الخطيئة -الحلقة 5-6-7-8

الخطيئة 

الخطيئة- الحلقة الخامسة 
تأليف دودي العيساتي 
dodi elaissati#يوم جديد .. ناضت نهى كتوجد راسها باش تمشي لمركز التجميل ديال ماماها .. بغات تدوز فيه النهار حيت الغد ليه عرسها .. فطرات ومشات .. استقبلوها بحفاوة .. دارت الصونا .. ودارت المينيكور والبيديكور .. وصبغت شعرها .. ودار سوان دفيزاج ولي ماسك.. دارت جميع الاستعدادات باش تكون عروس مثالية .. مللي رجعات للدار لقات مفاجئة .. لقات صحاباتها موجدين حفلة حناء جابو النقاشة .. 
هاجر : مرحبا بلالة العروسة .. اجي دغيا معايا نلبسك القفطان الخضر وتزوق ليك النكافة باش تنقشي الحنا .. 
نهى : ههه هادشي بزاف عليا والله .. لله يحفظكم ليا .. 
هاجر : زيدي معندناش الوقت .. خهه 
دخلوها لبسوها القفطان الخضر ودارو ليا مكياج يواتي ليلة الحنا .. جات فنة .. نزلات بالصلاة والسلام والنكافات كيزغرتو .. نقشات ليا النقاشة دازت ليلة واعرة بمعنى الكلمة .. شبعو تصاور.. الغد ليه فاقت لالة لعروسة .. بعدما كانت موجدة حوايجها باش يديوهم لدار راجلها .. خدات ما تحتاج ومشات للاوطيل مع والديها .. ودخلات للبيت اللي غاتصاوب ليها فيه النكافة .. جهزاتها ونزلات بللصلاة والسلام .. لقات امير كيستناها بالجلابة فواحد الطابلة وحداه العدول والشهود .. والديها كيشوفو فيها شوفات حب نزلات وجلسات .. بترقب وحب كتبو العقد بعدما سولها العدول واش موافقة ..وافقات بحب .. 
فبوابة القاعة كان شخص يختلس النظر .. نزلات دمعة من عينه مللي سمع موافقة نهى بفرح على زواجها من امير .. كان عمر اللي تهدم قدامه كلشي فهاد اللحظة .. زير على سنانه وغمض عينيه وانصرف .. 
وبدا العرس الشطيح والنشاط .. لبساتها النكافة اللبسة الاولى.. جا امير لابس لبسة تقليدية .. دخلت شافها تفاجأ بيها وباس راسها وهي فرحانة .. نزلو بالصلاة والسلام والنكافات من حواليهم نزلو بالدفوف .. كلشي حال فيهم الفم جاو زوينين بزاف .. القاعة كان عامرة بالناس جميع المعارف من جميع الفئات .. امير شاد فيد نهى .. شوية طلعوهم فالعمارية .. كانو بحال شي عصفوربن زوينين بزاف .. كيحيو المعارف .. نزلو من العمارية ودخلو باش يلبسو اللبسة الثانية .. دخلات نهى من واحد الدروج وامير من درج اخر على اساس يتلقاو فاللبسة الثانية كل واحد يخرج من جيهتو ويتلاقاو فالوسط .. دخلات نهى ولبسات اللبسة الثانية .. خرجات ونزلات فالدروج كلشي كيترقبها وامير نازل من الدروج الاخور تمشاو على الطابي غوج حتى تلاقاو وهاد المرة بموسيقى هادئة بقاو كيضورو على الناس وكيسلمو عليهم .. جلسو فالطابلة المخصصة للعروسين .. حطو الماكلة وكلاو بكل هدوء وفرح .. بعد الماكلة طلعو يلبسو لبسة اخرى .. لبساتها النكافة وسط النشاط .. تصورو مع الاصحاب والاحباب .. طلعات باش تلبس كسوة العرس واللي بعدها غاتقطع la tarte .. وغايتصورو وغايمشيو يركبو فالطيارة اللي غاتديهم للمالديف .. بقات النكافة كتصاوب للعروسة حتى جهزاتها بكسوة زوينة .. جات هاجر .. 
