الخطيئة-الحلقة الثالثة

الخطيئة الحلقة الثالثة

تأليف دودي العيساتي 

مشاو امير ونهى يتغداو .. 

امير : حياتي شنو قالك باباك 

نهى : قالي راه موجدلي مفاجأة.. 

امير : ديالاش 😳 

نهى : نهار عرسي .. كادو دعرسنا .. 

امير : مقالكش شناهو هاد الكادو .. 

نهى : لا مقالش .. 

امير : حبيبة واش ممكن تتخلاي عليا شي نهار .. 

نهى : اش هاد الهضرة .. انا كنبغيك بزاف وحتى حاجة مغاتخليني نتخلى عليك .. 

امير : كنبغيك بزاف الملاك ديالي .. 

مشاو امير ونهى للاوطيل ديال الاب دنهى وبقاو كيتفقدو القاعة اللي كانت على اعلى مستوى .. جاهز ليقام فيها زفاف اسطوري لابنة صاحب الاوطيل .. التريتور والطبالي والعمارية والتزيين .. حتى الفرق الموسقية اللي غايغنيو .. كلشي جاهز .. كلشي اللي خدامين فالاوطيل كيباركو للعروسين .. 

نهى : هادشي زوين بزاف وكيفما تمنيتو بالضبط 

امير : اكيد غايكون زوين علاه شحال من نهى عندنا ،... 

شدات فيد امير وقالت 

نهى : حياتي كنبغيك بزاف .. شوف الورود فكل بلاصة وغوز كيفما كنحبها .. والاضاءة واعرة بزاف .. 

امير : شوفي حتى البوفي .. 

بقاو كيضورو وكيشوفو .. حتى جا الاب .. 

نعمان : كيجاك هادشي ابنتي .. 

جرات عنقات باباها بسرعة 

نهى : بابا كنحماق عليك .. 😍 

نعمان : مازال مقلتلك المفاجأة .. 

نهى : واش كاين شي مفاجأة كتر من هادشي 

نعمان : اكيد بنت نعمان القايدي خاصها تتفشش ما امكن .. 

نهى: مقلتيليش اشناهيا المفاجأة .. 

نعمان : شهر عسل فالمالديف .. انا حجزتليك ووجدتليك كلشي .. من العسل للطيارة .. 

نهى : وااااو 😍😍 كنحماق عليك ابابا .. 

امير : كنشكرك بزاف اسي نعمان ولكن انا كنت وجدت نسافرو لاسبانيا.. 

نعمان : 😏

نهى : ماشي مشكل مللي نرجعو من المالديف نمشيو لاسبانيا .. 

نعمان : ثقيل على القلب .. معرفتش اش بغات فيه هادا .. تهلاي فراسك ابنتي نتشاوفو فالدار .. 

نهى : واخا ابابا .. 

امير : مفهمتش علاش باباك مكيحملنيش .. 

نهى : حياتي نتا عزيز عليه بزاف غا هو مقدرش يستوعب اني غانتفارق معاهم .. هو غايحسبك ولده بعد الزواج .. متخافش 

امير : على الله.. خلينا نمشيو نشوفو اش دارو فالماكلة .. 

نهى : ماشي مهم انا معتمدة على ماما فهادشي..هي اكيد غادير حوايج طوب .. وصلني للدار .. حيت تابعاني بزاف من حاجة .. 

امير : اذا نتلاقاو غدا ندوزو النهار مرا 

نهى : ههه حياتي غا يوماين وغانكونو مرا ديما .. غدا غاندوز النهار فالبيوتي سونطر ..غاندير الصونا .. وحوايج اخرين 😉

امير : حياتي نتي ماتحتاجيش .. نتي زوينة خلقة

نهى : زيد وصلني ههه .. 

مشاو للدار وطلعت لنهى لبيتها .. بقات جالسة شوية مع الكلب ديالها روكي .. من بعد مشات تتفقد لائحة المدعووين اللي دارت ماماها .. 

مونيا : بنتي الحبيبة .. 

نهى: ماما .. انا شفت القاعة اللي غايتقام فيها العرس .. زوينة بزاف .. 

