اخو البنات .. الجزء الثاني
الحلقة 1
كان الصبح .. حليت عيني على لمسات وليد.. كيدوز على شعري.. وعلى خدودي.. ابتسمت ليه ..
- صباح الخير المشاغب ديالي..
- صباح الورد والفل.. يا نوارة عيني .. ويا ملاكي .. انا مازال مامصدق عيني.. واش تزوجنا.. واش وليتي ديالي..
- ههه اه .. وحتا نتا وليتي ديالي .. تشوف هاكا ولا هاكا نتقبليك عينيك .. سمعتي ..
- ههه يا خوفي منك.. مللي كتولي عنيفة.. متخافيش احياتي.. انا ماشايف فالدنيا الا نتي..
نضنا دوشنا وبدلنا حوايجنا.. وطلبت منه نخرجو نفطرو فوسط العائلة.. مكانش باغي فاللول وكان باغي نفطرو بوحدنا ولكن انا اصريت نفطرو مع العائلة.. تجمعنا لسفرة الفطور.. الضحك والهضرة كلشي فرحان.. هادشي اللي كنت كنقلب عليه.. حاجة زوينة بزاف تكون عندك عائلة بحال هاكا.. وكلشي كيبغيوك.. كان كلشي حضر الا سليمة.. مازال كتعاني.. غوات وخوف.. هادشي باش كتدوز نهارها.. تبدلات بزاف.. الله ياخد الحق فاللي كان السبب.. مكرهتش نجمعهم ونشعل فيهم العافية.. ناخد الحق ليها ولكل من وقع ليه هادشي.. صعيب بزاف.. حتى الطبيب قالينا راه مدة العلاج غتطول.. وقالينا حاجة مهمة.. هي انه لوكان مجبناش سليمة تتعالج دابا كانت اكيد غادي تدير شي حاجة فراسها لان حالتها كانت كتسوء.. وكان غاينعكس سلبا داكشي عليها.. فكانشاهدو العديد من المجرمين ومن القتلة.. اللي مكيعرفوش علاش كيرتاكبو الجرائم.. هي فقط عقد باطنية كتلعب فيهم.. وكتأثر عليهم.. ولولا الالطاف الالاهية .. لكان لسليمة نفس المصير.. الحمد لله ان وليد قالي شنو كاين فالوقت المناسب...
مريم جات هي وراجلها .. راجلها ضريف بزاف.. وكيبغيها ونية كيدير شنو ما طلبت منو.. كتطيبلو كل ما تشهى فنانة بمعنى الكلمة..
- يويويوي.. مبروك على العرسان ديالنا.. جيتو كتحمقو..
- الله يبارك فيك اختي مريم.. كيدارة نتي مع عائيلتك..
- مزيانة الحمد لله.. ولكن كاين واحد المشكل.. انا جاني القنط اختي هدى.. مكرهتش نولد دغيا.. واش مكاينش شي طريقة..
- الله يا ربي مالك على هاد الزربة .. راكي عاد تزوجتي جديدة..
- ايوا جاني الملل.. اش غاندير..
- شغلي راسك بشي حاجة..- بحالاش..
- مريم خاص يكون عندك هدف فالدنيا.. راه الزواج ماشي غاية الحياة.. خاص يكون عندك هدف تخدمي عليه وتعيشي حياتك على قبله..
- معرفتش اش غاندير..
- هانتي.. طلبي من راجلك تديرو مشروع دشي مطعم نتي تبارك الله عليك كاتصاوبو كلشي الاطباق العالمية تعلمتيهم بدون معلم .. الورث اللي خلالك باباك غايقدك.. يدخل معاك راجلك شريك هو يوقف معاك.. وغتطورو مشروعكم بجوج..
-فكرة زوينة بزاف.. ربي يخليك ليا اهدى انا غنبدا فيه ..