- لالة العروسة .. لالة البكوصة .. ههه 
- انا فيا الستريس .. 
- مالك على حالتك .. فخبارك امير نزل وكيستناك فالقاعة .. 
- قلبي مقبوظ معرفتش علاش .. 
- انا غانكب ليك كاس دالماء جلسي .. رتاحي شوية 
- ولكن غانتعطل عليه .. 
- خليه يستنى مالو غاتجيه خمسة دقايق طويلة .. المهم هو ترتاحي .. هادي غا ستريس دالعروسة حيت اول مرة .. متخافيش .. 
- واخا خلينا شوية .. 
- شوية دابا .. 
- اه خلينا نزلو .. 
بدون سابق انذار تسمع دوي انفجار قوي بزاف فالقاعة .. الشيء اللي خلق زلزال فالمبنى .. طاحت نهى وهاجر وحتى النكافات اللي كانو معاهم .. وبالخلعة بداو يحاميو على ريوسهم حيت كلشي بدا كيطيح .. انفجار مرعب بزاف .. كلشي طاح.. وارتفع صوت الغواات .. 
نهى : (بصدمة) اش واقع .. اشنو كان هادشي .. اش واقع 😱
هاجر : تهدني .. معرفتش .. انفجار قوي بزاف.. خليك هنا انا غانمشي نشوف 
غا حلات هاجر الباب دخل معاها دخان كثيف .. سداتو دغيا ..وبدات يتسمع صوت صافرة الحريق.. 
هاجر : هادشي كيخنق .. منقدرش نخرج .. 
نهى : انا خاصني نمشي نشوف اش واقع امير وبابا وماما ورامي تما .. انا خاصني نمشي نشوفهم .. 😰
هاجر : اجي لهنا واش باغا تموتي تما .. 
نهى : اميييير.. ماماااا .. بابااا.. انا خايفة عليهم بزاف.. 
هاجر : تهدني .. انا غانتاصل بيهم .. اكيد هما غايجيو دابا يعتقونا .. 
نهى : اميير 😭 
هاجر: اجي تشوفي من السرجم .. دخان كثيف بزاف كيخرج من الفندق .. شي حاجة طرطقات ودارت هاد الحالة .. 

الخطيئة- الحلقة السادسة 
تأليف دودي العيساتي .. تسمع صوت صفارات الانذار والغوات ديال الناس ..
هاجر: كلشي كيهرب .. 
نهى: انا مغانبقاش هنا جالسة غانمشي نشوف عائلتي .. 
نزلات نهى بكسوة العرس .. مشات كتجري والدخان ملأ المكان.. بدات كتكح حيت الدخان خنقها.. حيدات الطرحة ودارتها على نفها وفمها .. كملات الطريق حتى خرجات للقاعة .. صدمها المنظر اللي شافتو قدامها .. مئات الجثث .. والاشلاء ديال الناس .. العرس تحول لمجزرة .. وبعض الطبالي نايضة فيهم العافية جراء الانفجار .. بقات كتعيط 
نهى :.. ماما 😰😭 .. بابا.. امييير فينكم .. 
بقات كتمشى بين الجثث .. المناظر كانت مرعبة بزاف .. الدم فكل بلاصة .. شوية وهي تلقى صاحب البذلة البيضاء اللي ولات حمرا بالدم .. امير ووجهه كله مشوه بالدم .. عرفاته مقدراتش تقيس فيه .. 
نهى : امييير 😭😭 امير جاوبني عفاك متخلينيش .. امير .. 
بقات كتبكي حتى بدات كتسمع صوت انين شي واحد .. كان كيعيط باسمها .. ناضت وبدات تقلب على مصدر الصوت.. لقاتها اخيرا الام ديالها .. كتهضر بصعوبة وكلها دم 
مونيا : نهى .. بنتي 😩
نهى : ماما عفاك قاومي .. انا غانطلب المساعدة عفاك اماما متخلينيش .. كح كح .. 
مونيا : خرجي من هنا عتقي راسك 😖 
نهى : غانعتقك اماما مغانخليكش بوحدك هنا .. 
