ناضت جاوبات
حاتم: واش مازال مغاترحمي هاد القلب ؟
نهى: لاباس عليك احاتم؟
حاتم: لا .. مادام كنشوفك هاكا مالاباس والو
نهى: علاش انا مالي؟
حاتم: عرفت باللي مشيتي للمحكمة وشهدتي لصالح عمر .. وقلبك الابيض هو اللي خلى حالتك تكون هاكا .. مغانعاتبكش ولكن بغيت هاد القلب الطيب يلتفت شوية حتى ليا انا .. اللي كنتعذب وكنموت فالتراب اللي كتمشاي عليه
نهى: انا ..
حاتم : نتي غاتنوضي تلبسي حوايجك دابا نجي نمشيو نتعشاو فأفخر مطعم وبدون اعذار
نهى: واخا ربع ساعة ونكون واجدة
حاتم : يخليلي هاد العمر
فالسجن كان عمر وصاحبو
محمد: صافي غاتغبر فالحبس
عمر: نهى متيقاني .. وعارفة اني مقتلتش
محمد: وباش يفيد هادشي
عمر: خاصني نخرج من هنا بأي طريقة .. انا خاصني نثبت ليها باللي مقتلتش
محمد: وكيفاش غاتثبت ليها
عمر: عقلتي على توري هاداك اللي فجناح المخدرات .. سمعتو كيهضر واحد المرة على الهروب .. فالطوموبيلات دالنظافة .. غانحاول نخرج من هنا غانحاول
محمد: الموضوع ماشي بهاد السهولة .. راك محبوس مور 7000 باب حديدي .. منظنش تقدر تخرج ابدا ..
عمر :😠
تأليف دودي العيساتي
: الخطيئة- الحلقة الواحدة والعشرون
تأليف دودي العيساتي
خرجو حاتم ونهى وتعشاو برا
حاتم: شنو ندير باش يبتسم هاد الزين
نهى: امم علاش مالي
حاتم: واش ملاحظتيش انك مغوبشة وماشي نوغمال
نهى: معرفتش
حاتم : نهى تتزوجي بيا؟
نهى : شنو؟
حاتم : انا عارف باللي هادشي جا فجأة وناشي بزاف باش عرفتك .. وعرفتيني .. ولكن مقادرش نصبر كتر من هادشي .. قلبي كيلح عليا نطلبها وممزروبش على الجواب بغيتك تاخدي راحتك فالتفكير
نهى: معرفتش
حاتم : عفاك خودي راحتك فالتفكير ونتمنى نتلقى جواب يريح قلبي
كملو العشا وناضو يمشيو بحالهم حتى وصلو للدار وتوادعو دخلات نهى لقات جداتها كتستناها
الجدة: بنتي
نهى: مازال فايقة اجدة
الجدة: كنستناك .. ها شنو كنتو كتهضرو
نهى: الصراحة 😔 حاتم طلب مني الزواج ليوما
الجدة: الحمد لله 😍 منظنش تلقاي شي واحد بحالو
نهى: الصراحة اجدة اول مرة كنكون مترددة هاكا .. خايفة نكون كنتسرع الى وافقت
الجدة: بنتي .. فين تلقاي بحالو راجل شارب عقلو وكبير ولاباس عليه هادي فرصة متتعوضش
نهى: منعرف اجدة كنظن انه خاصني ناخد وقتي فالتفكير .. وزايدون انا منقدرش نتزوج دابا وانا مازال متطمنت على رامي اللي مازال صغير وعليك اجدة لمن نخليك
الجدة: الى هادي هي العقبة الوحيدة شرطي عليه تعيشو هنا ومنه تولدولي ولاد يونسوني
نهى: ههه هادشي اللي بانلك ؟
الجدة: طبعا ههه وترجع لينا الفرحة اللي ضاعت منا 😢
نهى: يا ربي ترجع لينا الفرحة متبكيش اجدة عفاك
بقاو كيهضرو حتى دخل رامي ..
