اخو البنات -الفصل الثاني - الحلقة 6

الجزء9
دخلنا تبهرت بروعة المكان.. 
- حنا غندوزو هنا الويكاند.. وبوحدنا.. كيجيتك...
- وليد.. انا كنحماق عليك.. 
- حتى انا كنحماق عليك احياتي.. مستحيل نتحمل نشوف الحزن على وجهك.. واعدتك عمرك تشوفي الحزن معايا...
دوزنا الويكاند تما .. عاد عرفت علاش كيبغيو شي عيالات يسكنو بوحدهم.. ههه الحرية المطلقة فالرومانسية... والشقاوة... دازو دوك اليوماين زوينين بزاف.. مللي رجعنا الحد بالليل للدار كلشي بقا كيسولنا اش هاد الغبور.. توحشونا حتانا توحشتهم بزاف.. المفاجئة هي ان الدكتور ديال سليمة اتصل بيا وخبرني باللي يمكن لينا نشوفوها.. فرحنا كلنا وحمدنا الله .. الغد ليه بكري نضنا ومشينا كلنا ليها لقيناها تبدلات بزاف.. معلوم اللي داز عليها ماشي ساهل.. فرحنا الطبيب وقالينا قريب غتقدر ترجع للدار وتبقا تتابع العلاج بجلسات متفرقة.. وان المرحلة الصعيبة دازت .. فرحنا بزاف.. واخيرا غترجع لحياتها الطبيعية.. واخيرا غنتجمعو من جديد كعائلة وغيرجع كل شيء مقاد.. دوزت نهاري فالخدمة مللي ساليت جيت للدار .. لقيت فاطمة الزهرا موجدالي الماكلة .. 
- اش هاد الدلع ليوما.. فاتي شنو وقع..
-والو غا قلت تكوني عيانة نوجدليك ما تاكلي..
- ههه الله يجعلني نتيق.. 
- لا تيقي .. هدى.. شنو رأيك فكرم.. 
- شكون كرم.. 
- انت حتسطعبطي
- هههه راه قلتلك مابانليش فهاد الدلع اليوما.. 
- ايوا جاوبيني.. 
- كرم عريس لقطة.. 
- يعني نقولو يجي يهضر مع وليد.. 
- اش كتسناي..
- الصراحة اهدى.. انا خايفة من الزواج.. 
- ايلا بقيتي بهاد الاوهام راه عمرك ماغاتخطي حتى خطوة.. توكلي على الله .. 
- واخا اهدى.. شكرا بزاف ليك معرفتش شنو كنت غاندير بلا بيك فالدنيا.. 
- متقوليش هاد الهضرة .. نتي راكي ختي.. 
بعدما ساليت الهضرة مع فاطمة الزهراء.. مشيت نصاوب شي مفاجئة لوليد.. وجدتلو الماكلة اللي كايبغي.. وصاوبت من جديد طابلة ديال العشا ديال ديك المرة اللي خسراتلي بالخدمة .. مللي جا تفاجأ بزاف وعجبو الحال.. دوزنا سهرة زوينة بزاف..

الجزء 10
البوم الموالي مشيت للخدمة..قالولي راه جا واحد الطبيب جديد.. مشيت نتعرف عليه ومحملتوش.. باينة فوجهه الجشع.. وبصباص .. كيعبر المرا من التحت لفوق محملتوش وخلاص.. هو بقا تابعني وكيخلق جو بنا وانا غا كنتفاداه.. ها اللي قلنا هاد النوع هما اللي كيفندو نظرية بابا انه ممكن يكون الانسان قاري وطبيب ولكن زيرو .. فالصو... اتصلت بالدكتور كرم وهضرت معاه وعبر عن رغبته فالزواج من فاطمة الزهراء قلتله يجي يهضر مع وليد اليوما وانا غنخبر وليد .. وفعلا داكشي اللي وقع اتصلت بوليد وعلمت فاطمة الزهراء..وفالعشية استقبلنا العريس وامه.. ناس كلاس ومتواضعين بزاف.. اتافقو على كلشي وقالينا الدكتور كرم باللي غينتقل لمدينتو ومسقط رأسه وبالتالي فاطمة الزهراء غتبعد علينا.. حزنا لهادشي ولكن الا كانت غاتكون سعيدة فهادشي مكيهمش .. حددنا يوم لعقد القران وفيه غنديرو عشا نجمعو فيه غا عائلتنا الصغيرة..بعد ايام كنت كنوجد راسي انا ووليد نمشيو للخدمة حتى سمعنا الدقان فالباب بالجهد.. تخلعنا كلشي فاق من الناس جا يشوف شنو وقع.. مشا وليد حل بسرعة لقينا مريم .. 
- فينكم اجي تسمعو انا حاملة اعباد الله حاااااملة .. هههه 
بدا كلشي يبارك ليها ويعنقها .. الا انا تشوكيت معرفتش شنو وقعلي... بحال الا فكراتني بموضوع الحمل مرة تانية ...لا ماخاصنيش نكون هاكا لا.. انا خاصني نكون واعية ماشي متخلفة انا باش نمرض راسي عاود تاني.. مشيت عندها عنقتها وقلت ليها مبروك احبيبة .. فرحتلك بزاف.. 
مشيت لخدمتي وانا حاسة راسي مخنوقة .. اووف علاش محملتش حتى لدابا.. مالي مسطية هاكا ها مريم تزوجات قبل مني.. دابا نحمل حتى انا.. الحاجة مكتجينا حتى نتعصرو عليها مزيان..خرجت من الخدمة وانا مخنوقة قلت نمشي حدا البحر شوية.. باش نشم شوية الهوا ونبرد على قلبي.. بقيت فداك الهوا.. حتى كيبانلي واحد الشخص قدامي تصدمت.. خديجة ومع من مع كمال.. والرومانسية مزياااان .. مشيت عندها 
- خديجة اش كاديري هنا.. ومع هاد الشماتة.. واش نسيتي شنو دار فيك.. جاي دابا باش يديلك فلوسك .. وينصب عليك.. صحابلك وجعليك حيت كيبغيك 
- هدى سكتي.. انا حرة ندير ما بغيت .. انا وكمال مازال كنبغيو بعضنا وهو ندم حيت سمح فيا المرة للولة.. ودابا غنبداو صفحة جديدة.. 
- وراه كيتفلا عليك الهبيلة واش تيقتيه.. دابا يديلك فلوسك ويخليك بحال المرة للولة..
- هدى ديها فراسك.. انا ندير اللي عجبني .. 
- لا مغديريش اللي عجبك زيدي قدامي للدار مغنشوفكش كتغرقي قدامي ونبقا ساكتة .. والا غانقول لوليد كلشي وديك الساعة غيرجع يحبسك فالدار عاود حتى يجي شي شارف يتزوجك.. داكشي اللي كيجي معاك نتي.. 
مللي سمعات سيرة وليد وهي تسكت وجات معايا وداك وجه الويل بقا كيخنزر فيا.. مكرهتش نشنقو .. بنادم وجهه قاسح.. تأليف دودي elaissati
من داك النهار مبقاتش كتهضر معايا خديجة.. وانا غا حاضياها .. بنادم هبيل هي كتبغيه وكتتحدا العالم على قبله ومعارفاش باللي هاداك اوسخ انسان على وجه الارض .. بزاف على الكلاخ والثقة اه كلنا كنبغيو ولكن كنبغيو بالعقل.. ماشي كنغرقو .. وصل مهار فاطمة الزهرا الحفلة كانت زوينة بزاف.. مشات لدارها بقات فينا وبكينا وودعناها ووصينا راجلها يتهلا ...