الأنيس - الحلقة 6

الجزء 6 
ايمن : معرفتش شكون تلاقيتي بالضبط ولا واش تلاقيتي شي حد اصلا ولا غا كيتهيأ ليك .. ولكن اللي كنعرفو دابا انك خاصك تنساي هاد الموضوع فمرة فهمتي وماتعاوديش تجبديه مرة اخرى.. ولا عرفتي شنو خاصك تزوري طبيب نفساني حيت وليتي كتخيلي راسك كتهضري مع موتى .. 
ليان: اش هادشي كتقول وكفاش بغيتيني ننسى .. انا غانقلب غلى انيس وهو اللي غايشرحلي كلشي .. اكيد ماشي هو اللي مات .. اكيد وقع شي غلط .. انا غانقلب عليه .. 
ايمن : ليان انا مغانخليكش ترجعي لديك البلاصة مرة اخرى ..
سكتت وخليتو كيهضر غا بوحدو .. بالليل بقيت كنتقلب ففراشي وانا نتفكر الساروت .. نضت بسرعة جبدتو .. ايلا كنت كنتخيل وصاف .. اش كايدير عندي هاد الساروت .. بقيت كنشوف فيه.. حتى قررت الغد ليه غانشد الطريق بوحدي.. 
الصبح بكري خديت طوموبيلتي وشديت الطريق حتى وصلت للغابة وللبلاصة نفسها .. نزلت من الطوموبيل .. وبقيت كنشوف .. وكنحاول نتفكر .. منين مشينا انا وانيس داك المرة .. تمشيت بين الاشجار .. بشوية وبحذر وكنحاول نتفكر كل بلاصة خطيت فيها خطوة داك المرة .. حتى بانلي .. هو والله .. واخيرا لقيت القصر .. ولكن مكيبانليش بحال المرة الاولى.. كيبانلي قديم بزاف .. وبحال الى بيبانو متفتحاتتش من مدة طويلة .. اووف 
- انيييييييس .. 
بديت كنعيط بالجهد .. ولكن حتى جواب .. تفكرت الساروت .. مشيت فتحت الباب دالجردة اللي مكانتش مسدودة .. وحليت الباب ديال القصر بالساروت .. تفتح يعني انا مكنحلمش .. فعلا تلاقيت انيس داك النار وهادا هو الدليل .. فتحت الباب .. وانا نلقى فوجهي خيوط عنكبوت .. والغمال .. تقول 20 عام متفتح هاد القصر .. مستحيل من داك النهار حتى ليوما يدير هاد الحالة .. داك المرة القصر كان نقي بزاف .. وانا نعست فيه .. مستحيل نكون نعست فهاد الحالة هادي .. دخلت توجهت لداك الكراسي لكبار .. دوزت يديا عليهم .. كانو مغبرين بزاف .. بقيت كنشوف .. حتى بانلي المجر .. فكرت فالالبوم ديال الصور .. نضت بسرعة .. ولقيتو فبلاصته .. خديتو .. فيه الصور ديال عائلة برهان .، هو نفسه اللي وراهلي انيس داك المرة .. فتحتو كان فيهم صوره هو امه وابوه.. انا غانحماق .. الى كان انيس ميت .. شكون هاداك اللي شفتو داك المرة.. وعلاش القصر موسخ مع انه مفاتتش مدة طويلة على فاش شفتو نقي اخر مرة .. هزيت معايا الالبوم .. وخديت الكاميرا ديالي وبديت كنصور القصر من الداخل كما من الخارج .. دابا عندي دليل اللي غانثبت بيه لأيمن باللي انا مكنهرفش وباللي بصح انا تلاقيت انيس .. Dodi elaissati