طلعات نهى لبيتها ولقات عمر كيستنى ..
عمر: عاود اتاهموني انا باللي اختطفت رامي
نهى: كيدرتي هربتي من الحبس ..
عمر: واحد السيد معايا هو اللي تكلف .. هربنا فكاميو دالزبل ..
نهى: مم ..
عمر: متيقتينيش ..
نهى: لوجيكمون هاداك ماشي اوطيل تدخل وتخرج بسهولة ..
عمر: تيقي بيا .. من زهري كانت الامور ساهلة
نهى: زهرك؟
عمر: عاود متيقتينيش
نهى: اللي متأكدة منو هو انه ماشي نتا اللي اختطفتي رامي كما كيقولو هما ..
عمر: شكون هما باش تتيقيهم عليا انا .. نهى انا اللي نصفك الثاني ولا نسيتي
نهى: المهم نتا ماخاصكش تبقى هنا ..
عمر: انا غانمشي ..
نهى: لا .. انا غانخبيك .. ضروري تبقى قدام عيني ..
عمر: 😄 .. واخا
نهى: خاص نبدل شكلك كله .. هاد اللحية خاص تحسنها .. وحتى الشعر خاص تنقص منه .. والحوايج والستيل كله يتبدل .. باش نقدر ندخل لاوطيل بابا .. وغاتبقى تما ..
عمر: واخا ..
نهى: انا غادي نمشي نجيبلك الماكينة الحسانة دبابا .. وشي كوستيم ديالو والبرودويات ديالو .. امم انا بانلي باللي نتا طويل شوية عليه افف كيفاش غادي نلقا مقاسك ..حتى حوايج امير مغايجيولكش.. خاصني نمشي نشريلك نتا طويل وعريض ..
عمر: امير !! 😕 ماشي مشكل شريلي ولا بغيتي الفلوس ..
ضرباتو لدراعو
نهى: اشمن فلوس .. انا فين ونتا فين .. اسي الفهاماطور مفكرتيش باللي الى شريت حوايج الرجال بهاد المقياس غادي يشكو فيا خصوصا انه معندي حتى واحد بهاد المقاييس فالدار
عمر : فهاماطور هه فكرتيني فصغرنا كان ديما باباك كيقولهالي ..
نهى : الله يرحمو 😔
عمر : الله يرحمو .. كانت ايام زوينة .. المهم احبيبة ديري راسك بحال الى شارياهم لداك خينا اللي جا قبيلة.
نهى: فين عرفتيه قياسو قدك
عمر: ماشي قدي .. المهم انا مفورمي عليه شوية
نهى: خرجتي من البيت قبيلة 😕
عمر: شنو بغيتيني نخليك معاهم بوحدك ضروري كان خاصني نكون واجد لاي خطر قريب منك
نهى : اشمن خطر .. واش باغي تحمقني
عمر: خلينا دابا فالحوايج 😐
نهى : اوف .. عندك الحق .. غادي نشري جوج كوستومات .. وغادي نقول باللي شريتولو تعبيرا عن امتناني لمساعدتو ليا
عمر: امتناني 😑 اصلا داك السيد لا زين لا مجي بكري .. مبقيتش باغي الحوايج باغي نبقى باللحية ديالي
نهى : احم ..
عمر: سيري دغيا شري لامتناني .. جري
نهى: انا مشيت .. هاد المرا انا اللي غانسد عليك الباب .. مبقا فيك امان .. منظمنش ديك اللي سميتها جوديا تبلغ بيك ولا وحدة من الخدامات راه كيعرفوك مزيان ..
عمر : واخا انا غانعس شوية حتى ترجعي .. الله على راحة .. ناموسيتك عندي معاها ذكريااات
نهى : نووووض دوش بعدا انا غانجيبك حوايج بابا تديباني بيهم على ما نشري ليك ..
عمر: واخا .. كنستناك تأليف دودي العيساتي
الخطيئة- الحلقة الرابعة والعشرون ..
تأليف دودي العيساتي ..
