العرافة -الفصل الاول -الحلقة 1

العرافة -الفصل الاول -الحلقة 1

العرافة- دودي العيساتي 
شفت الليل ونجومه.. شفت النهار ونوره..شفت البحور ومواجه.. شفت العين واللي بغاها.. شايفة كلشي انا .. العرافة .. اسمي مرجانة ساكنة ففيلاج كبير ولكن اسواره كلها معزولة على بعضها فالقمة كاين السلاطين ديالها وقصورهم وفالقاع كاينين حنا .. ولاد الخبز الخافي .. فعمري 30 عام وحيدة والديا .. واحد النهار وانا عمري تسعة سنين غبت على عائلتي وبقاو كيقلبو عليا وبعدها لقاوني عايمة فوق الواد كلشي غوت وقال هادي ميتة لامحالة هزوني وغطاوني حليت عيني بانتليا مرا شارفة بزاف دوزات يديها على وجهي حسيت لحمي تبورش كله وشداتني السخانة من رجليا حتى لراسي تنفست فجأة وفقت وحتى واحد معرف شنو شفت ولا شنو وقعلي .. بوحدي كنت خايفة وفكل مرة كانت تبانلي الشارفة من بعيد وانا خايفة حتى لواحد النهار مبقيتش شفتها .. حسيت برعدة وحدة ومن تما وليت كنعرف كلشي بلا منحس .. نسمة وحدة تخليني نعرف شكون دار وشنو غايدير .. الغريب فهادشي كله انه حتى واحد معرف اني قادرة ندير هادشي .. خفت يقتلوني حيت فهاد الفيلاج غايقولو عليا ساحرة وغايقتلوني انا ماشي سحارة انا عرافة 😈
جنب الواد وحنا كنسقيو بحال كل مرة .. 
البنت1: هههه بلاتي نسقي يمكن يدوز زهري ويديني .. 
البنت2:يديك الواد ههههه 
البنت3: ههه سكتو قالو ولد الشيخ الغرفي زوييين وواعر وكيحمق 😍
البنت1: مشيتي بعييييد شكون غايديها فينا فهادوك .. هاداك باينة غايتزوج شي اميرة بحالو 
مرجانة: ومالنا حنا ماشي عيالات ؟ 😌
البنت3: نتي بالضبط لا هههه نتي راكي كبرتي وفات فيك الزواج صافي 
البنت2: والله مكدبتي 
مرجانة : ديك الساعة نشوفو 😈
بحال ديما بقاو كيستهزأو بيا عادي .. بحال كل مرة ولكن غانفاجأهم هاد المرة حيت خططت ليها .. غاندخل قصر الشيخ بأي طريقة وغانولي كنتهم 
الشيخ الغرفي من اكبر اثرياء البلاد .. عندو قصر كبير وثلاثة الاولاد .. كبيرهم اسمه قُصٓيْ والثاني مازن والثالث فريد .. كلشي عارف ان اذكاهم فريد وهو العزيز على باه وافشلهم الكبير قصي .. اللي مع ان باك كيمشكو زمام الامور الا انه ديما كيحشمو مع كلشي فاشل وكيحماق على البنات وسكايري .. حتى فالخدمة ديالهم ديما فريد ومازن عاتقين الوضعية .. 
الغرفي: واش انا والد الرجال ولاالشمايت .. اش هادشي كلشي خاص يعرف ان ولاد الحاج الغرفي شداد واقوياء بحال باهم .. وكلمتهم مسموعة ... 
فريد: حنا فيدك ابا وهبتك هي هبتنا 
قصي : ااه ابا اه حنا اقوياء 
الغرفي : نتا سكت حسن ليك .. يا ريتني ولدت بنت ولا ولدتك نتايا .. السكايري .. لا قولي مرة وحدة فرحتيني فيها وهضرت عليك بالفخر .. ديما كنحني راسي وانا كندكرك .. اللي محشمني حتى بنت الحاج الرافعي اللي خطبتهالك طجات منك بفعايلك 
قصي: انا الواليد .. 
الغرفي: سكتنا .. 
رجعات مرجانة لجنب الواد وجلسات بوحدها .. حتى رفعات راسها وشهقات بعمق ..: اهو جاي 
خرج قصي بالعود ديالو حتى وصل جنب الواد شاف مرجانة وهي كتلعب برجليها فالواد .. قرب منها على اساس يتغزل بها كما كيديرمع اي مرا كيشوفها .. حتى وصل عندها ..
مرجانة : قصي ولد الشيخ الغرفي .. 
قصي :😳 كتعرفيني؟ اه انا ولدو 
مرجانة: ديما مغموم حيت باباك مبغاش يرضي عليك واخا درتي اللي درتيها .. هو شايف خوتك حين منك 
قصي : (وقف) باش عرفتي هادشي كله شكون نتي 
مرجانة: شايف هاد الماسة ..ديها للباك .. وريهالو والى سولك قولو لقيتها .. قولو قلبتلك عليها ولقيتها .. وديك الساعة شوف واش غايبقى يحتقرك ولا لا 
قصي: مجاوبتينيش شكون نتي 😥
مرجانة: غادي تعرفني من بعد .. 
مشات مرجانة وخلاتو مصدوم .. بقا كيشوف فالماسة واش حقيقية ولا كان كيحلم .. رجع للعود ديالو مشا لقصر باه بسرعة .. تأليف دودي العيساتي