الجزء 26
الغد ليه نضت وهزيت ولدي.. ومشيت لواحد الكافي .. واتاصلت بوليد قلتله فين راني متعطلش بزاف لقيته جا..
- السلام.. نتمنى تكوني دوزتي سهرة زوينة البارح..
- وفاش كنهمك.. ماجيتش نتناقش على البارح.. انا جيت باش تشوف ولدك كما واعدتك.. وباش نسجلوه..
مشا عند ولدي هزو بين يديه.. اول مرة كنشوف وليد متأثر بديك الطريقة.. كيعنق فالولد وبدون شعور نزلتله دمعة من عينيه.. ولدي.. حياتي سمحلي اولدي .. والله ملخاطري.. انا غنعوضك كلشي .. كل لحظة كنت بعيد عليك فيها غنعوضها ليك..
دوز ساعة معاه وانا كنشوف فيه.. مسخاش منو..
- وليد.. خاصنا نمشيو راه غنتعطلو.. الادارات مغيتسناوش فينا ..
- واخا خلينا نمشيو..
- ارالي عمران نهزو..
- لا خليني انا نهزو .. مسخيتش بيه..
نضنا مشينا قادينا كلشي وسجلنا الدري.. ووليد طول الوقت هاز عمران بين يديه ومسخاش منو.. مللي سالينا وصلني للدار..
- بالسلامة..
- هدى ستناي .. شكرا بزاف حيت خليتيني نشوف ولدي وندوز معاه النهار..
- الولد معندوش علاقة بداكشي اللي طرا بنا.. نتا باه ومن حقك تشوفو وقتما بغيتي..
- هدى.. بغيت نقولك واحد الحاجة..
- كنسمعك..
- انا.. انا ندمان بزاف حيت تفارقت معاك.. واخا كتشوفيني عايش ولكن للداخل ديالي ميت.. من نهار وقعت على وثيقة الطلاق وانا موقع على فرمان موتي... هدى.. انا..
- نتا كداب اوليد.. نتا كان هدفك توصلي حيت ولفتي كتلقى الحاجة اللي بغيتيها .. ومتسرطاتش ليك اني نكون متحررة.. وشدك حب الامتلاك.. ومثلتي قدامي حتى جعلتيني نتيق فيك ونبغيك.. والنهار اللي طحت فأزمة.. وشفتي باللي مصلاحتك مبقاتش فزواجك بيا .. طلقتيني بسهولة.. ماتجيش اليوما تمثل عليا الحب والندم.. انا وليت حافظاك..
- هدى لا نتي غالطة .. ماشي هاكا ..
- هاكا ونص.. اش رجعك ليا دابا فهاد الوقت.. فين كنتي هادي ثمانية شهور.. عمرك مفكرتي تجي تشوفني او تمشي معايا للطبيب تطمئن على ولدك.. عمرك فكرتي فيا واني نكون معدبة بفراقك.. طبعا لا حيت نتا عايش هاني تزوجتي وعرستي .. مرتاح مع راسك..
- لا مكنتش مرتاح ومعمري نكون مرتاح حيت تفارقت معاك.. طول الوقت كنت كنفكر فيك.. وكنجي حتى للدار.. كنبقى متردد اني نطلع عندك.. زيرت على قلبي.. وفضلت نبقا بعيد عليك باش منعدبكش.. كنت ديما معاك.. ديما وراك.. فينما مشيتي انا وراك.. ولكن عمري تشجعت نجي حيت كنت خايف.. خايف منك اهدى.. خايف متسامحينيش..انا تفارقت معاك حيت كنت معدب بزاف بعد داكشي اللي جرالك.. وكنت كنحمل نفسي المسؤولية.. وعائلتي حتى هما ساهمو فهادشي.. بالوساوس.. وداك الزفت ديال الطبيب حتى هو.. بقا كيقولي باللي قرب منك.. مرضت.. وتعدبت.. حتى انا دزت من مرحلة صعيبة .. حتى انا خاصك تفهميني.. حيت اللي داز عليا ماشي ساهل..
- لا نتا ماداز عليك والو.. نتا مجرد رجل اناني..فضلتي نرجيسيتك فالمجتمع على حبك وعلى مراتك ام ابنك.. نتا تخليتي عليا فاكثر وقت كنت محتاجاك فيها.. متجيش تلومني.. ومتطلبش مني نفهمك.. لاني عمري فحياتي مغنقدر نسامحك..dodi elaissati
نزلت من الطوموبيل وخليتو مصدوم من الهضرة ديالي تمشيت وصلت للدار تقلبت عندو لقيتو منزل راسو على الفولون وشادو بيديه.. تعدب اوليد كما تعدبت انا.. يمكن تحس ولو شوية من داكشي اللي داز عليا.
0 Commentaires