الخطيئة _الحلقة الرابعة

الخطيئة- الحلقة الرابعة 
تأليف دودي العيساتي 
رجعات نهى للفيلا .. وطلعات لبيتها سدات الباب .. الطباع الحساسة ديالها خلات دمعة تنزل من عينيها .. رجع بيها الزمن للطفولة مللي كانت كتجلس فالارجوحة وكيجي عمر كيخلعها .. 
عمر : خلعتك.. 
نهى : اه 😢 
عمر : متبكيش .. حيت ايلا بكيتي حتى انا غانبكي معاك .. 
نهى : صافي واخا .. 
عمر : شوفي شنو سرقت لماما .. 
نهى : ههه ناري ايلا شافتك مشيتي فيها .. 
عمر : اش غاندير .. هاد الحلوى كتعجبك بزاف .. وضروري نجيبهالك .. ماشي مشكل ناكل العصا على قبلك .. 
نفس الذكرى استرجعها عمر وهو ماشي فطريق البحر .. 
كان كلشي غادي مزيان .. ونهى معايا .. حتى واحد النهار جات عندي وقالت .. 
نهى : عمر .. فينك اعمر .. اجي تسمع .. 
عمر : شنو كاين ... 
نهى : انا غانمشي نقرا مع امير ولد صاحبة ماما 
عمر : تقراي فين 😨 
نهى : فامريكا .. كما كتعرف هو مشا شحال هادي .. قالت ماماه لماما راه القرايا تما مزيانة 
عمر : 😓
نهى : عمر واش مفرحتيش ليا .. 
عمر : نتي غاتمشي ومغانبقاش نشوفك ..
نهى : اجي معايا .. حتى نتا تكمل قرايتك تما .. 
عمر : ميمكنش .. بابا معندوش امكانية يقريني برا .. وزايدون هو باغيني نعاونو هنا .. 
نهى : عمر متخافش انا مغانغيبش بزاف .. غادي نبقى نجي فكل عطلة .. مغنغيبش متخافش .. 
ومشات نهى .. سافرت تقرى وموفاتش بالوعد ديالها .. تسنيت وتسنيت ..وماجاتش حتى النهار اللي غايتبدل فيه كلشي .. نهار اللي عرفت فيه ان نهى غاتجي .. صحابلي على قبلي .. ولكن فالحقيقة جات باش تحتفل هي وامير بالخطوبة..تصدمت بزاف .. واختفيت .. وتأزمت .. بكيت حتى شبعت .. ومازال دموع القلب منشفو .. من داك النهار قررت نكون واحد اخور ..ختاريت نبعد .. تبعت الطريق اللي تخفف عليا الم فراقها .. ضرني بزاف هادشي اللي درت اليوما .. ولكن هادشي ميجي حتى حاجة قدام النار اللي فقلبي .. مكرهتش نقتلو ومنخليهش يقرب منها ..نهار عرسها .. تمنيت انه ميجيش ابدا .. 
دقات الضاوية على نهى فبيتها .. 
نهى: دخول .. 
الضاوية: بنتي .. سمحيلي بزاف على داكشي اللي دار عمر.. مسحيها فيا الله يهديك .. 
نهى : خالتي .. عمر تبدل بزاااف.. معرفتش علاش .. 
الضاوية : بنتي راه عمر قلبه طيب بزاف .. ولكن معرفتش اش طرا ليه .. بعدما تجمع مع شي وحدين ولا عصبي بزاف وولى كيحرم ويحلل شي حوايج اللي مفهمتش علاش كيهضر عليهم .. 
نهى : انا منقدرش ننسى طفولتنا .. على قبل كلمة في لحظة غضب .. الى جا للعرس انا غانكون فرحانة بزاف .. اما الى ماجاش .. 😓 
الضاوية : الله يفرحك ابنتي ويجعل ايامك كلها افراح .. 
نهى : امين اخالتي .. 
خرجت الضاوية من بيت نهى .. ورجعات تفكر من جديد فهادشي اللي وقع ليوما .. بقات كتقلب فناموسيتها مجاهاش النعاس .. ناصت بقات كتشم الهوا فالبالكون حتى شافتو راجع للدار بقات متبعاه بعينيها فجأة رفع راسو جيهة البيت ديالها كأنه متعود يشوف تما .. تفاجأ مللي شافها كتشوف فيه ارتبك مرة اخرى ونزل راسو .. 
نهى : علاش وليتي هاكا اعمر علاش .. 😢
تأليف دودي العيساتي