الجزء 10
رجعت عند اياد بعدما كملت الحديث ديالي مع امه
-قمر فين كنتي من قبيلة وان كنقلب عليك
-كنت غا هنا قريبة
-فين قريبة ههه راكي بعيدة دابا
-ههه ..بعد مني
-صافي احبيبتي بلا متقلقي ..قوليليا مالكي فاش كتخممي
-قصة لالة هبة وسي عبد الحميد مؤثرة بزاف
-تنهد وقال:هي اللي اختارت
-شكون عرف ظروفها .مخاصش نحكمو على الشخص من خلال تصرفاتو حتى واحد معارف شنو الدافع مور داكشي
-شكون اللي عاودليك هادشي
-هي
-هه اكيد دابا غتقلب على مبررات ليها ..وغتحاول تكسب استعطافك نتي حيت مقدراتش عليا انا
-اياد هاديك اللي كتهضر عليها راها امك كيفاش بغيتيني نأمنك على نفسي وانت كتهضر بهاد الطريقة على المرا اللي ولداتك محنيتيش
-انا آسف ..ولكن حتى انا عندي ظروفي ..هي اتخلات عليا
-لا متخلاتش عليك وها الدليل انها جات وكتجي عندك ومستسلماتش
-قمر عفاك سدي الموضوع
-اياد خاصك تواجه راسك لحد امتا غتبقا هاكا كتهرب من الواقع
-معرفتش ..اللي عارفو اني باغي نرتاح
-وخوك عارف عليه شي حاجة ..عمرك شفتيه
-اه مللي كنا صغار ..كنا كنلعبو وكان كيجيبلي اللعب ديالو ..كنت عزيز عليه بزاف ..ولكن الدنيا هي اللي فرقاتنا
-اش هادشي كيفاش تسمح لراسك تتفارق مع خوك ..اياد اللي بينك وبين ماماك فهمناه ..وخوك شنو ذنبه
-عندك الحق ..
-اياد واعدني انك تعطي فرصة لراسك تفكر وتتعامل مع ماماك وتعطيها فرصة ..واليدينا هما كلشي فالدنيا ..ونهار يفرقو علينا كنحسو الدنيا ضياقت علينا ..عفاك واعدني
-كنواعدك اقمر نفكر ونعطي فرصة لراسي
-كنبغيك بزاف ..يخليلي هاد القلب الحنون
-مدامك معايا عمري نخاف من شي حاجة
مشيت للدار كنفكر فقصة حب العم عبد الحميد ومدام هبة ..عطاتني قوة اني نتمسك بحبي لاياد حسساتني بالخطر ..لانه انا كاين اللي ضايرين بيا وممكن يديرو اي حاجة باش يفرقوني عليه ولكن الواحد خاص يحارب على قبل اللي كيبغي ويدير المستحيل على قبله ..مشيت بست الراس لماما وعنقتها وفكرت باني منقدرش نبعد عليها الام هي كلشي كدير المستحيل على قبل ولادها ..الله يخليهم لينا ..اياد خاصو يسمح لامه ..ضروري وهادشي اللي غندير مجهود باش يوقع
الصبح فقت ..مشيت لخدمتي كما العادة ...صبحنا لله لقيت عبده ..تعاملت برسمية معاه وهو يتبعني
-قمر حتى امتا غتبقاي كتعاملي معايا بهاد الطريقة ..عفاك سمعيني انا مستعد ندير اي حاجة باش تسمحيلي راكي كتقتليني بالبارد بهاد الطريقة
-شوف نتا ..
-انا ندمت ..والله ايلا ندمت عمري مغنبقا نعاود عفاك سمحيلي
-والله يا عبده ومكانت العشرة اللي بنا والثقة اللي كنديرها فيك اما نسمحلك ..وبكن صدقك معايا وعشرتك هما اللي كيشفعو ليك ..هادي الاخرة ليك ديرها فبالك
-فرح وناض:اخر مرة والله متشوفي مني الحاجة الخايبة ابدا
-سير لخدمتك
مشا وخلاني كنفكر هاد عبده منه الخوف الا ساق الخبار بعلاقتي ب اياد غيدير اي حاجة يفرقني عليه ..وحكاية مدام هبة خوفاتني بزاف ..ضروري نخبي علاقتي بيه ..دازو الايام وانا مخبية علاقتي ب اياد وكيزيد حبي ليه نهار على نهار حتى كنتفاجئ واحد النهار ب نور الدين
-قمر مازال مبغيتي تحني عليا ..انا تغيرت على قبلك ..ووليت واحد اخور ..