خرجات نهى من بيتها واتاجهات لبيت واليديها اللي غا دخلات حسات باحساس غريب .. استجمعات القوة ديالها ومشات لحوايج باها خدات ماكينة الحسانة وشامبون وجيل دوش وفوطات وشي بروديوات دالرجال .. هزات واحد العباءة دباباها وبلغة وملابس داخلية ورجعات عند عمر .. لقاتو كيتفرج فصورتها ..
نهى: هاك .. دوش ولبس هادو..
عمر: واخا .. سيري ومتطعطليش
نهى: لا غانتعطل .. غانمشي نقلب على رامي ونسول عليه ..
عمر: واخا ..ولكن علاش هاد الدورة كلها .. ياك رامي كان عندو صديق مفضل واحد هو هيثم .. سيري عندو سولي فيه
نهى: كيفاش حتى نسيت حاجة بحال هادي ..شكرا بزاف حيت فكرتيني ..
عمر: باش تعرفي عمر .. نصفك الثاني هادا ههه
نهى: ههه نتا محكوم بالمؤبد .. مفهمتش اش عاد السعادة راك فيها ..
عمر: حيت راني معاك .. الدنيا كلها كتولي صغيرة فعيني ومكتبانيلي غا نتي ..
نهى: راجعالك ..
عمر: واخا ..
مشات نهى ورجعات ..
نهى: نسيييت قلتليهم غانبدل حوايجي ..
عمر: بدلي اش كتسناي ...
نهى: عمر ...
عمر: عقلتي مللي كنت كنديك للطواليط ديري بيبي القطيطة ..
نهى: عمررر .. صافي .. 😅
عمر: هههه صافي هانا ساكت ..
نهى: انا راني فمصيبة وجالسة كنحاكي معاك .. غانهز حوايجي وغانمشي نبدل فبيت ماما ..
عمر: وااخا .. خرجي من بيتي دغيا راه تابعني الدوش والحسانة ..
نهى: هانا خارجة هههه تهلا
مشات نهى لبيت والديها وبدلات حوايجها وطلقات شعرها .. وخرجات دغيا .. ركبات فالطوموبيل ومشات كتقلب فلي بوتيك .. بدات بالكوستيم .. بدات تقلب وتشوف المقياس دكل واحد فيهم .. ملي لقات داكشي اللي بغات شرات جوج .. الثاني كان اقل حجم من اللول بقليل .. وسولات على البوكسر .. وهي حشمانة .. شرات بسرعة ثلاثة دالانواع دالملابس الداخلية كومبلي .. خلصات وخرجات دغيا باش ميشوفها شي حد .. دارتهم فطوموبيلتها ومشات.. ديريكت لدار هيثم
سلمات على ماماه ..
الام: حبيبة لاباس عليك .. بقا فينا داكشي اللي داز عليك .. قلبي معاك ..
نهى: ربي يخليك .. كنت جاية نسول على هيثم .. كاع مبقا يبان
الام: انا اللي خاصني نسولك على رامي .. شحال هادي مشفتو .. ها هو هيثم جا .. انا غانصاوب ليكم شي حاجة تشربوها .. هضرو على خاطركم
جلس هيثم
هيثم: كيداير رامي ...
نهى: انا اللي خاصني نسولك ..
هيثم: انا ورامي مبقيناش صحاب من شحال هادي ..
نهى: علااش ..
هيثم : حيت تبدل عليا من نهار عرف واحد البنت
نهى: بنت ؟؟ شكون هاد البنت ..
هيثم : مكتقراش معانا .. تعرف عليها غا فواحد الحفلة .. وولى ديما معاها .. حتى انه من نهار عرفها وهو كيكمي
نهى: 😳 وعلاش مجيتيش تقولي هادشي ..
هيثم : مكانش كيهمني الموضوع .. عادي كتوقع .. شحال من واحد باع صحابو على قبل درية ..
نهى: خلصني هاد البنت شكون وبنت من سميتها وشحال فعمرها ..
هيثم: مكنعرفش عليها بزاف .. عندها موطور وديما كتستنى فيه قدام المدرسة كيمشي معاها معرفتش فيه .. غالبا الى مغلطت سميتها سالي..
