الدية -الحلقة الرابعة والاربعون

الدية- الحلقة الرابعة والاربعون .. 
تأليف دودي العيساتي ... فاقت عالية وفيقات عيشة باش يمشيو للمحكمة ومعاهم اكرم .. باش تسجل بنتها باسمها وفجهة اخرى ناض مراد بكري باش يمشي يشوف عيشة .. مشا لدار العالية لقا عيشة وعالية خارجين مع اكرم وراكبين طوموبيلته .. تبعهم وبقا تابعهم حتى وصلو للمحكمة .. نزلو وحتى هو نزل دغيا .. لمحاتو العالية ووقفات .. 
اكرم : ماما واش مغادخليش ...
عالية : سيرو نتوما .. انا غانتبعكم دابا غاندير مكالمة .. 
اكرم : واخا .. يالله اعيشة .. 
دخلو وهي بقات برا .. شوية اتجهات لعند مراد 
عالية : اهلا بولد سامية.. سليل الريان .. 
مراد : انا سميتي مراد ..
عالية: عارفة،. وعاقلة عليك مزيان .. بالامارة كنتي عزيز على عمك ربيع بزاف .. 
مراد : فين كتعرفي عمي ربيع .. 
عالية: انا عارفة بزاف دالحوايج ،، كما عارفة انك مخاصكش تكون هنا ... فرق عليك بنتي اولد الناس .. وباراكة غير داكشي اللي شفنا منكم انا وياها .. 
مراد : انا مفهمتش شنو كتقصدي ولكن انا مكيهمنيش هادشي كله .. كتهمني غير عيشة .. 
عالية: عيشة باراكة عليها داكشي اللي شافت منك .. باركة .. هي غاتبدا حياة جديدة مع اكرم .. وغاتنساك وتنسى الماضي القذر ديالها معاك
مراد : مستحيل .. هي هازة فكرشها مني.. مستحيل نخليها تكون لشي واحد اخور .. 
عالية : الى قربتي من بنتي غادي ندخلك الحبس ،. فهمتي .. ومغايكفينيش موتك الى وقعات ليها شي حاجة .. وسمعني مزيان ،. هادي اخر مرة كنشوفك كتضور بيها .. حنى داخلين دابا نديرو الاجراءات ديالها .. وكنحذرك الى قربتي منها غادي نوريك الوجه لاخور ديالي .. 
مراد : عيشة مستحيل تقبل تكون مع واحد اخور من غيري .، 
عالية : على اساس شافت معاك ايام زوينة .. ولا بأمارة الايام الكحلة اللي دازو عليها معاك... هضرة وحدة هي اللي كاينة .. ونزيدك .. عيشة هي اللي باغا تبدا حياة جديدة مع اكرم.. 
مشات عالية وخلات مراد حال فمه ومصدوم .. مستحيل عيشة ديرها .. ولكن علاش لا .. هي اكيد محاملانيش بسبب داكشي اللي دوزته عليها .. انا منقدرش نعيش بلا بيها ..
كمل اكرم وعيشة شغلهم ودفعو الملف ديال التسجيل ديالها .. 
اكرم : واخيرا .. 
عيشة : الحمد لله .. 
عالية : بنتي مبقا قد ما فات ونرجعو نعيشو اسرة عادية.. غانسافرو من هنا .. وغادي نبعدو على هاد الناس كلهم ،، 
عيشة: نسافرو ؟؟؟ 
عالية : اه .. 
عيشة : ولكن .. 
اكرم : امم شنو رأيكم تدوزو معايا للسبيطار منها نطمئنو على الجنين دعيشة .. 
عالية : فكرة زوينة 
مشاو للسبيطار داخلين ناشطين ... 
الممرض: السي اكرم بغاوك فالمختبر 
اكرم : نكمل ونجي .. 
دخلو واتاجهه لمصلحة النساء .. ذخلو للطبيبة بعدما فحصات الطبيبة عيشة ..
الطبيبة: واش كتعرفي جنس الجنين .. 
عيشة : لا .. 
الطبيبة : عندك الالة بنتيتة .. 
عيشة : 😍 حبيبة قلبي .. 
اكرم : اكيد غاتكون تشبه ليك .. 
العالية : الله يحفظها لينا 
الطبيبة : راكي فست شهور الالة .. خاصك تتهلاي فصحتك شوية .. حيت جسمك ضعيف .. 
اكرم : اكيد غانتهلاو فيها .. 
ناضو من تما وهما فرحانين بزاف ودعو اكرم ومشاو .. تأليف دودي العيساتي