- حتى نتي الزينة ديالي.. تأليف دودي
الجزء 2
بقينا كنهضرو حتا جات لبنى وراجلها.. لبنى ولات زوينة بزاف معرفتش واش الزواج كيزين ولا الثقة بالنفس هي اللي كتزين.. وراجلها كيتهلا فيها بزاف وكيبغيها.. هو ولد الناس على كل حال..
لبنى: تبارك الله على العروسة ديالنا
هدى: الله يبارك فيك البنى.. لاباس عليك..
خديجة: تجمعتو كلشي الا انا..
وليد: فين خليتي الحاج اخديجة
خديجة: مازال كايطلع فالدروج .. صحتو على قدو متسنيتوش جيت انا
كلشي ضحك.. تجمعو عليا البنات وبداو يسولوني كيدازت الدخلة.. قلتليهم هادو اسرار بعدو مني ههه تعصبو مني .. وغمزت ليه وبقيت كنضحك..
دوزنا نهار زوين العائلة كبرات تبارك الله .. فرح شادة فقرايتها مزيان ولات كتعرف تضبر على راسها وتسجلات فمراكز جداد.. حتى حاجة ماصعيبة بلا ارادة..
ابتسام تسجلات فمعهد للفنون الجميلة.. والقرايا حتى هي منساتهاش..
ابتسام: ختي هدى عجباتني داك الفكرة اللي عطيتي لمريم .. الفكرة دالمشروع.. كنفكر حتى انا ندير مشروع ديال التصاميم..
هدى: انا نعطيك نصيحة قبل ماتدخلي فالمشروع ديري واحد الدبلوم ديال التصميم.. وبيه فتحي المشروع ديالك ومن تما تبقاي تشاركي فدورات عالمية بازياءك..
ابتسام: متافقين..
فاطمة الزهراء حتى هي ولات مزيانة وكتشاركنا الحديث..تحسنات بزاف بعدما ولات كتدير جلسات العلاج النفسي مع الدكتور كرم.. كانت جالسة معانا وفجأة افتقدتها.. اكيد راها فبيتها مشيت نشوف مالها.. هي مخاصش تكون انطوائية وديك الوحدانية اللي عاشت فيها حياتها كاملة خاص تتحيد.. مشيت لبيتها لقيت الباب محلول.. لقيت فاطمة الزهراء كتهضر فالتلفون ..
- حتى انا توحشتك بزاف.. واخا .. انا راني مع العائلة دابا .. حتى البلاتي ونهضرو.. كنبغيك.. بالسلامة..
تقلبات لقاتني موراها ومصدومة..
- فاتي .. ممصدقاش راسي نتي كتبغي .. ههه
- هدى عفاك متقوليها لحتى واحد.. عفاك
- ههه مغنقولها لحتى واحد.. بشرط.. تعاوديلي كلشي..
- مكاين والو اهدى عفاك نساي الموضوع..
- واخا الالة .. راهم مجموعين تما كلشي انا نايضة نقولهالهم.. اصلا هادا سبق صحفي مبحالوش ههه
-جلسي صافي اووف انا غنعاودليك..
- هانا كنسمع .. شكون هادا وفوقاش تعرفتي عليه..
- دكتور كرم..
- شنو... هههه المسخوطة بقيتي ساكتة نهار نضتي طيحتي طبيب كاع.. كدرتيلها وهو بنات المستشفى كلهم بغاو منو غا نظرة مكيديها حتى فوحدة..
- القصة طويلة.. يمكن لقا فيا المواصفات اللي كان كيقلب عليهم.. واعترفلي برغبته من الزواج بيا .. حتى انا ارتاحيت معاه بزاف.. ولكن قلتله مازال.. حتى نتأكد من مشاعري..
- انا فرحانة ليك بزاف افاطمة الزهراء.. ربي يفرحك ويعطيك ما تمنيتي احبيبة..
- الفضل كيرجع ليك.. شكرا بزاف اهدى
وليد: نتي اللي خبيتيلي مرتي وانا كنقلب عليها..
نضنا وبدينا نهضرو ونشطو .. داز اول نهار ليا مع العائلة زوين...تأليف دودي
0 Commentaires