الجزء 12
- دابا عاد فهمت .. دابا عاد فهمت علاش كلشي كيخاف يقرب من هنا .. وفهمت الاشاعة اللي قالها الراجل .. اي واحد قرب لهاد الموضوع كيلقاوه ميت بعد اشهر .. نتا اللي كنتي كتقتلهم .. انا غانفضحك .. وغادي نعرف العالم كله انك القتال الحقيقي وباللي انيس وامه مانتاحروش .. نتا اللي قتلتيهم بسبب الطمع اللي فيك ..
- هاهاهاها .. واش نتي معتقدة اني غانخليك تعيشي حتى تفضحيني .. هاهاهاها .. ديك الساعة فضحيني فالاخرة..
- انيس ... ايمن ..
- عيطي عللي صوتك كتر ههه .. هنا مكاين اللي يسمعك .. شايفة هاد البلاصة .. شوفي مزيان .. هنا فين حرقت #انيس وامه .. فهاد البلاصة شعلت فيهم العافية .. هما مدفونين هنا .. فهاد القصر ..
- حرام عليك.. واش معندك قلب ..
- معندييش 😠.. قلبي مات من عشرين عام .. من نهار دفنت ولدي وقتلته بيدي .. كيفاش بغيتي نحن فيك ولا فغيرك .. عرفتي .. نتي من دون اللي قتلتهم كلهم غانعطيك شرف العذاب قبل الموت .. حيت حتى واحد متجرأ يهضر معايا يحالك بهاد الطريقة.. بقاي هنا شوية وبداي تحسبي بالعد العكسي .. لنهايتك هنا .. ههههه
خزج ودا معاه داك الضخم وخلاني اما وسد الباب .. #انيس .. كنت عارفة انك منتاحرتيش .. الله يا ربي عاوني باش نتفك من هاد الانسان اللي مكيعرفش للرحمة عنوان ..اش غاندير دابا .. واش صافي هادي هي النهاية ..
عند ايمن ..
انا حاس باللي ليان محتاجاني .. علاش اليان فينك .. يا ربي تعاونها .. مقدرتش نصبر على تأخرها خديت الطوموبيل ومشيت للبلاصة اللي ممكن نلقاها فيها .. لقيت الطوموبيل ديالها .. عرفت ديك الساعة انها جات للقصر ديال انيس .. حاولت نقلب على القصر .. عييت بالتقلاب .. حتى بانلي .. كان واحد الراجل خارج منه .. تخبيت وبقيت كنراقبو .. خرج وركب فطوموبيلته هو وواحد الضخم .. ومشاو .. تسحبت بخفية ودخلت للقصر باش نقلب على ليان ولقيت الباب مسدودة .. اووف كيفاش غادي ندخل .. بقيت كنحاول ندخل .. الباب كانت صعيبة وماساهلاش للفتح .. درت محاولة اخرى وضرت للجهة الاخرى باش ندخل من اي نافذة لحسن الحظ لقيت واحد السرجم مكسور .. استغليت الفرصة ودخلت منه .. الظلام كان حالك فالداخل .. بقيت كنقلب حتى بانتلي .. هادي كاميرا ديال ليان .. مكتمشيش لشي بلاصة بلا متديها معاها .. اكيد ليان كاينة هنا .. بديت كنعيط ليااااان .. لياااان .. صدى صوتي كان كيتسمع فالقصر كله .. بديت كنقلب ونعيط حتى سمعت صوتها ..
اللي لقا هاد القصة فشي بلاصة اخرى بلا سمية #دودي يعلمنا .. حيت بنادم مبقاش كيحشم كيسرق القصص وكينسبها لراسه بدون حيا ولا حشمة .. تماما كما جرا فقصة الحقيرة والوريث الوحيد .. وقصة القاتل المأجور والمتسولة الجميلة وقصة ولاني عقيم وقصة لم اخنك يوما صدقني ... كل هاد القصص ديال دودي ولكن بنادم مابقاش كيحشم كيسرق وبوجهه صحيح كيجي يسرقها وينشرها بسميته ... تأليف دودي العيساتي ..
0 Commentaires