نهى: موطوور .. يعني هي اللي مشا معاها الصباح ..
هيثم: نعام ؟
نهى: كتعرف ديك الحفلة اللي تلاقاو فيها ديالمن ؟
هيثم: اه ديال صاحبنا .. سميتو اشرف ساكن فالعمارة رقم ثلاثة اللي الشارع اللي مورانا ..
نهى: كنشكرك بزاف .. يالله نخليكم ..
الام: جلسي تتغداي معانا
نهى: مرة اخرى ..
خرجات نهى ومشات للعمارة للي نعاها ليها هيثم .. سولات على اشرف وطلعات .. دقات عليهم
نهى: السلام .. كاين اشرف ..
المرا: اه كاين .. (عيطات ليه)
اشرف : اهلا ..
نهى: انا اخت رامي ..
اشرف : اهلا ..
نهى: بغيت نعرف واحد البنت سميتها سالي .. كانت جات لواحد الحفلة معاكم .. تقدر توريني فين كاينة
اشرف : ممكن نعرف علاش كتسولي عليها
نهى: حيت رامي هرب معاها 😔
اشرف : بالصح 😳 .. امم هي مكنعرفهاش مزيان .. كانت تجي عند خالتها اللي ساكنة فهاد البارطمة قبالتنا ..
نهى: كنشكرك بزاف اشرف ..
اشرف : طمنينا على رامي ..
نهى؛ اكيد ..
مشات نهى دقات على البارطمة .. وفتحات ليها واحد المرا ..
نهى: السلام لالة.. ممكن نشوف سالي
المرا : شكون نتي
نهى: انا اخت رامي .. الصديق ديال سالي ..
المرا : سمحيلي انا مكنعرف حتى واحدة بسمية سالي .. بالسلامة
سدات عليها الباب وخلاتها مصدومة .. ومشات ..
المرا خدات التلفون واتاصلات ..
المرا١: الو جات وحدة كتقول انها اخت رامي كتسول على سالي ..
المرا٢: هزي حوايجك من ديك الدار سيري من تما دغيا
المرا١: واخا ..
تأليف دودي العيساتي
الخطيئة- الحلقة الخامسة والعشرون ..
تأليف دودي العيساتي ..
مشات نهى وهي مصدومة .. علاش نكرات ديك السيدة غا سمعات اسم رامي .. شنو موار البنت مولات الموطور ... مشات دغيا للفيلا .. وصلات طلعات لبيتها ومعاها حوايج عمر .. دقات بشوية
نهى: عمر حل الباب انا نهى
حل دغيا عمر الباب ودخلات سدات عليها .. شافت فيهم وهي تضحك ..
نهى: 😂😂😂 اش هادشي ..
عمر: شنو ..
نهى: والو العباءة جاتك قصيرة بزاف .. ههه المنظر ديالك كيضحك الصراحة .. وتبدلتي بزاف مللي حيدتي اللحية .. هادا هو عمر اللي عرفتو
عمر : بوكوص ياك 😌 .. المهم جبتيني شي حاجة .. راني معدب بهاد الحوايج دباباك .. خصوصا الداخلية ..
نهى: 😂😂😂😂😂😂 اميمتي كرشي ..
عمر: كتباني زوينة بزاف ملي كتضحكي .. كتفكريني بنهى اللي كنت كنعرف ..
نهى: 😊 اوكي اسيدي عانا جبتلك شي حوايج .. وهاد الكوستوم ليك.. لبسو وشوف واش يجيك .. وحتى الصباط جبتهملك ..
عمر: يخليك ليلي ..
نهى: ميغسي .. يالله لبس انا كنستناك .. غانمشي ندير مكالمة ونرجع ليك ..
عمر: واخا ..
خرجات نهى واتاصلات بالاوطيل ديال باباها ..
نهى: الو .. عادل .. انا نهى القايدي ...
عادل : مرحبا الالة ..
