اخو البنات -الفصل الثاني - الحلقة 20

الجزء 28
عارفة باللي كيتفقص .. وباللي هو نادمان ومكرهش يكون معايا دابا .. ولكن انا غنربيه.. حتى يتعصر مزيان باش يتعلم يعرف قيمة هاد المرا.. بعدما ولدت هملت نشاطي فالجمعية .. ولكن غنعوضهم..سليمة راها حاضرة معاهم وبدات كدير حملات توعية ونفعات بزاف ديال الناس.. وصالحات بزاف ديال الازواج.. ابتسام جابت لينا خبار زوينة بزاف.. اه التركي طلبها للزواج حيت بعدما خدمت معاه حقق مكاسب خيالية.. واعتبرها حظه.. طلبها للزواج على التقاليد..وقررو يديرو حفلة بسيطة.. طبعا انا غائبة فالحفل واخا عيا وليد كيرغب فيا وابتسام ولكن انا رفضت.. سافرت ابتسام مع راجلها البوكوس.. ورجعت للروتين مع ولدي..كنستغلو معايا حيت غنرجع للخدمة من جديد.. واحد النهار اتصلات بيا سليمة وبدات كتعاودلي الاخبار.. قالتلي باللي عروستهم دابزات هي وخديجة وتناتفو حيت قالت لوليد بللي خديجة موصلها واحد الراجل للدار.. وهما اللي كانو حباب .. 
- خديجة مازالة مع داك ولد عمك الحقير..
- اه ياختي لاصقة.. 
- نقولها ونعاودها.. هداك غا كيدوز بيها الوقت.. 
- ايوا شكون يسمع..
مبقاش كيهمني نسمع الصداع ديال وليد ومرتو وعائلته.. اللي كيهمني هو ولدي.. المرا مللي كتجرح من الراجل المرا اللولة واخا رجع ليها واخا تعدب وولا عبد وخاتم فيديها.. كيبقا داك الجرح فقلبها ومكاتسامحوش.. ومكتوليش كتخاف عليه.. 
واحد النهار كنت فالدار كنلعب مع ولدي حتى شفت التلفون كيصوني.. شفت فيه لقيته وليد.. خليته يصوني... بالعاني.. ماشي فوقاش بغاني يلقاني.. بقا كيصوني مرة وجوج وتلاثة.. شوية بدات سليمة كتصوني.. جاوبتها .. كانت كتبكي.. 
- هدى عتقينا .. خديجة حاولت تنتاحر.. حنا فالسبيطار اجي دغيا عفاك.. 
- واخا انا جاية..
بدلت حوايجي... وبدلت لولدي وهزيته معايا.. الواجب ينادي.. مشيت.. وعطيت الولد لسليمة.. وانا دخلت دغيا.. عاونت الاطبة داروليها غسيل معدة.. هادي كانت باغا تموت نيشان.. خرجناها حتى فاقت.. الحاجة بدات كتقول الله يرضي عليك ابنتي.. لاول مرة كنشوف العروسة.. ناري على شوفات.. لوكانو يقتلو كانو قتلوني .. كلشي كيشكرني.. عمران بقا مع عمته .. احسن من باه.. حيت عارفاها مغتخليه لحتى واحد يهزو.. هادشي كيفهموه غا العيالات.. ستنيت خديجة تفيق.. مللي فاقت شافت فيا .. وبدات كتهضر بزاز..
- علاش عتقتيني.. علاش مخليتينيش نموت..
- واش حماقيتي.. باغا تموتي كافرة.. شفت حتى عييت وعمري شفت فقلة عقلك نتي.. ومكتتعلميش من اخطاءك ابدا.. علاش بغيتي تنتاحري.. حيت سمح فيك؟؟.. عادي حتى انا سمح فيا وليد.. وطلقني وانا حاملة.. كاع مامتش.. وكاع منتاحرتش.. ودابا كيموت باش يرجع عندي وانا كرامتي فوق كلشي.. ماشي بحالك نتي نهار صفرليك مشيتي طايرة عندو.. الحاجة اللي ساهلة معندهاش قيمة.. 
- ياريت لوكان سمح فيا وصاف.. كمال خدا كل املاكي.. ومشا الخارج..وقالي مكنعرفك مكتعرفيني.. وعايرني.. 
- عطيتيه كل املاكك يا الهبيلة.. وباغاه يجي يتزوجك.. ماراكيش عايشة فدريم لاند.. 
- ياريت لوكان سمعت كلامك من الاول.. يا ريت.. 
- شوفي فيا.. انا غندير معاك واحد الخير لوجه الله.. ماشي فوجه حد.. غانصيفطك لعند واحد المحامي.. يمكن يقدر يرجعلك رزقك.. ترفعي قضية نصب عليه وتقولي باللي هرب برا بفلوسك.. مع ان القانون لا يحمي المغفلين بحالك.. ولكن يمكن يلقى شي ثغرة.. يمكن..ويمكن يكون هادا درس ليك باش تتعلمي ديري قيمة لراسك.. ماشي حتا يديرهالك شي واحد.. مابقا فيا غا الحاج الله يرحمو ولمن ورث املاكه.. 
- هدى.. سمحيلي عفاك.. ديما كتعتقيني.. وانا معارفاش قيمتك.. سمحيلي عفاك..
- المسامح هو الله.. استغفري وتوبي حيت ذنوبك كترو.. 
خرجت من عندها وخديت ولدي.. كلشي دخل عندها الا وليد.. جا لحق عليا.. 
- هدى.. شكرا بزاف.. معرفتش لوماكنتي فحياتنا اش كان غيوقع.. 
- سير عند مرتك اوليد.. راها كتسناك.. هي اللي فحياتك اما انا مبقيتش.. انا غا طبيبة ودرت الواجب ديالي..