رجل بقلب طفل - الحلقة 21

الجزء 21 
خبعت الرسالة باش غدا نحطها فالمكان الموعود.. وبقيت سرحانة.. كنفكر.. واش انا باغا مروان.. ولا باغا نهرب غير من مصطفى.. افكار بزاف نزلات على مخيلتي.. بقيت هكاك حتى داني النعاس.. فقت على الدقان فالباب.. نضت كنحك فعيني.. حليت لقيت مصطفى.. 
- علاش سادة الباب.. 
- علاش جاي سير عند عروستك.. 
- انا اللي نقرر فين نمشي ولا منين نجي.. راكي ناعسة.. مهمكش نكون مع وحدة اخرى.. 
- وشنو توقعتي تجي تلقاني كنبكي عليك.. نتا حر دير اللي بغيتي.. عاد قلتيها نتا تدير اللي بغيتيه فوقاشما بغيتي.. 
خليته ومشيت تخشيت فالناموسية ديالي ودرت راسي ناعسة.. جا تخشا حدايا وبقا كيبوس فعنقي وفظهري..
- ولكن انا باغيك نتي.. مكتهمني حتى واحدة من غيرك.. 
- سير عند سوسن وخليني ننعس.. انا مكتهمني لا نتا لا غيرك.. 
لاح الكاشة وناض وهو معصب.. زدح الباب وخرج.. نضت من موراه وسديت الباب.. هاد مصطفى مريض فمخو.. كيستنى مني نفتحليه دراعاتي.. ونحضنو ونقولو توحشتك احبيبي شحال وانا نستناك ترجع عندي.. الحب اللي كان بنا هو اللي قتله بطمعه.. دابا مبقا عندي مندير بتودده معنده لاش يمثل عليا دور العاشق. 
الغد ليه نضت .. خرجت نشوف ما نفطر.. بقيت مع التوجاد.. حتى خرجو العرسان من البيت.. سوسن خارجة كتلوى بالشوميز دو نوي.. ومصطفى شاد ليها الخاطر وكيضحك معاها .. على بالو غايفقصني بها.. 
- مصطفى.. انا بغيت نفطرو انا وياك هنا فالصالون .. 
- مايكون غير خاطرك احياتي.. منى وجديلينا الفطور دغيا.. 
بدات كتشوف فيا سوسن بنظرات ديال انتصار .. عمري تخيلت اني نطيح فموقف بحال هادا .. ومعاها بالضبط .. حتا واحد معارف لاخور شنو مخبي ... 
مشيت وجدت ليهم الفطور ياكلو فيه جغديد انشاء الله.. حطيتوليهم.. بدا كيوكلها قدامي .. وانا نمشي للكوزينة باش منتقياش بمنظرهم.. الدنيا دوارة.. ولكن غا بصحتهم.. يعطيوني غا التيساع.. مبغيت والو .. كنسمع ضحكاتهم.. ودلعه ليها.. انا عمره مادارلي هكاك.. كان ديما النكير سابقه.. مللي كملو.. غوت عليا باش نجي نجمع الطبلة .. بقيت كنجمع.. وهما غا زايدين فالضحكات.. بحال الى عاجبهم الحال يذلوني بجوج.. قلبهم عامر حقد.. هاد الجوج بالضبط من طاسيلة وحدة.. ومن عجينة وحدة.. تأليف دودي.. بقيت مع الشغل ديال الدار.. ومصطفى كيستغل اي فرصة باش يفقصني بها.. منها مللي بديت التسياق.. جات هي وبدات غادية جاية فالما بحال الى قاصدة تستفزني.. انا شديت راسي.. شوية بالعيا قلت ليها جلسي خلاص باش نكمل.. وهي تبدا تبكي..وتتخصص وكتقول لمصطفى راها غوتات عليا وانا مادايرا ليها والو.. استعملا كيد النسا... مصطفى لقاها سبة وبدا كيدابز معايا .. مقدرتش نصبر بديت كنغوت على حقي .. وهو يطرشني.. سكتت وكمدتها فقلبي.. باش ميزيدش فيهم ويضحكها فيا.. حاولت نكمل ونسكت.. وهي جاية غادية.. وهي تغوت عاود تاني بواحد الميوعة.. سيدي مصطفى.. اهئ اهئ .. منى رشاتني بالما الموسخ ديال التسياق.. 
هو جا وخدا داك السطل ديال الما الموسخ وكبو كله عليا.. قمة الذل.. وقمة الانحطاط.. مقدرتش نصبح سمحت فداكشي كله.. ودخلت للبيت ديالي وبديت نبكي.. الله يا ربي شنو درت فحياتي باش يوقعلي هاكا...