نهى: رامي
رامي : نعام
نهى: مالك ؟
رامي : مالي .. شنو فيا انا طالع لبيتي ننعس تصبح على خير
الجدة: مالك ابنتي
نهى: واش مشفتيش حالتو .. انا خاصني نجلس معاه نعرف مالو .. تحت عينيه كحل وضعاف حالتو مكتبشرش بالخير
الجدة: الله يحفظو هو صغير ومؤخرا مهتميناش بيه
نهى: انا غانطلع عنده نجلس معاه
الجدة: سيري ابنتي الله يرضي عليك
طلعات نهى ومشات عند خوها دقات عليه دخلات لقاتو ناعس
نهى: رامي نوض باغا نهضر معاك
رامي: خليني ننعس اختي عفاك انا عيان
نهى: نوض قولي مالك .. واش بغيتي نديك للطبيب .. غدا الصباح نمشيو للطبيب نشوفو مالك
رامي : انا ما فيا والو غا رتاحي
نهى: هضرة واحدة هي اللي كاينة غاتمشي معايا يعني غاتمشي
ناضت نهى ومشات لبيتها وبقات كتفكر فرامي اللي هملاتو بزاف حتى ولات حالتو حالة ..
الغد ليه فاقت نهى وهي مشطونة على خوها مشات عندو لقاتو ناعس بقات كتفيق فيه حلف لا يفيق لقات حاتم كيصوني ليها
حاتم: صباح الخير احبيبة
نهى: صباح النور
حاتم: كيدايرا
نهى: الصراحة ماشي مزيانة
حاتم: واش موضوعنا حتى لهاد الدرجة معصبك
نهى: لا لا لا .. ماشي هادشي غا خويا .. حالتو خايبة ومعجبانيش .. انا خايفة عليه
حاتم: نقدر نعاونك
نهى: الى قدرتي .. بغيت نديه للطبيب ولكن هو ماباغيش
حاتم: انا نجيبلك الطبيب حتى للدار
نهى: لهلا يخطيك عليا احاتم
حاتم: نتي مهمة بالنسبة ليا ومستعد نموت على قبلك
نهى: هه 😄
بعد لحظات جا حاتم للدار ومعاه الطبيب البي دخلوه لعند رامي
حاتم: متخافيش احبيبة .. انشاء الله يكون بخير
نهى: يا ربي
خرج الدكتور لعندهم بعد لحظات ..
الطبيب : معندي منخبي عليكم .. الوضع ديالو مكيطمنش .. وضروري نديرو شي تحاليل باش نتأكد
نهى: مناش ادكتور خلعتيني 😳
الطبيب: غادي نديرو التحاليل هو اللول ديك الساعة نقدر نهضر ..
نهى: 😞
تأليف دودي العيساتي
الخطيئة- الحلقة الثانية والعشرون
تأليف دودي العيساتي
دوزات نهى نهار لا تحسد عليه بحيث بقات مقابلة التلفون وكتسنى اتصال من الطبيب يقوليها نتيجة التحاليل .. شوية صونا ليها التلفون
نهى : الو دكتور 😥
حاتم : انا حاتم .. كيدايرا احبيبة
نهى : مخلوعة بزاف.. بحال الى كنستنى عقوبة الاعدام
حاتم : متقوليش هاكا .. انا معاك احبيبة وبجنبك
نهى : كنشكرك بزاف على هادشي ..
حاتم : منبغيش نسمع منك كلمة شكرا مرة اخرى
نهى: واخا ..
قطعات نهى مع حاتم وبقات جالسة كتستنى على احر من الجمر حتى جاها اتصال من الطبيب
نهى : دكتور
الطبيب: انسة نهى .. التحاليل راها بين يديا
نهى : وشنو فيهم
الطبيب ؛ يؤسفني نخبرك باللي رامي مدمن هيرويين .. وخاصو يدخل مصحة ادمان فأقرب وقت
نهى : 😳😭 علاش يا ربي
الطبيب : حالتو مغاتسناش.. لابد ندخلوه للمصحة ليوم قبل غدا
نهى: 😭😭 واخا ..
الصدمة كانت قوية بزاف على نهى .. كيفاش يمكن يكون مدمن وهي منتابهاتش ليه ..
نهى: انا السبب .. انا اللي تشغلت بالمنافسة مع كريستينا وخايت خويا .. لكن خاص نعوف هادو اللي معاشر معاهم شكون .. شكون اللي وصلو لهادشي .. دخلات عندو لقاتو كيهضر فالتلفون وقطع دغيا ..