نهى: انا عندي ضيف .. صديق قديم جا من تايلاند باش يزورني .. بغيتك تحجزليه جناح فالفندق .. واهم شيء خاص حتى واحد ميسيق الاخبار .. بغيتو يقضي عطلته هنا زوينة .. امم هو مغايخرجش بزاف حيت بيني وبينو شي خدمة .. كما قلتلك اهم شيء حتى واحد ميسيق الخبار..
عادل : كلشي غايكون كما بغيتي الالة نهى .. عطيني غا معلوماته ..
نهى: اسمه رشاد .. عايش فتايلاند .. رجل اعمال .. ممم صافي ..
عادل : صافي الالة انا حجزتلو احسن جناح عندنا ..
نهى: شكرا .. ااه عادل .. حتى العمال ماشي مهم يعرفو يعني الى سولك عليه شي حد متقوليه والو .. والخدمات ديالو كنفضل تقوم بها نتا شخصيا .. وحتى واحد ميوصل ليه .. اه نسيت هاجر اكيد غادي يجيها الفضول وتبغي تقولك تمشي تتعرف عليه .. هادشي ممنوع واخا .. هذا ضيف مهم وبغيناه يرتاح
عادل : مفهوم لالة نهى..
نهى: شكرا ليك ..
ناضت نهى من بلاصتها ومشات لجداتها .. دخلات عندها ..
الجدة : بنتي لاباس عليك
نهى: جدة الحبيبة .. لاباس عليك ..
الجدة: فين غبورك ابنتي .. اش واقع
نهى: دعي معايا اجدة .. ربي ينور بصيرتي .. ويبين قدامي الناس المزيانين من الخايبين ..
الجدة : يا ربي ابنتي يا ربي .. متنسايش صلاتك وربي مغاينساكش ..
نهى: يا رب..
الجدة : فين هو رامي ..
نهى: خرج مع صحابو.. نتي كيف غادية مع الدوا ديالك
الجدة : مزيانة ..
اطمئنات نهى على الجدة وخرجات من عندها .. وطلعات لعند عمر من جديد .. دقات فتح ليها
نهى: وليت كنستأذن ندخل بيتي ..
عمر: ههه هادا ولى بيتي صافي
نهى: بوكووص ..
عمر: قبل مكنتش بوكوص ..؟ 😉
نهى: ما عمري شفت المظهر ديالك .. ديما كنت نحس ببك وصاف
عمر: وعلاش محسيتيش بيا نهار اختاريتي امير😔
نهى: امير كان غلطة 😔 ومعرفت حقيقته حتى مات .. قولي اعمر .. شنو كنتي كدير فالاوطيل نهار عرسي ..
عمر: جيت نشوفك .. ونقولك عفاك متزوجيش بيه .. ولكن مقدرتش نقرب منك .. شفتك من بعيد مللي كنتي كتكتبي العقد .. طاحو دموعي وانا كنشوفو معاك .. مقدرتش نصبر ومشيت .. 😢
نهى: والصاك اللي كنتي هازو مللي دخلتي فين مشا .. مع العلم انه هو اللي لقاو فيه المتفجرات ..
عمر: هاداك صاكي كنت جامع فيه حوايجي .. ومكنتش ناوي نرجع للفيلا .. كنت باغي نمشي بحالي .. حطيتو فالباب مللي رجعت ملقيتوش .. مكانش عندي الوقت نقلب مازال ومشيت .. حيت حالتي ديك الساعة مكان عالم بيها الا الله
نهى: فنظرك هادشي كيدخل للعقل ..
عمر: تيقي بيا انهى .. كنقسم ليك باللي هادي هي الحقيقة .. اكيد القاتل الحقيقي هو اللي خداه باش يورطني انا فالجريمة ..
نهى: غادي نتعشاو .. وبالليل مللي غاتخوا الدنيا غانديك للاوطيل ديال بابا .. باش تتخبا تما .. واخا..
عمر: واخا ..
ناضت نهى ومشات للكوزينة .. تطلب الخدامة توجد الماكلة ..
