الجزء 29
مشيت لداري.. وبقيت كنفكر فوليد.. احساس قوي كيقولي نرجع عندو .. الانسان كيعيش فالدنيا مرة وحدة.. ولكن لا.. كما قلت لخديجة الحاجة الساهلة مكتكون عندها حتى قيمة.. ووليد طغات عليه انانيته كراجل .. وخلاته يطلقني غير بسبب محاولة اغتصاب.. كجميع الرجال.. بزاف دالعيالات.. تلاحو فالشارع بسبب هادشي.. (القضية مستوحاة من الواقع).. وليد دابا حركوه المشاعر ديالو.. عارفة انه كيبغيني ومن اللول كان كيبغيني بجنون.. وكان كيتصارع للداخل ديالو بين نرجيسيته كرجل.. وبين عواطفه اتجاهي.. فالاول انتصرت انانيته.. اما دابا.. مبقاش قادر على الفراق.. وندم بزاف وهادشي شفته فعينيه.. عيا ميقمع قلبه.. ولكن صافي حبه خلاه يبقا بايت فبابي الليل كامل.. طمعا فعفوي.. علاش يوصل لهادشي.. علاش الانسان ميفكرش من الاول.. ويعرف ان تلك ضحية .. ماشي يعاملها بحال المجرمة.. علاش مجتمعنا كيقمع المرا بزاف.. علاش... عمرنا غنتبدلو الا بقينا هاكا وعمرنا غنتقدمو بتفكيرنا..
بقيت فالدار حتا كنسمع الدقان فالباب.. حليت لقيت وليد..
- واش مغاتعطينيش بالتيساع..
- هدى.. انا عمري مغنفقذ الامل.. علاش ولى قلبك قاسي بهاد الطريقة.. علاش انا بغيت فيك القلب الطيب وحبك للخير.. ولكن دابا وليت شايفة قدامي واحد الانسان اللي مكيعرفش لمن كيقولو العفو..
- نوض نوض.. اويلي اش ندير لهاد بنادم يا ربي..
دخلتو للدار مشا ديريكت باس ولدي .. غواتت عليه: بعد منه راك غاتعاديه .. جبدت شي حوايج كنت خديتهومله وخبعتهم مللي تطلقنا .. اعتراف كنت كنشم فيهم ريحته؟ وهانا دابا تفضحت..
- اش كايديرو عندك هادو ديالي ..
- نهار هزيت حوايجي تخالطولي مع ديالي وهزيتهم بالغلط... وزايدون بلا نقاش هاك سير تلبس راك فازك وكترعد..
- الله يجعلك تغلطي شي نهار وتسمحيلي.. اتشو..
-متخافش معمري غنغلط مرة اخرى..
مشا بدل حوايجو.. وجا عندي مهلوك ..
- ها المانطة تكمش فيها.. انا غنوجدليك واحد الصوبا سخونة باش تخرج منك داك البرودة اللي جمعتي.. تكمش فيها وهو كيعطس وكيترعد دارها فراسو .. وجدتلو لا صوب.. وديتهالو مقدرش ينوض تزاد عليه الحال.. بديت نشربهالو.. ولكن مقدرش يشربها.. بقا مكمش فالمانطة.. وكلو كيترعد.. وداه نعاس..بقيت معاه وهو ناعس..الصراحة توحشت نشوفو ناعس هاكا..بديت ندوز على شعرو الفازك.. وندوز على وجهه استغليت الفرصة ونتأمل فتفاصيل وجهه.. شوية حسيت بحرارة جسمه مرتفعة.. وبدا كيهذي.. وكيترعد.. ناري البرد دارها فيه..
- هدى انا كنبغيك.. هدى هدى.. انا معدب بلا بيك.. سمحلي اهدى..
مقدرتش نخليه هاكاك.. ضروري منجيبلو الدوا خفت نمشي ونخليه.. مشيت جبت خرقة فازكة وحطيتها على جبهته.. حل سريع على منجيبله الدوا .. مكان عندي حل الا نتاصل بياسين..
- الو ياسين.. ممكن تجيبلي شي دوا..
- مالكي اهدى ياكما مريضة .. عمران بيه شي حاجة..
- لا لا حنا لاباس.. عفاك جيبولي دغيا.. dodi elaissati
قلتله اسم الدوا .. دازت ربع ساعة لقيتو جا.. دخل معايا تصدم مللي لقا وليد فالدار .. وهو ليمن جاب الدوا محملش راسو على بالو رجعنا.. استأذن ومشا..
انا درت الدوا لوليد.. اللي كان كيحل عينيه غا بزاز ومعارف راسو فين..بقيت مقابلاه الليل كامل بقيت فايقة وهو طول الليل كيهذي .. صبح الصباح وانا فايقة.. حتى لقيت حرارته شوية لاباس.. وانا نحط راسي عندو ونعست وانا جالسة..
0 Commentaires