رجل بقلب طفل - الحلقة 1

رجل بقلب طفل.. 
تأليف دودي الجزء الاول: 
- كان يا مكان.. في قديم الزمان.. كان واحد الامير .. زوين وكان عايش فقصر زوييين.. كان سميتو هيثم.. 
- ااا ماما بحالي.. 
- اه اولدي تماما بحالك نتا.. وكان عندو حديقة كلها ورد.. كيعتني بها..كبعتبرها الكنز ديالو.. حيت زوينة بزاف.. وكان واحد الشرير باغي يخسرليه ديك الحديقة حيت بغا الكنز.. 
- ماما ماما شنو هو هاد الشرير.. 
- كاين اولدي الخير .. هي الحاجة الزوينة فالدنيا .. وكاين الشر .. وهي الحاجة الخايبة فالدنيا.. 
- نتينا خير.. وكرم اللي كيقرا معايا فالروض شر.. 
- هههه اولدي العزير.. الشر والخير ماشي بنادم.. هادو طريقين فالدنيا.. واللي بغا الخير كيدوز من طريق الخير.. اما اللي بغا طريق الشر. كيدوز من طريق الشر... 
مصطفى: منى.. واش غاتبقاي تما.. باراكة من دوك الفشوش اللي نتي دايرالو.. نوضي واش معنداش غير ولدك فالدنيا .. راكي مزوجة زعما وعندك راجل ومسؤولية.. 
منى: صافي سير انا جاية.. 
هيثم: ماما.. واش بابا شرير..
منى: لا اولدي علاش كتقول هاد الهضرة.. 
هيثم: حيت ديما كيتعصب عليك .. وكيغوت وكيدابز.. 
منى: ولدي..باباك كيتعصب وصاف.. ولكن هادشي مكايعنيش انه شرير.. يالله نعس اولدي.. تصبح على خير البطل ديالي.. 
بست ولدي وغطيته.. ومشيت نشوف هاد الراجل اللي بلاني بيه الله.. ولكن ماعليش الصبر زوين.. على الاقل على ود ولدي.. انا منى مرا مزوجة كجميع النساء.. كانت الايام الاولى لزواجي زوينة.. ولكن بعدها بدات المشاكل بعدما تزاد ولدنا.. تزوجت زواج تقليدي.. ولكن كنت راضية به.. ولكن هاد المشاكل حتى واحد مكيقدر يتحملها dodi elaissati.. مع ذلك انا مجبورة نصبر ونسكت .. حيت كما كتقول ماما حتى دار ماخلات من المشاكل.. وباللي هادي حاجة عادية.. والمرا خاصها تصبر.. 
منى: مالك على هاد الصداع .. خلعتي الدري.. 
مصطفى: الالة واش نتي هاملة راجلك وكتقوليلي مالك منوض الصداع.. لاش مزوج انا الا مانلقاش مرتي اللي تهدني وتنسيني فالمشاكل ديال الخدمة وديال الزنقة.. نهار كامل وانا خدام ونتي مبرعة مع ولدك.. مللي نجي ساعة منلقاكش.. 
منى: واش كتغير من ولدك.. مصطفى هاداك راه ولدك.. الله ينعل الشيطان.. قولي شنو اللي معصبك.. جلس نهضرو وايلا كانت عندك مشكلة نحلوها بجوج.. 
مصطفى: انا عييت .. الفواتير بزاف.. والصالير قليل.. مكانلقاش شكون يعاوني..عييت من المسؤولية.. 
منى: مصطفى.. هادشي بسبابك.. نتا اللي مابغيتينيش نخدم.. نهار اللول قلتيلي انا بغيت مرت الدار.. وهانا درتلك خاطرك وخرجت من الخدمة.. الا صعاب عليك الحمل .. انا ممكن نرجع نخدم.. ونتعاونو على الزمان.. 
مصطفى: اش هادشي كتقولي.. شنو بغيتي يقولو عليا عائلتي.. مستحيل نخليك تخدمي ولا تخرجي من هاد الدار اصلا.. انا تزوجتك للدار وغاتبقاي فيها..
منى: ايوا.. شنو بغيتيني ندير.. مكنصرف ما والو.. ساكتة وداكشي اللي كاتجيبليا كناكلو وكنسكت.. حتى الا بقينا بالجوع معنديش مشكل.. شنو بغيتيني ندير كتر من هادشي.. 
مصطفى: منى.. شوفي احبيبة.. نتي عندك ورث كبير.. علاش متبيعيش ديك الارض اللي خلاليك باك.. ندير بيها مشروع .. ونتهناو من هاد الفقر اللي حنا فيه.. ماشي معقول نتي عندك ورث كيساوي الملايين وتبقاي بالجوع.. 
منى: اولا ديك الارض.. خلاها با الله يرحمه للناس ديال الدوار.. صدقة جارية..كياكلو منها الغلة.. مستحيل انا نمشي ناخدها.. معندي ورث انا امصطفى.. 
مصطفى: واش باغا تسطيني.. واش السعاي يسعى ومرتو كتصدق.. واش اعباد الله حنا كنموتو بالجوع ونتي كتفكريلي فالصدقة الجارية ماشي حرام هادشي.. 
منى: سالات الهضرة فهاد الموضوع ومنبغيش نهضر فيه مرة اخرى.. سالينا.. بغيتيني نخدم نعاونك مرحبا مبغيتيش متجبدليش هاد الموضوع مرة اخرى.. واش غانبقاو ديما مدابزين عليه.. عييت انا عييت..http://dodielaissati.blogspot.com/