التشرد جعل منا مفيوزيين - الحلقة 54

الجزء 54 
بقيت كنسول ونقلب حتى لقيتو .. ولقيت دارو .. كانت فالعروبية .. وراوهلي الناس ديال الدوار ... مشيت كانت كبير فالعمر وفلاح .. شفتو وكيحرث والجسم ديالو هزيل باينة فيه الضعف والتعب .. دمعو عينيا 😢واش انا عايش حياة الرفاهية وبابا عايش هاد الحالة وحتى واحد مكيقدم ليه حتى شريبة دالما .. قربت منه .. شاف فيا دار ابتسامة بانت رغم التجاعيد اللي ماليا وجهه .. استغربت من ابتسامته .. لاح الفأس من يده وحلهم ليا .. واش كنحلم .. واش عرفني ... زعما تكون سميرة قالت ليه راني جاي .. مقدرتش نصبر كتر جريت عنقته وبديت نبكي بحال شي ولد صغير .، تحنيت عندو حيت هو بسبب كبره فالسن ولا اقصر .. حطيت راسي على كتفو شحال حلو عناق الاب حط يدو على راسي .. وعنقني بحنان وعطف .. حسيت حضنه دافئ بزاف وكأني كنت كنستناه مشحااال هادا .. متيقتش راسي .. واش مبقيتش ولد الزنقة وولات عندي عائلة .. مقدرتش نهضر بديت كنتخسس وانا فحضنه .. يااااه هاد الحضن اختصر عليا الطريق وحسيت اني كنت محتاجه فهاد الوقت بالذات .. حسيت بحال الى خويت فيه كاع الهموم والجروح اللي فقلبي وخا مازال مهضرت ..واخيرا هضر بابا وقال.. 
- ولدي .. تعطلتي بزاف .. 
- ماشي لخاطري 😭 مكنتش عارف الحقيقة حتى لدابا .. 
- سمحليا اولدي .. مقدرتش نحميك .. مقدرتش نحافظ عليك .. 
- نتا ماعليك والو .. الله ياخد الحق فاللي كان السبب .. وخطفاتني منكم .. 
- مكانتش غاتخطفك لوكان معاوناها .، 
- 😳 كيفاش 
جلس بابا على حصيرة كانت عندو تما وجلسني معاه .. بدا بابا كيكح .، 
- انا غانعاودلك كلشي .. 
- بابا واش نتا بخير .. نديك للطبيب ؟ 
- متخافش اولدي .. غا كبرت ومبقاتش الصحة كما كانت .. انا راني مزيان .. 
- انا غانديك لاكبر طبيب فالعالم .. وغاتولي لاباس .. ومغاتبقاش تخدم هنا .. غانديك معايا نتا وماما 
- ماماك 😔 الله يرحمها .. ماتت بالحزن على فراقك .. 
- 😭😭 ماتت !! 
- الله يرحمها اولدي هادا قدرها .. 
- قدر .. ولا كيد نسا .. انا غاننتقم منها على داكشي اللي دارت كله .. 
- سميرة .. ربيتها انا ومخليتها تحتاج حتى حاجة بعد موت واليدينا .. واخا كنا فقراء الا اني درت المستحيل على قبلها وتعطلت متزوجت غا باش نربيها هي ونخدم عليها .. الا انها كان عندها طموح كبير بزاف .. اكبر من حالتها الاجتماعية .. تزوجات بواحد الشاب من الدوار وداتو للمدينة وفرقاتو على عائلته مشات استقرات تما وخدمات ومعرفتش كيفاش حتى دارت الفلوس .. مكنتش قادر نتدخل فيها حيت راجلها هو اللي مسؤول عليها .. بعد داكشي تزوجت انا بأمك وولدات ليا جوج دراري توام .. نتا وخوك امير .. 
- 😳 يعني انا عندي اخ .. 
- صحيح .. وكيشبه ليك بزاف .. الفرق الوحيد اللي بينكم هو لون الشعر .. نتا شعرك بني مايل للاسود اما هو بني مائل للأشقر .. 
- عليها عرفتيني دابا 😳 يعني نتا مكنتيش عارف اني غانجي ليوما .. فقط من خلال الشبه اللي بيني وخويا .. 
- ولدي انا عشت حياتي كنستناك وكنحسب فعمرك .. كنت حاس انه غايجي النهار اللي غادي ترجع فيه .. تأليف دودي العيساتي وجوهرة مريم