نور الدين عفاك الا ما نسا عليك داك الموضوع ..انا راه منصلاحش ليك انا وياك غنتفاهمو غا فالخدمة صافي
-علاش كل هاد الجفاء منك ..مبغيتيش تعطيني حتى فرصة ..انا عييت..وقررت ندخل الباب من بابو انا غنجيب الوالدة ديالي وغنجي نخطبك من والديك .. ستنايني غدا فالعشية وعلمي عائلتك ..ومشا
-نور الدين ستنا ...نور الدين
عيطت عليه مجاوبنيش ..اش هاد الوحلة عاود تاني ..مبغاش يفهم باللي انا مبغيتوش اووف
سكتت وماقلت حتى حاجة لعائلتي ولا لعبده وبقيت كنحاول نقنعو اتاصلت بيه والو مجاوبش
الغد ليه دوزت النهار وانا مشوشة مشيت للدار فالعشية لقيت شي ناس فالصابون مع بابا وماما عرفت باللي نور الدين هو اللي جاب عائلته ..طلعت لبيتي نيشان ..وشوية طلعت ماما عندي ..
-بنتي نزلي تشوفي الناس جاو على قبلك
-اووف انا قلت لداك بنادم لا هلاش كيحرج راسو
-علاش احبيبة هو باينة فيه شاب محترم ..وعائلته محترمة وكلاس ..جايب معاه ماماه وعمه ..نزلي تتعرفي عليهم غيدخلو ليك لقلبك ..عفاك ابنتي ..وعطيه فرصة يتعرف عليك حتى واحد مغايبزز عليك شي حاجة ..مقلنالكش غتزوجي غدا نزلي دابا بوجه باباك ومن بعد يحلها الله
درت الخاطر لماما وبدلت حوايجي نزلت بانلي نور الدين غا شافني ناض وقف دخلت سلمت وتصدمت من اللي شفتو
-😳 مدام هبة ؟
-قمر ..واش نتي هي العروسة
-ا ا لا ...اه انا اللي بغا يتزوج نور الدين ولكن نتي هي ماماه ..
نور الدين : واش كتعرفو بعضياتكم ؟
-مدام هبة ممكن نهضرو بوحدنا ..
-اه طبعا
نضنا ومشينا للصالون لاخور
-ممكن تشرحي ليا هادشي اللي واقع
-مدام هبة تيقي بيا انا مكنتش عارفة ان نور الدين هو ولدك التاني ..انا كنعرفو عن طريق الخدمة وعرض عليا موضوع الزواج وانا رفضت ونتي عارفة السبب ..ولكن كنقسم ليك باللي مكنتش عارفة باللي هما خوت ...صدفة خايبة انا كنعرف اياد فبلاصة ونور الدين فبلاصة وحدة اخرى اش هاد الصدفة اللي جمعاتني بيهم بجوج منعرف ولكن كنأكدليك باللي معندي دخل فيها وكنأكدليك باللي كنبغي اياد ومعطيت حتى امل لنور الدين
-قمر ..هادشي خطير بزاف ..انا كنعرف نور الدين ميمكنش يخطب شي وحدة الا اذا كان كيبغيها ومتمسك بيها وميمكنش يفرط فيها ..انا متأكدة باللي نور الدين كيبغيك..كيفاش حتى انا معارفاش ..ولكن متنسايش باللي اياد ونور الدين ولادي بجوج وبغيت نجمعهم ماشي نفرقهم ..ونتي بالنسبة ليهم قنبلة اللي غتخليهم مفرقين طول الحياة ...لذلك كنترجاك وكنطلبك تبعدي منهم بجوج تفارقي على اياد في هدوء ورفضي نور الدين ..مستحيل نقبل ولادي يتفرقو واكيد نتي مغترضايش تبني سعادتك على تدمير عائلة
-ولكن ..انا كنبغي اياد بزاف ..ماشي نتي اللي قلتيلي باللي المرا لازم تضحي وتحارب وتقتل اذا لزم الامر على قبل الراجل اللي كتبغي ..ماشي هادا كان كلامك ليا
-الامر كيختلف هنا ..هادو راه خوت ..متفارقيهمش ا قمر عفاك كنترجاك
طاحو الدموع من عيني وقلت ليها
-واخا
0 Commentaires