الخدامة : كلشي هادشي الالة ؟.. غريبة .. نتي كديري الريجيم وعمرك ماتعشيتي بالليل .. نهار غاتعشاي غاتاكلي كل هاد الماكلة ؟
نهى: متدخليش سوق راسك؟ انا مكليتش النهار كله وفيا الجوع ..
هزات الماكلة وطلعات لبيتها .. ودخلات .. لقات عمر كيستنى..
عمر: واخيراا الماكلة قتلني الجوع .. او اش هادشي.. الماكلة قليلة بزاف
نهى: هادشي قليل ؟ والخدامة كتقولي فين غادير هاد الماكلة نتي مكتعشايش .. علم الله كون جبت كتر من هادشي اش كان غايطرا ..
عمر: انا يوماين مكليت .. قليل انهى قليل ..
نهى: راه غايشكو فيا الى جبت كتر .. وزايدون بالليل مللي غانمشي للاوطيل طلب اللي بغيتي ..
عمر: متخافيش اخر شخص يفكرو فيه انه يكون مخبيني هي نتي ..
نهى: ايوا كل ..
عمر: ايوا اجي كولي معايا ..
نهى: عاد كنتي كتشكى من الماكلة انها قليلة ..
عمر: بلاش 😑
نهى: هههه وكال نتا .. من يومك معرفتش كيفاش كدير تاكل كاع ديك الماكلة ،،
عمر: ههه حتى نتي حتى بانلك فداك الريجيم .. اجي نغلضك 😜
نهى: عومااار ..
عمر: شحال كنحماق على سميتي مللي كتنطقيها بديك الطريقة..
نهى: ههه صافي .. كول ..
عمر: واخا هانا غاناكل..
صونا التلفون لنهى وردات ..
نهى: الو..
حاتم : حياتي فينك ..
نهى: فالدار ..
حاتم : كاين شي جديد ..
نهى: مشيت سولت صحابو .. حتى واحد مكيعرف ديك البنت ..
حاتم : انا غانجيبلك الخبار عليها .. وغادي نلقاو رامي متخافيش ..
نهى: انشاء الله ..
حاتم : ماباغاش شي حاجة اخرى احبيبة .. الى بغيتي ممكن نخرجو نتعشاو مرا
نهى: لا معندي كانا .. غادي ننعس حيت راسي كيضرني .. اللي طرا اليوما ماشي قليل
حاتم : واخا احياتي .. رتاحي ..
نهى: حاتم ..
حاتم : مم
نهى: لقالي خويا عفاك ..
حاتم : كنواعدك ..
تأليف دودي العيساتي
الخطيئة- الحلقة السادسة والعشرون
تأليف دودي العيساتي
كملات نهى الهضرة مع حاتم وشافت فعمر
نهى: مالك مكتاكلش ..
عمر: معنديش الشهية ..
نهى: ياك عاد كانت عندك ..
عمر: تسداتلي ..
نهى: وباش؟
عمر: بغيت نعرف هاد خينة ما محله من الاعراب 😠
نهى: 😂.. هاد الجملة مازال كتقولها .. هههه
عمر: مكنضحكش .. علاش مازال كتعامليه هاكا
نهى: هادا انسان محترم وكيهتم بيا وعمري ماشفت منه شي حاجة خايبة بالعكس ديما كيعاوني وكيوقف بجنبي ..
عمر: محترم .. ولاباس عليه .. ماشي بحالي انا وليت محابسي .. ومعندي فجيبي حتى باش نشري ماكلتي ..
نهى: رجعنا عاود تاني لهاد صراع الطبقات ... عمر من صغري وانا معاك .. عمري حسيتك بالفرق بيناتنا..
عمر: لا .. عمرك محسيتيني .. وهادشي اللي كيقتلني .. حيت انا كنتأقلم بزاف معاك .. وفجأة كنفيق وكنعرف قيمتي ..
نهى: عمر باراكة حيت غانغضب بالمعقول ..
عمر: واخا .. هانا ساكت..
نهى: كول ..
عمر: راني قولتلك معنديش الشهية ..
نهى: غاتاكل ولا نوكلك بيدي ..
