لم اخنك يوما ..صدقني - الحلقة 9

الجزء9
-قمر..واش كتهضري بالصح ..نتي كتبغيني ..مكتضحكيش عليا ياك
-واش نتا حمق ..واش هادشي فيه الضحك 
ابتسم وضحك وعنقني ...مستحيل ..ههه قمر نتي اللي يشوفك يقول مستحيل تبغي شي واحد بحالي ..نتي كتبغي الخدمة والاعمال والحركة وانا كنبغي الفن والهدوء ..شكون كان يتيق 
ضربتو لدراعو ..وحتا انا كنبغي الفن مالك حكرتيني ..كما بغيتيني نتا انا بغيتك ...الحب يجمع المختلفين ..
-انا اسعد واحد فالدنيا ..قمر انا روحي تولدات اليوم ..كنبغيك بزاف وعمري مغنفرط فيك 
-وعد 😉
-وعد 
دوزت نهاري مع اياد كان احسن نهار ومللي رجعت للدار لقيت نفس الموال ..عبده يا عبده 
-شنو كاين عاود تاني 
-فين كنتي 
-كنت فأرض الله 
-قمر ياكما كنتي مع داك النذل وكتخبي عليا ..
-اينا واحد فيهم ..حيت الانذال كتارو هاد الايام 
-بلا مادوخي عليا كتعرفيني شكون كنقصد ..نور الدين 
-مممم ماشي مهم وماشي سوقك 
جبدني من يدي وقربني ليه والشرارة خارجة من عينيه ...ايلا رجعتي ليه غنقتلو 
-اش هاد التصرفات طلق مني والتزم حدودك معايا والا غتشوف الوجه التاني ديالي معاك ..نترت يدي وخنزرت فيه ومشيت ..انا اللي ضسرتو بالحق من هنا الفوق غيشوف قمر وحدة اخرى 
الغد ليه مشيت للخدمة كما العادة بعدما هضرت فالتيليفون مع حبيبي ..غا كنسمع صوتو كيعطيني نشاط وحيوية نبدا النهار ديالي ..مشيت دخلت لقيت عبده فالمكتب ديالو شفت فيه وزدت مقلت لا صباح الخير ولا والو..باش يتعلم يلتزم حدودو وميتجاوزهاش ..ومبغيت نعاودلو والو على علاقتي ب ايادحيت عارفة اش غايدير ...غايمشي يقلب ليه على شي مونتيف وانا ماباغاش نتفارق معاه ..ماقلت حتى لقيت اللي تحرك ليه قلبي مامستعداش نبعد عليه تحت اي ظرف ولاي سبب ..الحب كيجي مرة وحدة فالحياة واللي متمسك فيه بيديه وسنانه ميستاهلوش ..الحب تضحية والتضحية كتقول نتجاوزو تفاهات الحياة ..ونتمسكو ببعضنا هذا هو قانون الحب ..ومستعدة ندوس على اي واحد على قبل يعيش هاد الحب ومنسمح لاي واحد يتدخل فيه ..درت الخدمة ديالي ..وكملتها وانا نسمع الدقان فالباب كان عبده ..
-شنو كاين 
-بغيت نهضرو على داكشي ديال البارح 
-ماعنديش الوقت دابا عندي الخدمة بزاف 
-قمر ...dodi elaissati

-قمر ...
-الا كاينة شي حاجة متعلقة بالخدمة قولها الا مكايناش يمكنليك تمشي وتسد الباب 
خرج وسد الباب موراه هاد الصرامة باش يتعلم من هنا الفوق يهضر معايا ويعرف كيفاش يتصرف 
صاوبت ملفات الخدمة وعيطت على عبده 
-نعم اقمر 
-هاك هاد الملفات ديال الضرائب ديهم للمحاسب وراجع معاه كلشي منبغيش شي غلط ورجعهوملي فيدي 
-واخا ميكون غا خاطرك غنرجع دغيا
خرج وانا استغليت الفرصة دغيا نمشي نشوف اياد منضمنش يتبعني الا بقا هنا مبغيتو يعرف والو على علاقتنا ..بقيت هاكا ايام وايام كنشوف اياد بحال الا كنسرق بحال شي مراهقة كتخاف يشوفوها واليديها والعكس اني خايفة على علاقتي معاه خايفة من اللي باغين يخسروها وهدفي كان واضح جدا نديهم امام الامر الواقع ..واحد النهار كنت مع اياد فالمرسم ديالو كنضحكو وكنهضرو وكيضربني بريشة الرسم حتى سمعنا شي صداع كان العم عبد الحميد كيرفع صوتو على شي حد مشينا كنجريو لقينا واحد المرا ..ياه هي نفس المرا اللي لقيت مع اياد فالمستشفى ..كيقوليها مبغيناش نشوفوك لا انا لا اياد ..شفت ف اياد قلتلو شكون هاد المرا وعلاش كيغوت عليها باباك هاكا ..شاف فيها وقال مكنعرفهاش ودخل للمرسم ديالو بلا ميعبرها ..العم عبد الحميد كمل كلامه وقال شفتي مبغاش يعرفك فرقي علينا وعطينا بالتيساع ..المرا بدات كتبكي وكتشوف جهة المرسم طاحو جوج دمعات وخرجات كتبكي بقات فيا وكان لازم نعرف القصة 
خرجت ومشيت كنجري تبعت السيدة وعيطليها ..
