اخو البنات - الفصل الثاني - الحلقة 3

الجزء4
بقيت كنتناجر مع راسي.. ومفقوصة.. اووف.. شوية جا عندي العساس قالي راه راجلك كيستناك.. نقزت من بلاصتي .. وليد كنت عارفك مغاتسخاش بيا.. جريت ركبت فالطوموبيل قربت عندو نبوسو وهو يبعد وجهو وماشافش فيا.. مرضيتش.. بقا فيا راسي بحال الا كنبزاز راسي عليه.. 
- كما بغيتي اوليد... ديمارا الطوموبيل ومشينا للدار.. خرجت ودخلت للدار بلا منستناه دخلت ديريكت للبيت.. وصدمني داكشي اللي لقيت.. 
قلب الطبلة ومرون كاع داكشي اللي قيلت النهار كامل كنوجد فيه ونصاوب.. ومقطعلي حتى الشوميز ديالي... خرج غدايدو فهادشي..بقيت جالسة فالارض وكنبكي.. واش بداو المشاكل صافي.. علاش مكيتفهمنيش ياك قال باللي كيبغيني وكيحارب الدنيا كاملة عليا.. علاش غير انا اللي خاصني نضحي..انا كندير المستحيل باش نوازن بين الخدمة وبينو هو... بقيت كنبكي حتى خرجت كاع غدايدي فالبكا..شوية لعنت الشيطان.. وقلت لا انا مغانضيعش هاد الويكاند فدباز غانوض نرغبو شوية.. جمعت ديك الطبلة.. وديك الروينة كلشي .. وخرجت نقلب عليه .. مباين ليه اثر.. اويلي فين مشا.. طليت من السرجم لقيت الطوموبيل مازال كاينة.. واش يكون خرج بلا طموبيل ولا يكون مازال فالدار.. بديت نقلب عاود شفت فبيوت البنات.. الصدمة كانت مللي لقيتو ناعس فبيت سليمة.. حتى هاد الدرجة ماحاملنيش .. زيرت راسي وبديت نفيقو.. 
- وليد.. حياتي نوض تنعس فبيتك.. عفاك نوض 
- خليني عليك اهدى.. واش باغا.. سيري تنعسي وقيليني عليك.. 
- انا مغانقدرش ننعس بلا بيك.. نوض عفاك.. بلا منضيعو هاد العطلة فالدباز.. ومتهضرش معايا غا نوض تنعس حدايا.. عفاك.. 
ناض وجلس بقا كيشوف فيا.. 
- سولي راسك شكون كيضيع على لاخور الويكاند.. انا عييت اهدى عييت.. راني كنصبر بلا قياس.. مبقيتش كنحس معاك باللحظة .. كنقول دابا يصونيلها التلفون وتمشي وتخليني فالنص.. 
- وليد عفاك واش بغيتيني ندير.. راه هاديك حياة الناس واش نتهاون فيها.. عفاك صبر شوية.. ونوض احياتي.. هانا معاك ومغيصونيلي حد راني خليت تما طبيب الحراسة.. 
- متأكدة مغايصوني حد؟
- متأكدة.. واش غنبقاو هنا زيد قدامي.. 
- ومال هاد الناموسية خايبة؟ ههه 
-هههه زيد اعمري لبيتنا .. 
- هاهو غادي.. تأليف دودي

الجزء 5
تصالحنا انا ووليد وداز الويكاند زوين .. الحمد لله معيط عليا حد ومخسر عليا حد لحظاتي مع وليد.. رجعت للخدمة وبقيت خدامة بوتيرة مستقرة.. مكنتعطلش.. واحد الليل سمعت التليفون كيصوني.. تلفت باش نجاوب سمعت وليد كيقول اووف رجعنا عاودتاني.. ولكن هادي مكانتش مكالمة من المستشفى.. هادي كانت نمرة خديجة.. 
- هادي خديجة.. الو
- هدى عتقيني.. معرفتش مال الحاج .. مكيتنفسش ومكيتحركش..وانا خايفة بزاف.. مقلتها احتى واحد خايفة يضربوني ولا يقولولي نتي اللي درتي فيه شي حاجة.. 
- اويلي ..تهدني انا غنتاصل بالاسعاف.. وغنجيو انا ووليد حالا عندك.. مديري والو واخا.. 
وليد: مالها
هدى: نوض دغيا راه قالك الحاج مريض
وليد: هو اللي بقالي فالحساب.. نقطع نعاسي على قبلو
ناض وبدل حوايجو بسرعة وحتى انا مشينا حلات لينا الباب.. عائيلة الحاج مفهمو والو.. طلبت منهم يخرجو ويخليوني معاه حفظ الله كان وليد.. اما هادو كانو غيجمعوني انا وخديجة بجوج.. دخلت فحصت الحاج وخديجة معايا مخلوعة.. للاسف الحاج كان فارق الحياة.. 
- خديجة ختي الباراكة فراسك.. الله يرحمه.. 
- اويلي على سعدي.. اش غاندير .. 
- وسعي خاطرك هادا راه قدر.. 
- اش غانقول ليهم .. غايقتلوني 
- جمعي حوايجك المهمة وحنا معاك مغيوقع والو.. غطيت الحاج وخرجت عند عائلته اللي كانو كيستناو .. 
- البركة فراسكم... الحاج في ذمة الله.. 
بداو يبكيو ناض واحد بدا يدابز: هي اللي قتلاتو هي.. من نهار جات وهو اللور.. غنقتلها.. شدو وليد .. وقالو نهار تقتلني انا ديك ساعة قتلها هي...بدا الصداع .. خرجت خديجة من تما واتصلت بالاسعاف.. 
دينا خديجة للدار اما الحاج داز للطبيب الشرعي واتضح من خلال التشريح انه مات بأزمة قلبية.. 
عائلته مخلاوش خديجة تدي العزاء.. فكان العزاء عندنا فالدار.. 
دازو ايام.. وخديجة شادة حق الله على راجلها وحزينة عليه واخا كان شارف ولكن كان كيتهلا فيها.. حتى النهار اللي جا فيه المحامي للدار.. قالينا خاص تجتمع خديجة معا عائلة المرحوم باش يفرقو الورث..خافت تمشي بوحدهاومشينا انا ووليد معاها.. بعدما تجمعو قاليهم المحامي باللي الحاج قبل ما يموت بمدة كتب لخديجة شي اراضي وشي ديور فاسمها.. الى جانب حقها الشرعي اللي غاتاخدو بحيث غتقتسم هي وزوجاته الثلاث ثمن ثروته.. خديجة بهاد الهضرة ولات مليونيرة .. هاد التركة اللي خلا ليها الحاج مغ اللي خلا ليها باها كتكون ثروة.. مكانتش على البال.. ان خديجة فيوم من الايام غتولي لاباس عليها.. عائلته متقبلوش الموضوع بتاتا.. وناض الصداع فالمجمع وانسحبنا حنا.. غريبة هاد الدنيا.. خديجة عجبها الحال بزاف .. بعد هادشي.. ومادارتلو حساب.. سبحان مبدل الاحوال...