عمر: 😣
قربات منه نهى وشافت فعينيه مزيان .. وشدات راسو بيدها وبدات تلعب فشعرو ..
نهى: عقلتي اعمر .. بالتحديد مللي كانت عندي 16 عام .. فهاد البلاصة بالتحديد .. كنا جالسين كنتفرجو فواحد الفيلم .. عقلتي شنو وقع ..
عمر: مستحيل ننسى.. ولكن .. نتي مازالة عاقلة .. كان يصحابلي نسيتي كلشي ..
نهى: هاديك اول قبلة فحياتي .. داك الاحساس اللي حسيتو مستحيل ننساه ... يالله على قبلي كول ..
عمر: 😪 انا ..
نهى : شششوت .. كول باش نمشيو للاوطيل ..
عمر: واخا ..
نهى: عرفتي .. ديك البنت مولات الموطور موراها ان..
عمر: شكون .. اللي هربات مع رامي ؟
نهى: تخيل قالي صاحبو هيثم باللي من نهار عرفها وهو لور لور.. وباللي تعرف عليها فشي حفلة .. ومللي مشيت نسول عليها فالدار اللي وراوني .. المرا اللي فتحاتلي غا سمعات اسم رامي وهي تتبلوكا وقالتي مكتعرفش شي وحدة بهاد السمية ..
عمر: طبيعي تتهرب .. خصوصا ان البنت هي اللي ورات طريق المخدرات لرامي .. ماشي بعيد تكون هاد المرا هي اللي كتمول ليهم المخدرات كاع .. دري لاباس عليه .. اكيد غايعطيهم اللي طلبوه .. وهادشي اللي طمعهم فيه ..
نهى: الى كان هادشي اللي كتقولو صحيح .. هادا كيعني ان رامي خويا فخطر..
عمر: متخافيش .، انشاء الله غايكون لاباس ..
نهى: فرأيك نديكلاري عند البوليس ؟
عمر: حتى هادا نظر.. هو قاصر وغايقلبو عليه .. عندك غير يتاهموني باللي انا اللي خطفتو كما دار داك خينة ..
نهى: عمر ..
عمر: صافي ماقلت والو ..
نهى: نوض .. غانمشيو للاوطيل .. بلاتي نتأكد باللي كلشي نعسو فالفيلا ..
عمر: نتي خرجي من الباب وانا غانخرج منين دخلت .. 😜
نهى: عههه واخا ..
خرجات نهى وديمارات طوموبيلتها وخرجات من الفيلا .. لقات عمر كيستناها حدا شي شجرات ..
نهى: كطير ..
عمر: ههه على قبلك انهى نولي أُوهى 😂
نهى: اشناهوا ؟؟ 😳
عمر: أُوهى بالريفية كتعني ثعلب هههه
نهى: يا خوفي من الثعالب انا
عمر: مال الثعلب .. كينقز بين الشجرات .. وحتى واحد مكيقدر يشدو ..
نهى: اه ولكن ماكر ومخادع وكداب ..
عمر: فين شفتيه باللي كداب .. الثعلب مظلوم .. ربما الناس ظالمينو وكيبان عليه باللي فيه صفات الكذب والخداع .. ولكن هو ماشي هكاك فالحقيقة .. وبريئ..
نهى: تيقناك ...
وصلو للاوطيل .. باركات الطوموبيل ..
نهى: عمر تصرف عادي ومن الافضل متهضرش بالعربية .. حاول تهضر بالانجليزية ..
عمر: it's ok
نهى: معاهم ماشي معايا ههه
عمر: واخا ..
خرجو من الطوموبيل ودخلو للاوطيل .. استقبلوهم العمال ..
عادل : مرحبا لالة نهى.. مرحبا اسيدي .. الجناح ديالك جاهز .. من فضلك عطيني البطاقة ديالك باش نكمل الاجراءات ..
نهى: هه عادل هاد السيد من جيهتي ميحتاجش هاد البروتوكولات ..
عادل : كنعتذر لالة نهى تفضلو ..
طلعو الاسانسور واتاجهو للجناح للي حجزو ودخلو ..
