الجزء 27
درنا العقدانا ومروان عاد رجعات فيا الروح.. ومشا مني داك الخوف من مصطفى.. فكل لحظة كنت كنتخيلو جاي يردني وعائلتي وافقت.. كان مشكل الرعب بالنسبة ليا.. درنا حفلة خفيفة.. مدرناش العرس.. مروان كان فرحان بزاف.. فرحة لا توصف.. مللي مشيت ركبت معاه.. شدلي فيدي مطلقهاش وكل دقيقة كيبوسها وكيقولي انا اسعد واحد فالدنيا.. والفرحة ديالي متصورهاش.. ومامتيقش راسو.. حتى انا نفس الاحساس.. الله يدومها علينا فرحة.. مشينا للدار .. خدا صاك ديالو وطلب من الشيفور يجي معانا.. معرفتش علاش .. صافي مشينا للمطار.. وركبنا فالطيارة.. مروان طول الوقت شاد فيدي ..
- انا ممتيقش راسي .. واش صافي انا معاك..
- ههه لا تيق.. عيينا من الحوايج الخايبين فحياتنا..
- كنواعدك احياتي.. صافي عمرك مغادي تعيشي حاجة خايبة فحياتك.. كنواعدك غاتعيشي غير الحاجة الزوينة.. ومعايا..
- كنبغيك امروان..
- وانا كنموت عليك..
- قوللي فين غانميشو دابا..
- غانمشيو الالة.. لسانتوريني .. راها فاليونان .. من اجمل البلدان فالعالم.. ومن تما نمشيو لمقدونيا .. بعدها لصربيا ... هادو اجمل البلدان فالعالم... غاتنساي فيهم كل ما داز عليك فحياتك كلها...
- الله يخليك ليا امروان ... انا معاك سعيدة .. فينما كنت... المهم اننا مع بعضياتنا...
- صحيح.. اهم شيء اننا مع بعضياتنا.. كنبغيك..
- حتى انا كنبغيك...
وصلنا بعد مدة .. بدات المسارية.. مروان عندو الحق.. هادشي ينسيك فالدنيا ومافيها.. تغدينا ورتاحيتا.. مروان كان رقيق فالتعامل ديالو... كلشي حتى فالقبل ديالو كنحسو بحال شي طفل صغير .. رقيق وكيعاملني بواحد الرقة والرومانسية ماعندها مثيل فالدنيا.. مكنتش كنتخيل اني فيوم من الايام غانعيش هاد اللحظات.. حسيت راسي تولدت من جديد.. على يد هاد الانسان هادا.. حسيت كنبغيه بزاف ومنقدرش نبعد عليه حتى دقيقة.. دوزنا شهر العسل فهاد الدول.. الصراحة واحدة تنسيك فلوخرا زوينة بزاف.. رجعنا للمغرب.. ورجعنا للفيلا.. تلاقيت والدين مروان .. امه كتتعامل عادي لان سعادة ولدها هي اللي كتهمها.. اما باه هو اللي منفخ .. حتى انا مكنحملوش.. مللي كنفكر انه هو اللي شرا قلب ولدي بفلوسه..
0 Commentaires