-نعم ابنتي ..
-معقلتيش عليا انا اللي لقيتيني فسبيطار مع اياد 
-اه عقلت عليك ابنتي 
-ممكن نهضرو شوية 
-واخا اجي معايا 
ركبت فطوموبيل معاها ..وبدات كتهضر :
كنت صغيرة وزوينة وكنت نشيطة بزاف وذكية وكلشي كيشهد بهادشي ..كان عندي طموح كبير ..وفوسط داكشي تلاقيت عبد الحميد ..كان شاب وزوين ورقيق فالتعامل دياله معايا وبغينا بعضنا بزاف اكتر ما يتخيل شي واحد ..تزوجنا ولكن العديان مخلاوناش تاهموني فشرفي وكلشي كيأكدلو باللي انا وحدة خاينة ولكن اقسم بالله باللي عمري مخنتو تخلا عليا وبقيت بوحدي حتى جا واحد الصديق قديم كان ولد شريك الوليد ديالي ومكانش عندي حل الا نتزوج بيه ويا ريتني متزوجت بيه حيت اكدت ديك الساعة لعبد الحميد باللي انا وحدة مكنسواش وباللي عمري بغيتو وانا قلبي مكان عالم بيه غير الله ..حملت من راجلي وولدت ولد زوين ولكن قلبي مكانش مع باباه وكانو ديما نايضين مشاكل بنا وديما مخاصمين لدرجة اني فواحد المرة دابزت معاه وتعصب وخرجني فنص الليل ومكان عندي حل الا اني نمشي عند عبد الحميد مشيت عندو كنبكي وهو مللي شافني بديك الحالة ..حن فيا ودخلني لدارو اواللي كانت دارنا ..بقيت معاه واثري ما بان لا لعائلتي لا لراجلي ...عشت معاه وباسم الحب اللي كان بينا رجعنا واتافقنا اني نتطلق من راجلي بسرعة ونرجعو ..دوزت معاه ليالي ..حتى لواحد النهار ..اقتحم راجلي الدار عليه وتضاربو ..وداني معاه بزاز ..ومكنتش كنشوف فيه وكنطلب الطلاق منو دازو الايام وبان عليا الحمل ..وعرف راجلي ان هادا اللي فكرشي ماشي ولدو ...وتكرفص عليا ووراني الويل ...والعداب اللي كنت فيه كبير وهددني يقتل ولدي الى ما هضرتش مع عبد الحميد وقلتلو يبعد مني وانا مكنبغيهش وكنبغي راجلي ..داكشي اللي درت..وعبد الحميد متحملش ..ومللي ولدت ولدي مكنش كيحملو راجلي ومشا قال لعبد الحميد باللي هاداك ولدو ..جا بالقانون حيدلي ولدي اياد ..رباه بعيد عليا ..ومكانش كيخليني نشوفو ..ومللي مات راجلي حاولت بكل الطرق ناخدو ونقنعو يعيش معايا.. ونقنع حتى عبد الحميد باللي انا مغدرتوش ..ونكملو اللي بقالنا من عمرنا بجوج ولكن مكانش يقبل يسمع مني .. وفكل مرة النتيجة كتكون كيما شفتيها دابا 
-يااه بعد كل هاد السنوات مازال عندك الامل ترجعيلو
-الامل عند اللي كيبغي ابنتي مكيموتش ..واللي كيبغي مكييأسش 
-عمري مشفت شي حب بحال هادا 
-الحب ابنتي هي تضحي على قبل اللي كتبغي وتديري المستحيل باش تكوني معاه وتتقاتلي الى استلزم الامر على ودو ..اه تقتلي باش يعيش حبك وماديريش بحالي متستسلميش فاي لحظة 
-وعمي عبد الحميد تزوج من بعد؟
-لا متزوجش ..وداكشي اللي بقا عاطيني امل انه مازال عايش على الذكرى ديالي..نتي واياد كتبغيو بعضكم ياك 
-اه ..ومنتمناش نعيش داكشي اللي عشتي نتي ..الله يصبرك امدام وانا غندير مجهودي باش نخللي اياد يسامحك ويرجعك لحياته 
-سميتي هبة...وغنكون شاكرة ليك بزاف الا قدرتي تقنعيه 
-يكون خير امدام هبة