عمر: اخر مرة جيت هنا من خمس سنين.. كان باباك باغي يخدمني معاه .. ولكن انا مبغيتش ..
نهى: نسا عليك هادشي دابا.. شوف داكشي اللي بغيتيه كلشي كاين هنا.. اوكي
عمر: واخا ..
نهى: صافي انا غانمشي .. وغدا غاندوز عندك .. عمر بلا منوصيك متحتك بحتى واحد .. حدك عادل طلب منو اللي بغيتيه .. نتا راك هربان من الحبس ..
عمر: واخا متعطليش عليا
نهى: تصبح على خير ..اه نسيت .. غادي نحاول نشري ليك حوايج تبدل فيهم اوك ..
عمر : واخا
رجعات نهى للدار .. ومشات لبيت رامي وبدات كتقلب .. حتى لقات الايباد .. بدات كتقلب فيه وهي تلقا imo محلول تما .. لقات ميساجات ديالو بدات كتقلب حتى بانليها اسم سالي .. بدات كتقرا لي كونفيغصاصيون.. المحادثة كانت عادية اعجاب وكلمات زوينة .. خدات نمرتها سجلاتها .. وناضت سدات الايباد .. مشات لبيتها دخلات وهي تلقا حوايج عمر .. ضحكات وهزاتهم .. خبعاتهم .. هزات التلفون واتاصلات بحاتم
حاتم: حياتي لباس عليك .. واش مازال منعستي
نهى: لا بقيت كنقلب فحوايج رامي .. وانا نلقا فالايباد ديالو النمرة ديال ديك البنت مولات الموطور..
حاتم: بالصح ؟ دوزيهالي انا نلقاهاليك ..
نهى: واش تقدر ؟
حاتم : اه غادي نحدد مكانها ب gprs .. وغادي نلقاها ونجيبليك رامي .. نتي تيقي بيا ومتخافيش غادي نلقاه
نهى: معرفتش اش غانقولك احاتم.. عرفتي انا شريتلك واحد الهدية .. غانعطيهالك غدا ..
حاتم: بالصح .. نتمنى تكون هاد الهدية جواب على طلب زواجي منك ..
نهى: ممكن نأجلو شوية الهضرة فالزواج ..
حاتم: واخا .. كما بغيتي ..
نهى: تصبح على خير نتشاوفو غدا ..
حاتم : تصبحي على خير ..
الخطيئة- الحلقة السابعة والعشرون
تأليف دودي العيساتي
نعسات نهى.. وفاقت الصبح بكري .. ناضت بدلات حوايجها وصاوبات راسها وطلقات شعرها .. لبسات واحد التريكو عليها حيت كان شوية البرد .. خدات صاكها وخرجات .. ركبات فطوموبيلتها دغيا واتاجهات لاوطيل ديال باباها .. دخلات لقات الخدم تما .. مشات لعند الغيسيبسيون خدات السوارت وطلعات لعند عمر .. حلات الباب ودخلات لعندو لقاتو ناعس .. حطات صاكها وجلسات .. بدات كتدوز ليه على شعرو وهو ناعس كي الملاك
نهى:عمر .. ☺️ فيق .. باراكة من النعاس ..
عمر: واش مت ومشيت للجنة ..
نهى: ههه نوض باراكة من الغزل ههه واش نتا راك فوضع اللي تتغزل فيه وتهضر..
عمر: هانا نايض .. كاين شي فطور 😌
نهى: كاين ههه هانا غانطلبو ليك دابا ..
عمر: واخا 😌
نهى: اش هادشي جلس جلس .. متنوضش .. كيفاش مدرتش بحساب هادشي ..
عمر : شنو 😳ً
نهى: نعستي غا البوكسر .. كون جبتليك شي بيجامة تديباني بيها ..
عمر : حيدي من قدامي واش نتي غاتحشمي مني ..
نهى: عمر نتا دابا وليتي راجل ..راجل .. قد الشحط .. مبقيناش كما شحال هادي صغار..
عمر: مم .. راااجل ..