فجأة شافت باباها حدا ماماها وهو جثة هامدة .. 
نهى : 😰 بابا 😢😭.. 
مونيا: عفاك ابنتي خرجي من هنا .. 
شوية وصلو رجال الاطفاء والاسعاف .. دخلو للقاعة.. 
الرجل : لالة خاصك نخرجي من هنا .. 
نهى : كح كح .. عفاك عتقو ماما .. عفاك .. 
الرجل : متخافيش حنا غانقومو باللازم .. 
خرج الراجل نهى وهي بكسوة العرس .. شافت جيهة جثة امير .. حطات يدها على فمها وتخصصات .. وخرجات .. لقات فالزنقة الناس مجموعين بزاف .. كلشي كيهضر .. حالتها تشفي .. وهي بالكسوة دالعرس .. العروس اللي تحول اجمل يوم فحياتها الى جحيم ..مبغاتش تمشي فسيارة الاسعاف للسبيطار اختارت تبقى تستنى امها .. بقات جالسة وصوت الناس فودنيها .. تعالت الاشاعات .. كل واحد واش كيقول سبب الانفجار .. هي مفكرات فحتى حاجة .. غير عائلتها .. شوية بانليها مخرجين شي واحد وصراخه مسموع بقوة الالم اللي فيه .. 
نهى : رامي .. 😭 رااامي .. 
رامي : 😭😭 ختي انا فيا الحريق بزاف .. 
نهى : صبر عفاك .. غاتكون لاباس .. عفاك صبر .. انا معاك .. 
دخلوه فالاسعاف .. شوية خرجو الام مونيا .. وتقريبا هاد المرة كانت فاقدة الوعي .. 
نهى : ماما 😭 
مشات طلعات معاها فالطوموبيل دالاسعاف .. وهي خايفة عليها .. شادة فيدها .. 
نهى : عفاك اماما متخلينيش بوحدي .. عفاك 😭 نتي اللي باقالي.. متخلينيش حتى نتي وتسمحي فيا .. 
وصلو للصبيطار نزلو مونيا بسرعة دخلوها لغرفة العمليات.. بقات نهى كتستنى بقلق كبير وركابيها ماهازينهاش .. شوية بداو كيوصلو الضيوف المصابين .. وهي كتشوف فيهم .. 
نهى : كلشي هادو تصابو فعرسي انا 😭
شوية جات هاجر كتجري تقلب على نهى.. 
هاجر : حبيبة .. سولت عليك قالولي راكي هنا .. كاين شي خبار على ماماك ..
نهى : مازال 😭 انا خايفة عليها بزاف ..
هاجر: نهى عارفة انه ماشي وقته .. ولكن لابد تعرفي ان باباك وامير .. 😪 البراكة فراسك .. 
شدات نهى على فمها وزيرات عليه ..
نهى : انا السبب 😭 بسبابي انا ماتو .. 
هاجر : مديريش فراسك هاكا .. كوني قوية عفاك
نهى : فيناهما دابا 😭 
هاجر : دخلوهم لمستودع الاموات .. البوليس بغاو يديرو معاك الاستجواب .. ولكن قلتليهم مغاتقدرش دابا .. 
نهى : علاش .. انا قلبي كان حاس انه غاتوقع شي حاجة .. شنو وقع .. باش وقع هادشي كله
هاجر : قنبلة .. 
نهى : 😨 شنو؟؟ 
هاجر: شي حد حط قنبلة موقوتة .. وهي اللي سببات هاد الدمار كله .. 
نهى: شكون دارها .. وعلاش .. 
هاجر : مازال معرفناش .. ولكن البوليس هما اللي غايعرفو .. وغايخبرونا بكلشي.. 
شوية خرجو مونيا وهي مغيبة .. 
نهى : ماما 😭 .. عفاك ادكتور .. قولي حالتها .. 
الدكتور: منكدبش عليك ابنتي.. حالتها ماشي مستقرة .. دعيو ليها .. 
نهى : الله يا ربي 😭 ماما عفاك متخلينيش 
هاجر : تهدني انهى ان شاء الله غاتكون بخير .. 

