اخو البنات -الفصل الاول -الحلقة 20

الجزء29 
خديجة:اش غاندير دابا .. انا صافي مشيت فيها.. غنتفضح اهدى غنتفضح.. 
هدى: بردي.. غنلقاو حل .. انا غانمشي لعند وليد نهضر معاه.. نحاول نقنعو .. غا بردي 
وليد: باش غتقنعيني ادكتورة.. انا عطيت هضرة وحدة للسيد.. واش باغا تبقى حياتها كاملة فهاد الدار.. تمشي دير دارها 
هدى: وليد عفاك سمع مني كنترجاك 
وليد: كنترجاكي نتي .. دخلي سوق راسك .. هادي حياتنا .. نتي مالك .. خديجة وجدي راسك غدا غايجي لعدول نكتبو .. وراجلك قال باللي غايشريلك كلشي هو.. بغاك غا نتي.. ومابغا لا عرس لا والو .. 
سكتني بداك الهضرة.. الظلم هادا مبقينا عارفين مانديرو.. بقات كتبكي .. وانا كنواسيها .. الغد ليه نضنا .. دوشات ووجدات خديجة راسها .. واخا بزاز .. بالنسبة ليها كتوجد راسها للموت.. لبسولها البنات تكشيطة وصاوبت ليها شوية المايك اب .. جاو العدول والشارف.. كتبو العقد.. وخديجة حسيتها مبقاتش قدا توقف على رجليها بالخلعة.. انا حداها وماقادرا ندير والو.. جا الشارف شد ليها فيديها وبغا يديها معاه... وخواتاتها كيصليو على النبي .. مشات وانا تابعاها حتى الباب .. والف فكرة كدور فعقلي .. سمعت الحاجة كتقول لوليد .. عقباليك اولدي نفرح بيك.. رد عليها قاليها امين الحاجة قريب انشاء الله.. قريب.. انا عقلي كان غا مع خديجة.. واش اتكون دايرا دابا .. 
مشيت لبيتي سديت عليا .. بقيت كنتفرج من السرجم وكنفكر .. كندعي الله يسترها.. خديجة ضحية للاستغلال ديال كمال.. متستاهلش داكشي اللي وقع ليها .. كنشوف الباب كنقول دابا يجي الشارف يدير لينا الشوهة هنايا .. بقيت الليل كامل وانا فايقة كنستنى اي خبر اي جواب .. دوزت النهار كحل..

الجزء 30
صبح الصباح.. وانا النعاس مشفتوش.. ناضو البنات كيوجدو باش يمشيو يزورو ختهم.. هادو هما التقاليد.. لبست باش نمشي معاهم.. دخلو بالصلاة والسلام.. كنشوف حتى واحد محاملنا.. جلسنا فالصابون كنستناو خديجة.. شوية وهي تخرج.. مصدقتش داكشي اللي شفت.. جاية خديجة وطالقة شعرها ولابسة كسوة وكتلون ودايرا ماكياج .. واشنو وقع.. انا مفهمت والو.. جات جلسات مع ختها.. وكلشي كيسولها كيف لقيتي الزواج.. انا نظراتي مازال عليها ومافاهمة والو..جات جلست حدايا وخواتاتها ملاهيات مع داكشي اللي حطوليهم الناس .. بدينا كنهضرو بيناتنا.. وبصوت خافت باش ميسمعنا حتا واحد 
-خديجة.. شنو وقع 
- اش غنقوليك اصحيبتي .. 
- واش سمحليك ولا شنو.. 
- اشمن سمحلي.. السيد يالله كيقدر يضحك .. كيموت غا بالهران.. شارف مكيقدرش يوقف حتى على رجليه.. فهمتلو.. غا بلاتي عليه حتى نوريه كيفاش وشكون انا.. السيد دغيا سخف وعيا ودغيا نعس 
شداتني الضحكة بقيت كنضحك بزاف .. سبحان الله اللي كيسترنا .. سبحان الله..
مشيت للدار وانا كنفكر فخديجة.. مشكلتها تحلات تقريبا .. داك الشارف صدق مافيه جهد .. احسن فيه .. اش داه للبنت الصغيرة وهو رجل فالدنيا ورجل فالقبر .. 
رجعت للدار ووجدت راسي نمشي للخدمة .. بقيت فالبيت كنبدل حوايجي.. وانا نسمع الزغاريت.. علاياش كيزغرتو عاود.. هرجت نشوف وانا نلقى الحاجة هي اللي كتزغرت .. ووليد حداها .. 
الحاجة: باركو لولدي .. خطب بنت الحاج حمادي .. الزين والتباتة ومرت الدار والزمان.. وبنت الاصل والمفصل .. وبنت عائلة.. يويويوي 
انا تما قلبي حسيتو بحال الى خشيتي فيه شي موس .. كان غيوقف .. هو شاف فيا ورفع وجهو بحال الى كيتحاداني .. ديك النظرة ديال واش صحابليك غا نتي اللي كاينة فالدنيا.. 
بصوت مبحوح قلت مبروك .. الله يكمل .. خرجت ومشيت للخدمة .. محسيتش براسي حتى لقيت راسي كنبدل الطريق مشيت جيهت البحر.. بديت كنبكي.. كنبكي بواحد الحرقة دموعي شلال .. انا براسي معرفتش مالي .. وشنو وقعلي .. علاش كنبكي.. شنو كنت كنستنى منو يجي يخطبني انا.. اااااااه يا قلبي علاش هاكا .. علاش ديما كنختارو الشخص الخطأ فحياتنا.. علاش قلوبنا مكتبغي غير داك الشخص اللي كيعدبنا.. علاش بغيتو علاش .. انا مختلفة عليه.. انا وياه بحال السما والارض بعاد بزااف.. علاش بقيت كنبكي وقلبي حاسة غيوقف .. حاسة تقطع عليا النفس.. حسيت راسي دخلت فانهيار تام وماباغا حتى حاجة فالدنيا ...