الجزء 30
بقيت كنبكي ونندب على حالتي.. فكرت نمشي لمصطفى.. خاصني نتأكد.. واش بالصح هادشي.. خديت تلفوني .. واتصلت بيه قلتله غانجي نهضر معاك .. هو وافق دغيا عرفت فين هو ومشيت ..
- منى.. انا ممتيقش راسي.. توحشتك بزاف.. حتى نتي توحشتيني انا عارف.. ميمكنش تنساي حبنا..
- مستحيل نرجع ليك.. مصطفى لاول مرة فحياتك .. غنسول وجاوبني لاول مرة فحياتك بصراحة..
- غانجاوبك امنى غانجاوبك اللي بغيتي..
- واش نتا طلقتيني حيت مروان عطاك مقابل.. واش بعتيني ومروان شراني؟ هضر عفاك.. قل الصراحة..
- اكبر غلط درتو فحياتي.. اني تفارقت معاك.. ولا ليلي بحال نهاري .. فاي حاجة كنشوفك قدامي.. سكنتي بالي.. كنبغيك بزاف،.
- جاوبني.. واش بالصح شديتي الفلوس باش تطلقني..
- اه .. شديت الفلوس من مروان .. ولكن ندمت.. تيقي بيا ندمت بزاف..
- حرام عليكم..
- منى.. انا مستعد نتخلى على كل هاد الثروة.. مستعد نلوحها فالزبل.. هاد الفلوس وحتى الفلوس اللي بعت بها القلب ديال ولدنا... ولكن.. عفاك رجعيلي انا مبقيتش قادر نعيش .. مبقيتش كننعس.. مستعد ندير اي حاجة باش نرجعو كما كنا عايشين من قبل.. انا كنت فنعمة معاك ومكنتش حاس بها .. عفاك امنى رجعيلي.. غانخدم ونحمد الله على الرزق اللي عطاني واخا يكون قليل.. المهم .. نكون معاك.. ونرتاح من هاد العداب اللي راني فيه... عفاك ..
- بعد مني .. خليني نرتاح خلاص .. باراكة حتى لهنا وقيلني .. خليني نرتاح .. باراكة حشومة عليكم..
مشيت كنبكي.. بقيت كنتمشا وماعارفاش راسي فين كنحط رجلي.. بالي ماراهش معايا.. كنحس بالتلفون ديالي كيصوني يصوني.. اكيد هادا مروان هو اللي كيصوني..
- الو..
- منى .. فينك قالتلي ماما خرجتي بسرعة شنو طرا.. فينك بعدا انا مشطون عليك .. قوليلي نجي عندك..
- بلا ماتجي ..انا نجي دابا باغا نهضر معاك.. تأليف دودي العيساتي
0 Commentaires