الجزء 7
- ليان .. فين كنتي النهار كامل وانا كنستناك ..
- كنت كنجيب ليك الدليل اللي تيقني بيه ..
- اينا دليل كتهضري عليه ..
- الدليل على اني هضرت مع انيس ..
- اوووف .. واش باقي ماسالينا من هاد الموضوع
- لا مساليناس ومغانساليوش .. هاك شوف هاد التصاور .. هادو تصاور القصر اللي قلبنا عليه انا وياك داك النهار ومالقيناهش .. شوف مزيان .. وهاد الاليوم ديال التصاور ديال انيس وعائلته .. وهادا الساروت ديال القصر عطاهلي انيس النهار اللي تلاقينا ..
- هاد القصر قديم وموسخ بزاف .. كيفاش حتى نعستي فيه وكيفاش يقدرو يعيشو فيه انيس وامه .. هادشي اللي كتقوليه راه مستحيل .. الا فحالة وحدة اذا كانت ارواحهم هي اللي عايشة تما ..
- النهار اللي نعست فيه كان نقي بزاف .. وهادشي اللي مقدرتش نفهمو.. خاصني نعرف هادشي ونتا غاتعاوني ..
حاولت نقنع ايمن يقلب معايا .. رجعنا لنفس المكان .. ولكن هاد المرة حاولنا نسولو السكان اللي مجاورين للغابة ..
- ليان سولي داك الراجل ..
- عفاك اسيدي .. ممكن نسولك .. عائلة برهان اللي ساكنين فالغابة ..
الراجل غا سمع هاد السمية وهو يهرب ..
- مالو هرب ..
- هادا دليل على انه كاين سر كبير وراء ديك العائلة .. خلينا نسولو شي شارف احسن ..
مشينا لواحد الشارف كبير بزاف فالعمر ..
ليان :سمحلي اسيدي .. واش ممكن نسولك ..
الشارف : سولي ابنتي ..
ليان : بغيت نسولك على عائلة برهان .. واش كتعرفهم؟
كذلك غا ذكرت اسم برهان وهو يبدل ملامحه الى صدمة ...
الشارف : واش كاين شي واحد فهاد المنطقة مكيعرفهومش.. ولكن نتي علاش كتسولي ..
ليان: الحمد لله واخيرا لقيت شي واحد كيعرفهم .. قلتهالك ا ايمن انا مكنتش كنحلم .. انيس موجود ..
الشارف : انيس وامه ماتو محروقين فقصرهم عشرين عام دابا ..
ايمن : محروقين !!!
الشارف : واش نتي ابنتي شفتيهم ..
ليان : اه والله ايلا تلاقيت انيس .. هو ماماتش ..
الشارف : لا ابنتي .. هو مات واللي شفتيه نتي غا روح ديالو .. طيف ماشي حقيقة ..
ليان : مستحيل .. هادشي مكيدخلش لعقل
الشارف :وللاسف اغلب اللي شافو انيس .. ماتو بعد شهرين او ثلاثة .. كيلقاوهم ميتين او منتحرين ..
ايمن تصدم بعدما سمع ديك الهضرة .. وشاف فيا بخوف ..
ليان : وشنو السبب اللي ماتو بيه انيس ومو ..
الشارف : راني قلتلك شعلات العافية فالقصر وحتى واحد مقدر يعتقهم حيت عايشين فالغابة .. ومن داك الوقت والارواح ديالهم بقات فالغابة .. وحتى واحد مكيقدر يقرب ولا يدوز من تما ..
- واش خرجو جثثهم ..
- للاسف لا .. عشرين عام وحتى واحد مقدر يقرب من تما ..
- والاب ديال انيس .. واش حتى هو مات ..
- لا منضنش .. حيت اختفى شحال هادي قبل الحادثة .. وكان انيس وامه عايشين بوحدهم .. صحيح ان انيس كان شاب اجتماعي ومحبوب ولكن امه كان سكوتية وغامضة وكاين اشاعة كتقول انها هي اللي شعلات العافية فالقصر باش تنتحر وتقتل ولدها ..
ليان : صحيح هي كانت سكوتية بزاف .. انيس هو اللي كان ضحوكي واجتماعي .. خسارة موته .. مكيستاهلهاش ..
مشينا من تما وانا كنفكر غا فأنيس .. موته شكل صدمة بالنسبة ليا .. اكيد تعدب بزاف والعافية كتاكل فالجسم ديالو .. اووف ..
0 Commentaires