نهى: نسيتي مللي مكنتيش كتبغي تسلم عليا .. نهار كنتي داير اللحية ..
عمر: متفكرينيش عفاك بداك الوقت .. مكنحملش ديك الوقيتة كاع ..
نهى: واخا بالمناسبة كتواتيك اللحية ..
عمر: صافي غانطلقهاليك
نهى: لا لا دابا لا باش ميشدوكش،.
عمر: مبغيتيهمش يشدوني ..
نهى: اكيد لا ..
عمر: صافي الالة غير تبان الحقيقة نطلقهالك
نهى: كتضن باللي غاتبان الحقيقة شي نهار ؟
عمر: اكيد .. انا متأكد من هادشي ...
نهى:كنتمنى.. يالله انا غانطلب ليك الماكلة وغانمشي للخدمة سمحت فيها هاد الايام ومنها نعرف شنو دار حاتم فموضوع خويا ..
عمر: حاتم حاتم ..😠
نهى: عمر .. شنو قلنا ..
عمر: هانا ساكت .. انا اصلا ممتيقش راسي باللي راني معاك .. اخر وحدة كنت كنفكر انها تيق بيا .. حيت مؤخرا بعدتي عليا بزاف وكان كيصحاب بيا نسيتيني الى الابد ..
نهى: صافي اعمر لا داعي كل دقيقة تفكرني باللي اختياري كان خطأ ..
عمر: انا مكنلومكش .. انا غا ممتيقش راسي .. وتيقي بيا اي حاجة توقعلي من هنا الفوق مكتهمنيش ،. حيت نتي معايا ..
نهى: واخا اسيدي .. انا مشيت .. غانطلب ليك الفطور وكما اتافقنا ممنووع تحتك مع اي واحد ..
عمر: حاااضر..
نهى: بالسلامة ..
مشات نهى للشركة واتاجهات مباشرة للبيرو ديال حاتم .. ودخلات ..
حاتم: نهى 😄
نهى: حاتم اش درتي .. لقيتي البنت ..
حاتم : قريب .. متخافيش غانلقاوها ..
نهى: بالمناسبة .. سمحلي بزاف .. هملت الخدمة هاد الايام ..
حاتم: اش هاد الهضرة ،. انا اش كندير هنا ..
نهى: ربي يخليك ..
حاتم : فين الكادو ديالي ..
نهى: فالدار .. تتغدا معايا ليوما
حاتم : طبعا 😄
نهى: مزيان ..
حاتم: شنو اخبار صاحبك التايلاندي
نهى: 😳.. شكون قالهالك ..
حاتم : اا .. هاجر .. سولتها عليك قالتلي راه عندك شي ضيف جاي من التايلاند ..صديقك.. ولا لا؟
نهى: هاجر شكون اللي قالهالها ؟
حاتم : منعرف .. صاحبتك هاديك اولا؟
نهى: مم اكيد .. صاحبتي ..
حاتم : متعرفيناش عليه .. ؟
نهى: اكيد.. هو جاي على شي خدمة .. نسولو الى كان عندو وقت .. اكيد غادي نعرفكم ..
حاتم : انشاء الله ..
شوية جاه اتصال
حاتم: وي؟ مفهوم ..
نهى: شنو..
حاتم : لقيت بلاصة البنت .. اجي معايا ..
نهى: بالصح .. خلينا نمشيو دغيا ..
مشاو نهى وحاتم ركبو دغيا فالطوموبيل ومشاو .. نهى كانت قلقة بزاف.. حتى وصلو لواحد الدار ونزلو من الطوموبيل ..
نهى: انا خايفة منلقاش هنا خويا ..
حاتم : انا اتصلت بالمصحة يصيفطو لينا امبيلونص وناس يشدو رامي ..
نهى: واش فنظرك غايحاول يهرب عاود
حاتم : اكيد .. مادامه خايف تديه للمصحة ..
نهى: يا ربي .. 😢
حاتم: اري يدك ..
شد فيدها وبداو يدقو على الدار .. حتى حلات البنت وتصدمات مللي شافتهم..
تأليف دودي العيساتي
0 Commentaires