الأنيس - الحلقة 19

الجزء 19 
داني النعاس مع اروى .. لقيت راسي فبلاصة مهجورة هاد المرة .. خفت من هاد البلاصة ولكن مللي بانلي هو ارتاحيت .. انيس .. شنو كانديرو هنا .. هاد المرة مكانش مبتسم وانما غا كيشوف .. تمشى وانا وراه .. اكيد غايوري ليا شي دليل اخور .. فتح واحد الباب فداك الظلمة .. حتى بانلي واحد كيجلد شي حد .. كان ضخم بزاف ومعرفتش فين شفتو .. مللي تقلب بوجهه البشع .. عرفتو .. هداك هو اللي كان خاطفني هو اللي مخدمو احمد .. معقلتش سميتو .. انيس عرفتك بغيتي تقول باللي هو اللي غايوصلنا للولد .. 
فقت لقيت اروى ناعسة وشادة فيا .. صاوبت ليها النعسة ونضت نقلب على ايمن .. لقيتو جالس فالصالون ..
- ايمن .. انا شفت انيس ..
- كاين شي حاجة جديدة واش وراك بلاصة الدري .. 
- وراني الشخص اللي ممكن يكون عارف بلاصته .. هاداك اللي خدام مع احمد .. داك الجلاد اللي اللي حبسني .. اكيد هو اللي خطف الولد .. 
- ولكن كيفاش غانخليوه يهضر .. 
- ندير خدمة المافيات ونخطفوه ونخليوه يهضر 
- حنا ماشي مافيوزيين اليان .. انا غانعرف كيفاش .. 
- اش غادير .. 
- واحد بحال هداك اكيد عندو سوابق .. غانبلغو بيه البوليس ومنه غانطلبوه يقولينا بلاصة الدري .. 
- واخا دير اللي بغيتيه المهم هو نلقاو الدري .. 
مشينا من عند اروى وعينيها كلهم امل نلقاو ولدها .. واعدتها اني غادي نلقاه .. وصلنا للدار البيضا واول حاجة دارها ايمن انه مشا هضر مع صحابه من البوليس وخبرهم باللي كاين .. اكدو ليه ان داك الشخص عندو سوابق ومطلوب للعدالة .. هو كيتخبى ومعرفوهش فين كاين .. هو ديما مع احمد .. واحمد كاين فافران .. بمساعدتنا شدو داك الشخص .. ونهار التحقيق معه مشينا انا وايمن .. دخلنا عندو وبدينا نسولوه .. 
- تهمك كثرت .. 
- نتي مازال عايشة ؟ متخافيش احمد مغايخليكش عايشة بزاف .. 
- احمد .. اللي مخدمك ولاعب بيك بحال الدمية فيديه .. انا حسابي معاه هو ماشي معاك .. قولي .. فين الولد 
- اينا ولد فالاولاد .. حيت كتار 
- ماشاء الله .. ومازال كتقولها بوجهك احمر .. فين ولد انيس .. 
- معرفتش .. 
- لا نتا عارف .. ونتا اللي خطفتيه من امه وقطعتي لسانها .. 
- ههه وشنو بغيتي نخليها تهضر .. تحمد الله حيت متقتلاتش حتى هي .. 
بعد الضغط ديال البوليس هضر اخير .. 
- الولد ماماتش .. 
- اذا فين هو .. 
- بعدته على امه بزاف .. ديتو لواحد دار الايتام فالحسيمة .. 
- الحسيمة ؟؟! 
- اه .. ومن تما مبقيتش عرفت عليه حتى حاجة .. 
- وباش غادي نعرفوه حنا .. الولاد تما بزاف .. 
- معرفتش .. انا ديتو تما ومشيت ومبقيت عرفت عليه حتى حاجة .. اصلا انا كان مطلوب مني نقتله .. ولكن انا بقا فيا .. واختاريت نبعدو وندير للملجأ بلا ميعرف شي حد حتى حاجة .. 
خرجنا من عندو وخليناه مع البوليس ..
- ايمن حنا خاصنا نمشيو للحسيمة ..
- ولكن باش غانعرفو ولد انيس من بين الاف الدراري .. 
-غانحاولو نعطيوهم معلومات عليه .. خاصنا نوصلو ليه بأي ثمن .. 
مرة اخرى شدينا طيارة للحسيمة حيت ميمكنش نصبر على الطريق .. متحمسة نعرف الحقيقة كلها والوقت كيزاحمنا .. وصلنا ومشينا مباشرة لدار الايتام اللي تما استقبلنا المدير .. 
- حنا كانقلبو على واحد الدري يكون تزاد هكاك فالتسعينات 94 او 96 .. فالحقيقة امه تخطف ليها والخاطف هو اللي جابو لهنا .. 
- حنا دازو علينا الالاف مزيودين فهاد الاعوام اللي كتقولي .. ميمكنش نعرف هادا اللي كتقلبو عليه شكون فيهم .. واصلا اللي مزيودين الى غاية 1998 خرجو كلهم من الملجأ .. حيت القانون كيحتم عليهم يخرجو مللي يكملو 18 سنة .. 
تصدمت يعني ولد انيس خرج من الملجأ.. فين غانلقاه دابا حسيت بالاحباط .. شفت فايمن جبد صورة لانيس ووراها للمدير .. 
- سيدي واش سبقليك شفتي هاد السيد .. 
- اه هادا اكرم .. واش هو اللي كتقلبو عليه ..؟dodi elaissati