اخو البنات -الفصل الثاني - الحلقة 19

27
واخا قلتله اللي بغيت.. ولكن مازال مشفيت غليلي.. حاسة براسي كنزيد فالعذاب.. كنعدب راسي انا.. بقيت فالدار مخرجتش .. ماما بقات كترغبني نمشي معاها لدار با ولكن انا مبغيتش.. ودعتها ومشات.. جاني اتصال من ابتسام.. قالتلي اخر الاخبار.. باللي ناض الصداع بين الام وولدها والسبب هي ان مرتو والحاجة دابزو ... هو جا لقاهم هكاك وبدات كتشكيله مو وكتقوله مرتك دارت وفعلت.. قاليها الاولى كانت خايبة وحتى هادي خايبة.. قاليها قدام مرتو.. كنتي السبب من اني نتحرم من حب حياتي.. فارقتيني عليها.. شنو مازال بغيتي.. وخرج ومازال مابان.. وحالة الحاجة خايبة بزاف .. وكتقول لبناتها باللي ندمات على هدى حيت مكانش كيتسمع حس الصداع فالدار وكانت كلشي كتحلو بالعقل.. دابا عاد بانليها الفرق.. انا بقيت غير كنسمع ملقيت منقول.. هادشي باش غايفيد.. حيتاش انا ووليد صافي تفارقنا واللي عطا الله عطاه.. بقيت كنلعب مع ولدي.. حتى سمعت الدقان فالباب.. والليل هادا.. خفت ونضت بقيت كنسمع مور الباب.. 
- شكون.. 
- هدى فتحي عفاك.. انا وليد.. 
- وليد اش جابك فهاد الليل شنو بغيتي.. 
- بغيت نهضر معاك.. ضروري.. 
حليت الباب.. 
- شنو كاين هضر.. 
- واش نهضرو فالباب.. انا عارف باللي ماماك مشات.. 
- كتراقبني .. مزيان.. شنو بغيتي اوليد.. هضر دغيا.. 
- هدى شوفي فيا .. قوليلي باللي مبقيتيش كتبغيني.. قوليها وكنواعدك عمرك تشوفيني قدامك.. 
- هه هادشي اللي قدرك عليه الله.. انا كنت كنظن باللي جيتي تقنعني .. 
- انا مستعد ندير اي حاجة تطلبيها مني .. مستعد ندير اي حاجة باش نرجعو كيف كنا وتسامحيني... 
- سير بحالك ا وليد.. عفاك باراكة متزيد من عدابي.. سير... 
سديت الباب.. وبقيت كنبكي موراه سمعتو كيقول.. 
هدى.. انا مغنتنازلش عليك.. كنواعدك غاندير اللي فجهدي باش ترجعيلي.. كنواعدك.. تأليف دودي ..
الغد ليه.. نضت بغيت نمشي نتسخر ونجيب باش نفطر.. رضعت ولدي.. وخليته ناعس... وخرجت باش منتعطلش.. وتصدمت.. لقيت وليد ناعس فالباب.. اويلي قلبي .. يا عمري بقا هنا فالبرد الليل كامل.. فيقته وليد.. واش نعستي هنا.. 
- هدى.. حبيبة.. احلى حاجة وقعاتلي اليوما هي اني حليت عيوني على وجهك.. 
- نوض واش بغيتي تمرض؟؟
- خايفة عليا؟؟ 
- مخايفاش .. ولكن مللي غتوقع ليك نتا شي حاجة ولدي غيتأثر حيت نتا باه.. صافي .. هادشي علاش مبغيتش تمرض..
- المهم حبيبتي خايفة عليا.. 
- نوض نوض سير جبليا باش نفطر.. مبغيتش نخرج ونخلي ولدي بوحده فالدار.. 
- هي اللي متعاودش.. طلبي اللي بغيتي .. انا غنفذ.. 
مشا دغيا..وانا دخلت.. ماتعطلش بزاف.. جا دق عليا.. جاب المسمن والحرشة.. والكومير.. على اساس جا نفطرو مرا.. شديت من عندو داكشي وقلتله سير شكرا .. بالسلامة عليك.. وسديت الباب خليته مصدوم.. تعدب اوليد.. راك مازال مشفتي مني والو..