الجزء 29
دازو ايام وحبنا انا ومروان كيكبر يوم عن يوم.. ولينا ثنائي رائع.. واخا علاقتي بالواليد ديالو مازال على المحك الا ان الواليدة دياله ضريفة معايا.. الام هي هادي .. دائما كتبغي تشوف ولدها فاحسن حالة.. وهي مادامها شايفة ولدها سعيد معايا .. فاكيد حتى هي غاتكون فرحانة ومرتاحة.. دازت شهرين على زواجنا انا ومروان.. نسيت فيها كاع الالم والعداب اللي داز عليا.. حتى واحد النهار جات عندي الخدامة قالتلي راه شي مرا باغا تشوفني .. معرفتش هاد المرا شكون .. نزلت نشوف شكون لقيت سوسن هي اللي جات تشوفني وكانت حالتها .. تحت عينيها كحل ولابسة جلابة مبهدلة ووجهها باهت.. وعينيها منفوخين..
- اش بغيتي..
- بغيت نهضر معاك..
- جلسي.. كنسمعك..
- بغيتك تعاونيني..
- اش بيني وبينك.. ياك راجلك لاباس عليه..
- راجلي.. هه.. اشمن راجل كتهضري عليه.. هاداك ماشي راجل.. واحسن حاجة درايها فحياتك انك تفكيتي منه.. معيشني فالجحيم من نهار مشيتي..
- نتي اللي بغيتي نمشي..
- كنت غالطة.. كما كنت غالطة نهار تزوجته.. كان كيصحابلي انك مللي غتمشي غايولي عايش مزيان معايا.. ولكن كنت غالطة وبزاف.. من نهار مشيتي .. وهو كيضربني ومكيعاملنيش مزيان ونتي السبب .. كيسبني وكيعايرني بيك.. كيقول مكاينش شي مرا فالدنيا الا منى... اهئ اهئ .. حتى بالليل كيبات يحلم بيك.. واسمك مكايفارقش فمو.. نتي عايشة بيناتنا واخا مشيتي.. نتي سباب عذابي امنى.. مصطفى كيبغيك نتي وجابني باش يفقصك بيا .. وانا بحال الحمارة تيقته نهار جا وقالي كنبغيك.. انا حاملة ومع ذلك مكيحترمش الحمل ديالي.. كيضربني وكيعذبني ومكيهموش.. هو ندم عليك نتي..
- سوسن.. عرفتي باللي نتي تستاهلي هادشي اللي كيطرا ليك.. شنو كنتي كتسناي.. يهزك فوق راسو.. راه تزوجك على مراتو.. واللي مفيهش خير مع مراتو اللولة .. عمرو مغايكون فيه خير مع حتى شي واحد.. نتي وياه عذبتوني.. وذليتوني.. نتي اكبر خاينة فالدنيا.. خنتي صاحبتك.. وصديقة طفولتك على شنو .. على راجل.. على مصطفى.. هادي غي نتيجة ديال داكشي اللي زرعتي.. بيدك.. وجاية طلبي المساعدة من الفوق.. سيري خرجي من داري.. كما راكي شايفة .. انا عايشة مزيانة.. ومرتاحة.. ونسيتكم من حياتي.. معندي مندير بوجوهكم دابا .. لا نتي لا مصطفى.. انا ومروان كنبغيو بعضياتنا ومرتااحين..
- هه .. مروان؟؟ داك مروان اللي شراك بفلوسه..
- سكتي.. نتوما كتحسبو كلشي بلفلوس.. انا تزوجته حيت كنبغيه.. ماشي على فلوسه..
- نتي راكي مازال على نيتك.. كلشي دابا بالفلوس.. واش نتي صحابلك مصطفى طلقك غا هكاك.. هه مروان هو اللي عرض عليه قد اللي خداه المرا الاولى مقابل يطلقك.. يعني شراك جوج دالمرات.. المرا اللولة مللي شرا القلب ديال ولدك .. والمرا التانية مللي شراك نتي من مصطفى...
- مستحيل نتي كتكدبي.. مروان ميديرهاش.. مروان كيبغيني وماشي بحال باه..
- سيري سوليه .. وغاتعرفي كلشي.. انا كنت مع مصطفى نهار اللي هضرو.. وانا اللي قنعت مصطفى يوافق.. كان يصحابلي غادي نعيشو مزيان مللي غاياخد الفلوس وغايطلقك... ولكن كنت غالطة بزاف...
- خرجي عليا خرجي... اهئ اهئ اهئ ..
كنت تهنيت من العذاب.. دابا رجعتلو من جديد.. لا .. علاش امروان علاش..
0 Commentaires