نهى : واش نحزن على امير ولا على بابا ولا على ماما .. كيفاش نصبر .. 

الخطيئة- الحلقة السابعة ..
تأليف دودي العيساتي .. 
مشات نهى عند خوها رامي .. 
رامي : ختي 😭 
نهى : الحمد لله على سلامتك .. 😭
رامي : ختي انا فيا الحريق بزاف ..
نهى : متخافش نتا راك لاباس .. غا حروق بسيطة وغاتبرا دغيا .. 
رامي : فين ماما وبابا ..
نهى : دعي مع ماما 😭 .. اما بابا .. الله يرحمه 
رامي : 😭😭 لاا .. 
نهى : نتا راجل خاصك تصبر .. قولي شنو وقع 
رامي : معرفتش .. كنت فالكولوار .. حتى سمعت الانفجار .. ومحسيت الا بجسمي كيحرق كله .. 
نهى : 😢 .. 
بقات نهى غادية جاية فالكولوار ديال السبيطار وهي بكسوة العرس .. كتستنى اي خبر على امها 
في مكان اخر .. ويالتحديد فملحق الفيلا.. 
المصطفى: شفتي اش وقع .. الله يستر .. العرس دنهى تقلب مجزرة .. والسي نعمان والسي امير ماتو .. 😢.. ديك البنت متستاهلش هادشي كله
الضاوية : الله يا ربي .. فوقاش هادشي .. عمر اجي تسمع .. 
عمر : شنو كاين ... 
الضاوية : شتي اولدي اش وقع لنهى مسكينة .. 
عمر : 😳 مالها نهى ؟ 
الضاوية : قالك .. 
شوية سمعو الدقان بالجهد 
الضاوية: اش هادشي .. شكون كيدق علينا بهاد الطريقة .. 
حل المصطفى الباب .. دخلو رجال بسرعة .. 
الضابط : فين هو عمر الخالدي 
عمر : انا هو .. شكون نتوما .. 
الضابط : معانا امر بضبط واحضارك .. جيبوه..
الضاوية: اويلي طلقو ولدي اش دار .. عمر عماار
المصطفى: الله يحفظك اسيدي قولينا اشنو التهمة ديالو .. حنا ناس شادين تيقارنا عمرنا تعدينا على شي واحد .. 
الضابط: فين هو بيته .. فتشوه مزيان .. الو بغيتو تعرفو اشنو للتهمة ديالو اجيو الكوميسارية .. وكنصحكم تجيبو معاكم محامي يكون مجهد .. 
داو البوليس عمر .. والضارية بقات كتغوت موراه 
فالتحقيق ..
عمر : اشنو درت انا .. 
الضابط : معرفتيش اش درتي .. قولي اعمر .. اشنو علاقتك بهاد الناس .. 
عمر : اينا ناس.. 
الضابط : اللي فالتصاور شوف فيهم مزيان .. 
عمر : عمري شفتهم فحياتي .. 
الضابط : مكتعرفش هادو ؟ ابو حمزة .. ابو عصام .. ابو بكر .. ابو حفصة .. 
عمر : قلتليك عمري شفتهم فحياتي .. 
الضابط : الانكار مغاينفعكش .. احسن ليك تعتارف باللي هاد نتا عضو ضمن هاد الجماعة الارهابية .. 
عمر : انا معارفش علاش نتوما جايبيني هنا .. وشنو التهمة ديالي واينا جماعة ارهابية .. 
الضابط : نتا متهم بتفجير فندق السي نعمان القايدي اللي تقام فيه عرس بنته واللي مات فيه ازيد من 160 شخص .. 
عمر : شنو 😳 .. تفجير.. 
الضابط : قولي اعمر.. شنو علاقتك بنهى؟ .. 
عمر : معندي بيها حتى علاقة .. ومفجرت حتى حاجة انا .. 
الضابط : اذا شنو كنتي كدير فالفندق فوقت العرس .. 
