الجزء 28
دوزت احلى ايام مع مروان واخا كان صعيب عليا نتأقلم مع الحياة الارسطوقراطية ديال عائلته .. ولكن الاهم هو مروان.. بقيت كنطل من البالكون وكنتفرج على المنظر الرائع ديال الجردة ديالهم... جا مورايا وعنقني بحب وبقا كيهضر معايا..
- انا فرحان بزاف حيت حققت الحلم ديالي معاك..
- حتا انا.. فرحانة بزاف.. نتا اللي نقذتيني من الجحيم اللي كنت فيه..
- كنبغيك بزاف امنى..
- حتى انا كنبغيك بزاف..
دقات الخدامة وعطاها مروان الاذن تدخل ..
- السي مروان الغدا واجد ..
- واخا حنا جايين..
نزلنا وجلسنا للسفرة.. شفت فالماكلة مافهمت حتى حاجة.. شي اكلات غا الله يستر.. زعما غاليين وديال الناس اللي لاباس عليهم.. انا الا كليت هادشي مغنشبعش.. خاصني نغمس الخبز فالمرقة باش نحس راسي كليا وشبعت.. همست لمروان غا بشوية..
- مروان.. اش هاد الماكلة الغريبة.. ههه واش كتاكله هادشي... الماكلة هي ديال الزرود وليدام ماشي هادي..
- ههه بيني وبينك.. حتى انا مكنحملهاش.. ههه ولكن غا كندير الخاطر..
خدالي اللحم وبدا كيوكلني.. ووالديه كيشوفو فينا بنص عين .. مللي كملو كلشي ناض.. شدلي مروان فيدي وبدينا نتمشاو فالجردة..
- مروااان..
- احياة مروان..
- فيا الجوع.
- هههههههههههه
- متضحكش عليا واش هادي ماكلة كتاكلوها..
- ندي حبيبتي لاي ريسطورون عجبها..
- يالله نمشيو لشي ريسطو شعبي .. ماباغاش ناكل بالعقل..ههههه
- اللي بغيتيها ولكن مكنعرف حتى واحد فيهم..
- انا غانوريك 😄
- متافقين .. 😍
مشينا ديتو لشي كرارص.. كلينا الكبدة مشوية .. هو بقا غير حال فمو .. مكانش عارف باللي كاين بحال هاد العالم فالدنيا.. هو موالف الكلاس .. صحابليه كلشي الناس عايشين هاكاك.. نزلت على ديك الماكلة كليتها حتى شبعت وحتى هو كلا على راحتو وعجباته الماكلة .. هادي هي الحياة والا فلا.. اشمن بريستيج واشمن ايتيكت.. نضنا بقينا كنتمشاو والروايح ديال المشوي ممم كترد الروح مخلطا بريحة التراب والغيص والزبل .. والصداع ديال الناس وللي كغوتو وكيبيعو .. والصوت ديال الكلاكسون ديال الطوموبيلات... هادي هي الحياة.. حتى مصطفى كان يمنعني من هاد البلايص.. حيت فنظره هادو بلايص دالناس اللي من طبقة سفلى.. انا كنت قنوعة بزاف وفرحانة كنت منتظرة منو غا يبتسم ويكون مرتاح ولكن هو مكانش هاكاك.. المهم هو راني مرتاحة دابا مع مروان. هادا هو المهم.. تسارينا وشبعنا ضحك .. مروان مسايرتي فكلشي وباغي غير يشوفني ضاحكة.. وكيدير اي حاجة باش يفرحني حتى ولو مكانتش مناسبة ليه.. دازو ايام والسعادة مكتفترقناش .. واحد النهار فقت من النعاس على لمساته .. وقلت نجبد معاه موضوع مهم..
- مروان..
- يا عيون مروان..
- انا الطبيب قالي باللي الرحم ديالي متضرر وصعيب نحمل.. يمكن غانتعطل.. عائلتك الى عرفو هادشي مغايعجبهم حال.. ويمكن يطلبو منك تتزوج حيت غايبغيو حفيد.. خصوصا انك الابن الوحيد ليهم.. انا كنقولك من دابا الا بغيتي تتزوج وتدير الاولاد مغانمانعش حيت من حقك.. يكفيني انك عطيتيني كل هاد الحب اللي عمري جربت بحاله..
- ششششت... منبغيش نسمع منك هاد الهضرة مرة اخرى.. انا ماشي مصطفى فهمتي.. مكيهمني لا ولاد ولا والو.. انا كنبغيك وكيكفيني نعيش تحت رجليك حياتي كلها.. انا كنبغيك نتي .. عرفتي شنو هي نتي.. وحاجة اخرى .. نتي الى فخاطرك تديري الوليدات انا غانديك لاكبر واحسن طبيب فالدنيا .. وتتعالجي.. اما بالنسبة لوالديا.. الى كيبغيوني بالصح غايحتارمو الرغبة ديالي..
- الله يحفضك ليا امروان..
- حتى نتي ياللي رجعات فيا الروح.. تأليف دودي.. Dodi elaissati
0 Commentaires