رجل بقلب طفل - الحلقة 20

الجزء 20
دازت سيمانة والعريس كيوجد.. وفرحان.. غريبة هاد الدنيا.. شي ناس كنا دايرين فيهم ثقة العمية وهما يحفرولينا.. مبقاوش الصحابات.. ولا عددهم قليييل بزاف.. هادي اللي كنت شايفاها ملاك.. طعناتني.. ولكن تستاهل.. انا خاصني نفرح ليها.. هي يصحاب ليها خرجات على كنز.. لوكان الراجل فيه خير.. كان غايكون مع مرتو للي غدرها معاك..  معارفاش انها طيحات راسها في اكبر فخ فالدنيا.. وانها غاتزوج احقر راجل على وجه الارض.. اللي يزرع غايحصد.. جا النهار اللي انتقلنا للدار.. كانت فعلا واسعة.. وراني بيتي فيها .. وصل النهار اللي غايدير فيه العرس.. جاو عائلتي يحضرو عرس ضرتي.. وانا لبست قفطان.. وكنتفرج فهاد الناس اللي شي كيزغرت فيها شي كيشطح شي كيفرق الحلوى .. انا ساكتة ومادويت مع حتى واحد.. من غير اني كنسمع وشوشات.. ديال العيالات علي.. كأنهم كيستناو نوض ندير شي روينة.. ولا نبكي.. جات عندي عجوزتي وجلست معايا.. 
- بنتي.. انا عييت معاه.. قلتله متتزوجش.. الاولاد ماشي كلشي فالدنيا..ولكن هو دار اللي فراسه.. انا مقهورة عليك ابنتي وحاسة بيك.. حتى انا فايامي.. راجلي تزوج عليا.. ولكن الفرق بيني وبينك انه تزوج بلا سبب.. ولكن الله كيدير الخير الا المرا صبرات.. 
- متخافيش عليا اخالتي.. ومتحمليش راسك ذنب ماشي ديالك.. خليه يتزوج جوج وثلاثة ولا حتى اربعة الى بغا.. من نهار مات ولدي .. وانا مات كلشي بالنسبة ليا.. 
- الله يرضي عليك ابنتي... 
ناضت من حدايا عجوزتي.. شوية جات جلست حدايا واحد البنت مكنعرفهاش.. 
- نتي هي منى.. الصراحة نتي زوينة بزاف.. ومتستاهليش هادشي اللي كدوزي منه.. ولكن الفرج قريب انشاءالله..
- نتي من عائلة سوسن ولا.. 
- لا .. انا من طرف مروان.. 
- 😳 شنو جاية ديري هنا .. مبغيتش مشاكل عفاك.. 
- متعيقيش وتصرفي عادي.. انا حطيتلك بواطة ديال الشكلاط فبيتك.. فيها رسالة منه.. قرايها .. وهو غادي يجي كل نهار مع الثمانية ياخد رسالتك من تحت الباب... وغايعطيك وحدة اخرى بنفس الطريقة مللي يمشي راجلك... حتى يفرجها الله.. 
- واخا.. 
نضت مشيت لبيتي .. فعلا لقيت البواطة.. خديت منها الرسالة وخبعتها.. ورجعت لبلاصتي بين الناس.. باش ميعيقوش بيا.. سالا العرس.. 
مصطفى: منى اجي سلمي على صاحبتك.. 
منى: مبروك .. اصاحبتي العزيزة.. 
سوسن: الله يبارك فيك احبيبة.. شكون كان ينوي اننا نتشاركو نفس الراجل.. شتي البوكوص اللي كنتي كتتباهاي بيه بنا ولا ديالي حتى انا ههه ... 
الله ينعل.. بنادم كيف داير وشنو مخبي من الداخل ديالو.. 
طلعت لبيتي .. وخليتهم ينشطو مع راسهم.. مكانوش كيهموني قد مكان يهني نقرا ديك الرسالة .. سورت الباب.. وجبدت الرسالة نقرا.. 
عزيزتي منى.. اعرف جيدا انكِ مسجونة وان عذابكِ لا يوصف.. وانك قد تعرضتي للتهديد يوم جئت بالشرطة الى منزل زوجكي.. اعرف كل ما تمُرين به.. فانا اراقبكي على الدوام.. رغم توبيخ ابي لي واصراره على ان اترككي وشأنك انت وزوجك.. لا استطيع ان اترككي .. بل هذا مستحيل فحياتي لا تساوي شيئا بدونك.. لم اعد اتذوق طعما للحياة .. منذ ان افترقنا.. لا اعرف ما الذي فعلته به.. ولا اعرف لماذا الاحقك واصر على ان اكون بجانبك.. اعترف لك .. انه لا تمضي علي ثانية الا وانتي في بالي.. كيف لا .. وانت التي انجبتي هذا القلب الذي يدق باسمك.. قلبي منك.. لا اعرف الا اني احبك.. واعشق كل تفاصيلك.. طفلك يصرخ من داخلي.. يريد ان يكون بجانبك.. لم اعد استطيع ان اتحمل.. اريد ان اكون معك .. ان احيى بجانبك .. والا .. خوذي هذا القلب .. ودعيني ارقد بسلام.. مع تحيات رجل بقلب طفلك..
الرسالة زعزعاتني.. مخلات فيا عقل.. كيفاش غادي نقدر نخرج منهنا وانا محبوسة.. من كل الجوانب.. خديت ورقة وستيلو.. وخليت قلبي يكتب.. عزيزي مروان.. رسالتك جعلتني ادمع للحالة التي وصلت اليها فانا لم اكن انوي ان اكون سببا في يوم من الايام لحزنك.. اما عني.. فقد تجاوزت مرحلة الالم بكثير.. ودخلت مرحلة التبلد واللامبالاة.. واكاد اقترب من الاستسلام.. فقد نسيت انه من الممكن ان يأتي يوم اخرج منه من زنزانتي.. ارجوك لا تنتظر الوهم.. فأنا وهم وبعيدة كل البعد عن الواقع.. من فضلك انسا هذا الوهم.. وابدأ حياتك من جديد .. حياتا تستحق ان تضحي فيها مع شابة من مستواك.. تحياتي يا طفلي ..