مونيا : هادا اقل حاجة نديروها لبنتنا .. اش كديري كتشوفي المدعووين .. راني صيفطت ليهم كلشي دعوة .. 

نهى : منسيتي حتى وحدة من صحاباتي ياكي 

مونيا : كلشي صيفط ليهم دعوة .. 

نهى : خالتي الضاوية .. وعمي المصطفى 

مونيا : ممم الضاوية غاتقابل جداتك .. اما المصطفى فغايقابل الفيلا .. 

نهى : ماما .. واخا 😔 

مونيا : طلقيلي هاد الضحكة .. راه عرسك بعد غدا .. بغيتك تكوني اسعد وحدة فالدنيا .. متهزي الهم لحتى حاجة.. كلشي غايكون كما بغيتي .. وبغيت نقولك .. باللي الزواج احبيبة ماشي نهار عرس وصاف .. الزواج حياة .. بغيتك كما غايتهلا فيك امير تهلاي فيه حتى نتي .. ومللي تكوني ام .. تهلاي فوليداتك .. كوني ليهم الام الحنون .. 

نهى : واخا بغيت نعطي الحب والحنان لولادي .. مغاديش نقدر نعطيهمليهم قد الحب والحنان للي عطيتو ليا نتي وبابا .. 

مونيا : وبغيتك تولي تعتمدي على راسك .. وتعرفي اني انا وباباك مدايمينش ليك ديما .. 

نهى : اش هاد الهضرة كتقولي اماما الله يطولينا فعمرك .. انا منقدرش نعيش بلا بيكم .. 

مونيا : هاد الهضرة ضروري نقولهالك ابنتي .. حيت حتى واحد مضامن عمره .. 

نهى : علاش كتهضري بهاد الطريقة اماما 😥

مونيا : متخافيش احبيبة .. يالله زيد لالة العروسة مخاصهاش تحزن ... فرحي .. ونشطي ..

مشات الام وبقات نهى كتفكر فهضرة ماماها .. اللي شطناتها .. خرجات هي والكلب ديالها للجردة وبقات كتشم الهوا .. شوية بانليها عمر داخل وحاني راسو كالعادة .. شافته دخل لدارهم .. مشات تبعاتو ودقات فالدار .. فتحات ليها الضاوية 
الضاوية : نهار كبير هادا مرحبا بلالة العروسة دخلي ابنتي دخلي .. المصطفى اجي تشوف شكون جا عندنا.. 
نهى : مساء الخير اخالتي الضاوية .. 
الضاوية : جلسي ابنتي .. تفضلي تفضلي .. 
نهى : جيت بغيت نعرضكم للعرس ديالي ونعرض حتى عمر .. 😅 
الضاوية : عمر عمر .. 
مشات كتجري الضاوية لبيت عمر حلات عليه الباب لقاتو متكي .. 
الضاوية : عمر نوض تشوف شكون جا عندك هادي نهى جات عندك 
هو غا سمع سمية نهى ناض دغيا مرتبك .. وبدا العرق كينزل منه بقوة التوتر .. جات من مور الضاوية نهى .. 
نهى : عمر لاباس عليك .. ☺️ 
حنى راسها ومشافش فيها .. وبصوت خافت 
عمر : اه لاباس .. 
نهى : انا جيت نعرض عليكم لعرسي .. نتا ضروري خاصك تجي .. 
تصدم مللي قالتلو هاكاك سكت شوية ورفع راسو بحزم .. 
عمر : بغيتيني نجي لحفلة الفسق والفجور اللي غاديروها .. 
نهى : 😳 انا اسفة بزاف .. 😔 
خرجات بسرعة نهى ومشات وهي مصدومة من ردة فعل عمر اللي قاليها هضرة كتجرح .. 
الضاوية : اش هادشي قلتيه للبنت .. بدل متفرح حيت نزلات لمستوانا ودارتلك قيمة وجات تعرض فيك .. 
خرجات الضاوية تتبع نهى باش تراضيها .. اما عمر فضرب يدو بالجهد مع الحيط .. بعدها حط يديه بجوج على راسو .. شوية هز كتاب وخرج 
تأليف دودي العيساتي