نهى : معامن كنتي كتهضر .،
رامي : مع ايمن .. صاحبي كتعرفيه
نهى : مم كنعرفو مزيان .. بغيتك تعتارفلي دابا .. شكون اللي وراك هاد المصيبة دالهيروين حتى وليتي كتتعاطاه ..
رامي : 😳 حتى واحد .. انا مكنتعاطا والو
نهى : رامي .. انا غادي ندخلك المصحة دالادمان .. وغادي نتفاهمو على هادشي مللي تبرا ..
رامي : مصحة 😰 لا لا انا مبغيتش ندخل للمصحة
نهى : متخافش انا مغانخليكش بوحدك ..
رامي : عفاك اختي انا مغانبقاش نتعاطى .. عفاك متدينيش تما ..
نهى : رامي .. عفاك متصعبهاش عليا .. العشية نمشيو للطبيب .. وجد راسك ..
خرجات من عندو وخدات تلفونها اتاصلات بحاتم
حاتم : حبيبة ..
نهى : حاتم.. خويا ..
حاتم : عارف .. اتصلت بالطبيب وخبرني بكلشي
نهى : انا غانديه للمصحة ليوما ..
حاتم : متخافيش غايكون تما لاباس ..
نهى : انا حاسة بالذنب .. حيت مهتميتش بيه ..
حاتم : متحمليش نفسك المسؤلية .. رامي مراهق وهادشي وارد يوقع .. وزايدون نتي بزاف عليك هادشي كله .. طاقتك مغاتحملش .. لذا كنجدد طلبي بالزواج بيك باش نتقاسمو انا وياك المسؤولية ..
نهى : حاتم ماشي وقت هادشي دابا .. عفاك
حاتم : كما بغيتي انهى.. كما بغيتي .. انا غانجي العشية باش نمشي معاك
نهى : واخا .. بالسلامة 😔
سالات المكالمة مع حاتم .. وجات عندها هاجر ..
هاجر : حبيبة .. قلبي معاك .. شكون كان يتيق بللي رامي يكون مدمن مخدرات
نهى : شكون قالهالك 😠
هاجر: اا كنت فالبيرو عند حاتم وسمعتو كيهضر مع الطبيب .. ياك انا صاحبتك انهى .. تخبي عليا شي حاجة بحال هاكا ..
نهى : عفاك مبغيت حتى واحد يصيق الخبار بهادشي ..
هاجر : بلا متقوليها .. رامي راه خويا حتى انا ..
نهى: انا غادي نطلع لبيتي شوية ..
هاجر: واخا انا غانطمئن على الحاجة ومن بعد نطلع لرامي نهضر معاه شوية ..
نهى: واخا .. تهلاي فراسك ..
طلعات نهى لبيتها وهي كتخمم كيفاش غاتحل هاد المشاكل اللي طاحت على راسها .. دخلات لبيتها فجأة شي حد سد الباب بالساروت موراها وسد على فمها 😳
تأليف دودي العيساتي
الخطيئة - الحلقة الثالثة والعشرون
تأليف دودي العيساتي
دخلات نهى وتحطات يد على فمها وبدات كتقاوم وكتحاول تبكي ..
- نهى متخافيش .. عفاك انا عمر .. متخافيش انا مغانآذيكش ..
نهى : عمر 😰 اشنو اللي جابك هنا كيدرتي خرجتي من الحبس
عمر: عاونوني شي ناس .. نهى انا بريئ ومقتلتش .. ونتي..
نهى: انا قلت داكشي فالمحكمة على قبل والديك .. ولكن ممقتانعاش ببراءتك
عمر: هادشي كدوب .. نتي مقتانعة ببراءتي .. ومتأكدة منها ..عينيك كيأكدو هادشي ..
نهى: عمر انا مباغا مشاكل .. سير بحالك ومبغيت حتى حاجة متعلقة بيك.. سير ولا نبلغ البوليس بأنك هنا ..
عمر: مغاتقدريش ديريها ..
هاجر: نهى .. واش معاك شي حد .. معامن كتهضري ..
نهى : ااا 😪 كنهضر بالسكايب مع واحد الصديق من تايلاند .. سيري نتي عند رامي هاد الساعة ..