عمر: انا ؟؟؟ 
الضابط : تسجيلات الفندق بيناتك دخلتي وخرجتي في خفاء للفندق وبالضبط لقاعة العرس .. تقدر تقولينا اش كنتي كدير تما .. 
عمر : 😓 
الضابط : يعني سكتي ؟؟ انا نقوليك اش كنتي كدير تما .. مشيتي تشتت العرس ديال حبيبة قلبك حبيبة الطفولة .. لقينا هاد الخواطر والصور فالبيت ديالك.. طبعا نتا متسرطاتش ليك ان حبيبة قلبك يتزوجها واحد اخور .. فقتلتيه ورونتي العرس .. 
عمر : هادشي كدوب مامنوش .. 
الضابط : حبيبتي نهى .. اشتاق اليك.. لن تكوني لاحد غيري.. ماشي هادو الخواطر ديالك؟؟ 
عمر :علاش تجبدولي وراقي.. 
الضابط : نتا متهم دابا .. ومنحقنا هادشي .. هادا دليل ادانة ليك .. غاتدوز حياتك كلها فالحبس .. واش معندك قلب .، واش مبقاوش فيك كاع دوك الابرياء اللي ماتو 
عمر: انا مقتلت حد .. 
الضابط : نتا غاتعتارف وتقولينا شكون معاك ،، وشكون كيدعمك .، حسن ليك.. 
فالمستشفى.. 
هاجر : نهى انا جبتليك حوايج تبدلي الكسوة ديالك .. 
نهى : انا مقاداش نتحرك من هنا .. 
هاجر : عفاك كولي شي حاجة .. وبدلي حوايجك .. متديريش فراسك هاد الحالة .. 
نهى : ماما هي اللي بقاتلي .. انا واقفة على قبلها .، جداتي كيفاش غاتكون حالتها مللي تعرف ان ولدها ماات .. هاجر عفاك وقفي معاها 
هاجر: متخافيش عليها هي ايمانها قوي .. وغاتصبر .. 
الضابط : السلام الالة .. ممكن نهضرو معاك؟ 

الخطيئة- الحلقة الثامنة .. 
تأليف دودي العيساتي 
نهى: السلام.. شكون نتا 
الضابط: البوليس .. ممكن نهضرو معاك شوية ..
هاجر: سيدي واش نتا مشايفش باللي حالتها خايبة ومغاتقدرش تهضر.. 
الضابط: البراكة فراسك الالة .. ولكن ضروري تفيدينا باش هاد المتهم اللي شديناه ينال جزاءه
نهى: واش شديتو اللي دار هادشي؟ 😳
الضابط : اه شديناه .. والادلة كلها ضده .. ولكن مبغاش يعترف .. تقدري تفيدينا نتي الالة .. حيت تقريبا الدافع دالجريمة هو نتي.. 
نهى: انا .. شنو علاقتني انا .. وشكون هادا واش انا كنعرفه.. 
الضابط: عمر الخالدي .. ولد الناس اللي خدامين عندكم.. 
نهى: 😳 عمر.. عمر؟؟!! انا مامتيقاش .. مستحيل عمر يديرها .. 
الضابط: كاميرات الاوطيل رصداتو وهو داخل وهو خارج .. واش نتي شفتيه فالعرس؟؟ 
نهى: واش جا ؟؟ لا مشفتوش.. ولكن .. عمر .. علاش غايدير هاكا . علااش ..
الضابط: تقريبا الدافع عاطفي.. حنا لقينا فالغرفة ديالو مذكرات ورسائل .. كلهم بطلتهم هي نتي.. حتى اننا لقينا صور ليك مني كنتي صغيرة الى يومنا هذا.. عمر كيبغيك .. متسرطاتش ليه انك غاتزوجي واحد اخور .. عليها دار هادشي .. 
نهى: واش كنحلم؟؟ انا ممتيقاش هادشي اللي كنسمع .. انا معمرو شاف مني حاجة خايبة .. علاش .. 
هاجر: شحال حذرتك وقلتلك جري عليهم .. نتي مسمعتيش مني .. هادوك راه الحقد فقلبهم كبير .. وطماعين .. باينة حقدهم هو اللي خلا ولدهم يدير هادشي .. 
