رجل بقلب طفل - الحلقة 2

الجزء 2
فالوقت اللي العيالات كينكدو فيه على رجالهم بسبب الفقر .. انا وقعلي العكس.. راجلي هو اللي منكد عليا حياتي بسبب هادشي ... عييت بقوة الصداع كل نهار.. وليت باغا غير شي نهار نكون فيه مهنية.. مافيه لا غوات ولا والو.. مرضت بهادشي ومليت.. نفس الشيء كيتعاود.. بعض المرات كنفكر نتخلص من هاد الصداع ونديرلو داكشي اللي باغي.. ولكن كنفكر.. الدنيا فانية.. واش الانسان كيفكر شنو يدير لوالديه بعدما يموتو وانا نمشي نقطعها عليهم.. نحيد ليهم بدل مانعطيهم.. اش هاد الموقف راني فيه حتى واحد ميبغيه لراسو.. بلا حب بلا زواج بلا زفت.. لوكان بقيت بايرة حسن لي.. الشيء الوحيد اللي عندي فالدنيا ومصبرني هو ولدي هيثم.. روح قلبي.. كيصبرني على الصداع ديال باباه.. على الاقل مللي كتزيد الحدة ديال الصداع بينا كنمشي ننعس مع ولدي.. كل نهار هاكا.. دازت سيمانة مكنهضرش مع مصطفى.. كنسكت وهو غا مازايد كينكر وكيغوت فالدار.. مكنبغيش نتزايد معاه حيت غانوصلو لشي طريق خايبة.. كنوض الصباح كنوجدليه ماياكل وكنفطر ولدي.. هو كيمشي لخدمته اللي مهبلنا بيها وانا كنبقا نوصل ولدي للروض ونرجع .. ندوز نهاري فهدوء.. ونخمل الدار.. كتوصل وقت الغدا اللي كنكون موجداه كنمشي نجيب ولدي.. وهو كيجي كنتغداو .. وليت ديما ساكتة وكنتفادا اي صداع معاه.. كيخرج يدير شي قهيوة مع صحابو.. وانا كنبقا مع ولدي.. حتى الخروج مانعو علينا.. مكانش مشكل بالنسبة ليا.. المهم غير يهنيني من الصداع..تأليف دودي واحد النهار تعرضت نتعشى عند واحد السيد من عائلتي... قنعتو نمشيو غا بزاز.. خصوصا ان العائلة ديالي كلها غاتكون تما.. غايكون المنظر ديالي خايب بزاف الا مامشيتش.. قنعتو غير بزاز.. مشيت وانا فرحانة وشادة فراجلي وولدي معايا.. العشا كله وهو ساكت.. وايلا مشا حتى هضر عندي شي واحد راجل من العائلة واخا غا يسولني كيدايرا.. نلقا مصطفى كيخنزر فيا.. الله يستر مزوجة بعشماوي.. بقا مخنوق غا سالينا العشا ناض وقالي زيدي نمشيو بحالنا.. استأذن وخرج.. سلمت على عائلتي وانا محرجة من هاد التصرف اللي دار راجلي.. مشينا للدار وبدا ينكر عاود تاني..dodi elaissati

http://dodielaissati.blogspot.com/