هاجر : اوكي ..
نهى: عمر .. عفاك سير بحالك .. عفاك ..
عمر: نهى انا غادي نثبت ليك باللي انا برييء .. وغادي نعرف شكون اللي دار هاد الفعلة .. غادي ندير هادشي على قبلك نتي بوحدك .. ولكن بغيت منك غا حاجة وحدة .. تيقي بيا وتعرفي باللي انا كنبغيك ومستحيل ندير شي حاجة اللي تآذيك ..
نهى : اوكي .. انا تايقة فيك اعمر ..
عمر: 😄 كنبغيك بزاف انهى ..
شوية سمعو صوت غوات هاجر .. اللي كانت كتعيط على نهى ..
نهى: اش واقع .. شوف جلس هنا واياك تخرج.. سد الباب مورايا .. راجعالك واخا ؟
عمر: واخا ..
مشات نهى كتجري لعند هاجر اللي صوتها كان جاي من بيت رامي
نهى: اش واقع .. فين رامي
هاجر: 😰 جيت بقيت كندق عليه .. محلش ملي حليت الباب ملقيتوش .. مللي طليت من البالكون لقيتو راكب على موطور وهاز مور ظهرو صاك
نهى: اش هادشي كتقولي فين مشا .. حرام عليك ارامي علاش دير هاكا ..
خدات تلفونها وبدات كتصوني عليه لقات تلفونه طافي ..
نهى : علاش علاش ..
شوية سمعات حاتم كيعط عليها .. مشات تجري عندو هي وهاجر ..
حاتم : نهى حياتي .. خفت عليك ..
نهى: حاتم .. رامي هرب ..
حاتم: كيفاش هرب ..
نهى: شافتو هاجر ركب فشي موطور ومشا اكيد خاف اني ندخلو لمصحة الادمان وهرب ..
حاتم : كاين خبر اسوء ..
نهى: شنو كاين 😳
حاتم : عمر هرب من الحبس ..
نهى: احم شنو .. كيفاش هرب .. واش هاداك حبس ولا اوطيل .. بهاد السهولة هرب
حاتم : هاداك صدق مصيبة كبيرة .. دار خطة للهروب حتى واحد مافكر فيها ..
هاجر: هادي مصيبة انا خايفة يكون هو اللي مور هروب رامي .. اكيد تواصل معاه وهربو باش ينتاقم منك انهى..
نهى: منظنش .. مغاتوصلش بيه الحالة لهادشي
حاتم: اش هاد برودة الاعصاب اللي كتهضري بيها .. هاجر عندها الحق .. ماشي بعيد يكون خاطفو .. علاش مازال كتظني فيه الزوين بعد داكشي اللي دارو ..
نهى : انا .. ووعلاش غانظن فيه الزوين .. اش بيني وبينو ..
حاتم : حبيبة انا مغانطمئنش عليك هنا بوحدك .. اكيد داك الحيوان غايجي هنا باش ينتقم ..
نهى: اش عندو مايدير كاع ..
حاتم : انا غانجيبلك الحرس ديالي هنا ..
نهى: لا مبغيتش حرس باراكة غا هادو اللي عندي .. وهما كيعرفو عمر مزيان الى جا غادي يمنعوه ويبلغو البوليس ..
حاتم : عنيدة بزاف ..
نهى: اش كناقشو دابا خاصنا نقلبو على رامي اش مازال كنستناو .. انا غانطلع نبدل حوايجي .. وغانمشي نقلب عند صحابو .. ونتا احاتم الى كتبغيني بالصح بلاش من هاد الضغط اللي كادير عليا انا مولفتوش ومعاجبنيش
حاتم : انا اسف .. هادشي دايرو غا من باب الخوف عليك
نهى: انا متفهمة خوفك وكنشكرك عليه بزاف .. ولكن معندو حتى داعي دابا .. اهم شيء نلقاو رامي دابا .. انا غانتاصل بالخداما ديال بابا وديال ماما نطلبهم كلهم يتعاونو معايا ..
حاتم : واخا احبيبة .. غادي نمشي نقلب عليه .. وندير مجهودي باش نلقاه على قبلك .. يالله اهاجر..
هاجر: واخا انا غانمشي لمدراستو نسول ..
0 Commentaires