نهى: انا مقادراش نتيق .. مقادراش .. 
بقات نهى مصدومة من داكشي اللي سمعات حتى شافت الاطباء كيجريو لغرفة امها .. 
نهى : اش واقع .. مالها ماما .. 
هاجر: تهدني ان شاء الله خير 
بقاو واقفين كيستناو اش غايوقع .. حتى خرج الطبيب .. 
نهى: مالها .. طمني عفاك .. 
الطبيب : البراكة فراسك ابنتي .. 
نهى: لااااااا .. ماماااا 😭😭😭 متخلينيش بوحدي عفاك .. مااما لمن خليتيني ليمن حرام.. ماما .. 
شداتها حالة هيستيرية بعدها طاحت وهزوها دارولها ابر مهدئة.. بقات نهى فالسبيطار بانهيار تام .. 
هاجر: عفاك نوضي من حالتك .. متخليش الدنيا تكسرك .. نتي راه كتسناك شحال من حاجة .. الورث فيدك نتي .. امير نتي اللي غاتورتيه .. وباباك وماماك .. كل اعمالهم غاتكون فيدك نتي .. خاصك تكوني قوية على قبل خوك وجداتك .. وباش ميمشيش داكشي اللي بناوه والديك طول هاد المدة خسارة .. 
نهى : 😭 كلشي مشا .. كلشي .. 
هاجر؛ نهى نتي الاخت الكبيرة والوحيدة لرامي .. وخاصك توقفي معاه باش ميحسش انه بوحده فالدنيا .. وجداتك حتى هي .. وزايدون خاصك توقفي على دفنهم .. والجنازة حتى هي .. واش بغيتي الناس يجيو ومايلقاو شكون يعزيو.. هادا اقل واجب خاصك ديريه لوالديك .. اكراما ليهم .. خاصك توقفي على جنازتهم نتي .. ولا بغيتيهم يغضبو عليك .. 
نهى: لا .. باراكة غير انا السبب فموتهم .. باراكة انا السبب .. 
هاجر: متحمليش راسك ذنب ماشي ديالك .. نتي شنو ذنبك الى كان هاداك عمر كيبغيك وقتل شحال بحقده .. 
نهى: انا خاصني نشوفه .. ونعرف علاش .. علاش دار هاكا .. علاش .. ضروري نشوفه .. 
هاجر: قوي راسك ونوضي باش توقفي على مراسيم دفنهم .. وخليك من عمر .. باش ميشد معاك شي ضد هاداك سفاح ويديرها .. 
نهى: شحال من جنازة .. وشحال من دفن غايوقع بسبابي ... 
هاجر: متحمليش راسك الذنب .. الذنب ديال عمر ماشي ديالك نتي .. 
خرجات نهى من السبيطار هي ورامي ومشاو للدار .. غا دخلو من الباب وهو يطيح عليهم الضيم .. 
رامي : اول مرة ندخل للدار وانا عارف انهم مكاينينش فيه .. 
نهى: والاسوء انهم عمرهم مغايبقاو فيه .. 
الخدامة : لالة الجدة بغات تشوفكم .. 
نهى : واخا .، اجي ارامي نشوفوها ولكن شد راسك قدامها .. 
دخلو للبيت عند الجدة .. غير شافوها مقدروش يصبرو .. بداو كيبكيو مشات حضنوها وبداو كيبكيو .. 
الجدة : صبرو اولادي عفاكم .. هادا قدر .. 
نهى : جدة نتي اللي بقيتي لينا فالدنيا .. 
الجدة : اللي يحفظكم ليا .. نتي انهى دابا مرا وكبرتي حتى نتا ارامي .. دابا وليتي راجل .. وقادر تهز راسك .. وليتي الراجل ديال الدار .. كون على قد مسؤوليتك .. 
نهى : امير غايديها فقرايتو.. انا اللي غانتكلف بالخدمة ديال بابا وماما .. حتى يكبر ويولي راجل ديك الساعة يوقفلينا على الخدمة ..
الجدة: الله يرضي عليك ابنتي ..