الجزء 8
بدلت حوايجي ووليد خرج من البيت بعد لحظة رومانسية.. واخا كيعصبني ولكن الزوينة اللي فيه انه دغيا كيرجع للصواب هادشي كيشفعلو ..بدلت حوايجي هو معرفت فين مشا .. خرجت نقلب عليه لقيتو فالكوزينة.. داير الطابلية وكيطيب..
- حادك مع راسك..
- لعيون حبيبة قلبي ندير اي حاجة..
- انا مافياش جوع لاش معدب راسك..
- باغا تخلي ولدي بالجوع.. هو جيعان .. مبغيتش ياكل من ماماه.. مازال بغيتها فحياتي.. هههه
- ههه واخا اسيدي..
- اجي اش كاديري هنا سيري رتاحي.. خسرتيلي المفاجئة ..
- صافي هانا غادية.. مشفت والو.. كنستنا المفاجئة..
- ههههه
مشيت للبيت بقا شوية لقيتو جايبلي الصينية ومزينها بالورد.. بديت ناكل ... وحتى هو كيوكلني.. ممم الماكلة زوينة بزاف مكانش يصحابلي باللي حادك حتى هاد الدرجة.. كنت حاكراك.. ههه
- ايوا شتي.. راجلك علاياش قاد..
بقيت كناكل حتى تخمت.. وبقيت كنهضر مع وليد حتى داني النعاس وانا على صدرو..
الصباح حليت عيني على وليد..
- شنو ..
- نوضي نوضي .. ياك خاصك تديري التست..
شفت فالساعة لقيتها الستة دالصباح..
- ههه واش بايت كتحلم بيها ولا.. هههه
- انا منعستش اصلا.. ههه بغيت نعرف .. يالله نوضي باراكة من العكز.. حيت عندي بزاف ميدار..
- اش عندك..
- خاصني نوجد بيت للبيبي ونشري كونة ديالو.. ونشري الالعاب والحوايج..
-ههههه ومفكرتيش فالمدرسة اللي غتسجلو فيها..ههه حياتي راه مازال الحال على هادشي.. راه كاينة تسع شهور ديال الحمل.. ومازال خاص نتأكدو منو اصلا..
- وانوضي مضيعيش الوقت.. مالك دايرالي التشويق،..
- هانا نايضة..
نضت مشيت للطواليت درت التست وهو بقا عليا حللي الباب حللي الباب... حليتلو الباب وبقيت كنستنى التست حتى لافابو وهو شادلي فالخصر ديالي من اللور وكيستنى بشوق.. ديك الشرطة حلفات لاتولي حمرا... شدني اليأس..
- اوووف.. ماحاملاش اوليد..
باسني فكتفي وقال: ماعليش يمكن فالشهر الجاي تحملي.. حنا مامزروبينش ...
مشيت بالثقال وتخشيت فالمانطة ..
- انا غننعس..
- واخا احبيبة..
بقيت فالمانطة مفقوصة وماجانيش النعاس.. ياريت لوكان شريت التست بلا خبارو ولا هاد الحشية ..
وليد بدل حوايجو ومشا للخدمة.. وانا بقيت كنفكر .. بقيت فالناموسية حتى وصلات وقت الخدمة نضت بدلت حوايجي .. مشيت للخدمة .. دوزت نهار من اسوء ما يكون.. خايبة بزاف يوقعليك هاكا..مهضرت مع حتى واحد كلشي لاحظها فيا .. مللي وصل وقت الخروج.. هزيت صاكي وخرجت لقيت وليد بالطوموبيل كيستنى.. ركبت معاه..
- ماشي من العادة تجي فهاد الوقت.. واش وقعات شي حاجة..
- توحشت مرتي.. وجيت نشوفها.. كاين شي مانع ..
- لا ابدا.. مرحبا..
- مالك اهدى.. شكون عصبك..
- والو مابيا والو..
- لا فيك وانا عارف شنو فيك.. حياتي سمعيني.. ماشي حيت محملتيش دابا راها نهاية العالم..
- اه عارفة.. انشاء الله قريب
- هاكاك نبغيك.. وترجلي معايا شوية هههه انا عندي ليك مفاجئة...
-يا ملك المفاجئات..
- غنمشيو لواحد البلاصة غتعجبك بزاف..
- فين ..
- مغتسماش مفاجئة الا قلتلك..
ديمارا الطوموبيل ومشا بعيد خارج المدينة حتى وقفنا عند واخد الدار زوينة تصميمها اوروبي.. تبهرت بيها.. شكون قال الذوق والرومانسية راها غير فالناس الكلاس.. وليد من نهار تزوجت بيه وهو كيديرلي مفاجئات فوق الكلاس..
0 Commentaires