الجزء 27
ضرني قلبي على سليمة .. معرفتش مالها .. مشيت لبيتي .. جيت نفتح الباب حتى تخلعت
- اش كادير فبيتي ..
- شششت .. كنستناك تعطلتي .. فين كنتي
- كنت مع سليمة فبيتها
سد الباب وقالي جلسي نهضرو .. جلست حداه على الناموسية .. وبدا يهضر
- هدى.. انا كنحس باللي تعلقت بيك بزاف.. عمر وقعلي هادشي وعمري حسيت مع شي وحدة هادشي .. مع انه كايدوزو عليا انواع واشكال ديال البنات فالنهار .. ولكن نتي ماشي بحالهم ..انا.. انا كنبغيك اهدى..
- وليد .. واش بالصح كتبغيني .. وانا ماشي نزوة فحياتك ..
- اش هاد الهضرة .. نتي مهمة بالنسبة ليا
قرب مني وشد ليا فيدي هزها وباسها بلطف .. انا تما فشلت بقيت كنشوف ليه فعينيه سرحت فيهم .. قرب مني وباسني بهدوء.. انا تعمقت ودخلت فعالم اخور .. شوية تكينا بجوج على الناموسية فوضعية القبل حتى حسيت بيه كيدوز يديه على صدري.. تما مقدرتش نصبر نضت وبعدتو عليا ...
- لا لا بعد مني سير لبيتك .. خرج .. كلكم كتهمكم غير الشهوة.. انا ماشي ديال الشهوة فهمتي .. مبغيتكش فحياتي بعد مني .. خرج
- هدى..
- قلتلك خرج .. خرج من حياتي .. مبغيتكش فحياتي ..
مفهم والو ناض وخرج مشا لبيتو .. انا سديت الباب .. مشيت جلست على الناموسية وجمعت رجليا وبقيت كنبكي .. حسيت بالحرقة فقلبي للداخل.. هو بحالهم .. هو بحال كمال وغيستغلني وغيمشي بحالو.. كلكم ذياب .. كلكم بحال بحال.. كتبانو ملائكة مللي كتبغيو حاجتكم.. ومللي كتقضيوها كتوليو ذياب ..
داك الليل منعستوش ومدقتش طعم النعاس.. الغد ليه مخدمتش.. بقيت فالناموسية حتى جات عندي فرح ..
- مالكي احبيبة
- والو غا مريضة شوية
- نوضي متبقايش فالناموسية .. راه الاستاذة غتجي دابا ..
درت ليها خاطرها ونضت .. حضرت معاهم الحصة اليوما وبقيت كنعاون الاستاذة كتفهم البنات.. شوية وقع ما لم يكن بالحسبان .. شفنا لقينا باب الدار تفتح .. دخل وليد .. شاف فينا وناري اش غايدير ..
شاف فالاستاذة قاليها خرجي عليا برا من داري .. مقدرتش نهضر .. مابقا ليا خاطر عندو .. لوكان غا استغليتو.. انا دغيا خسرتها .. جمعات الاستاذة حوايجها وخرجات .. شاف فينا وقال .. من اليوم ممنوع كلشي .. وغترجعو كما كنتو.. ومغايدخل فينا حتى واحد كما كان.. كل واحد يديها فراسو.. والضياف شحال ما بقاو غيمشيو حيت ضياف مغيتحكموش لينا فحياتنا.. وشاف فيا .. كان فواحد الغضب كيقطر ليه من عينيه .. عمري شفتو هاكا حتى النهار اللي جيت اول مرة كان كيحافظ على هدوءو على الاقل معايا ولكن دابا انفجر نيشان.. خوفني الصراحة ومقدرتش نهضر.. مشا لبيتو .. بقا تما ومخرجش .. البنات كل وحدة فين مشات انا بقيت جالسة كنخمم كيفاش هادشي وشنو غيوقع من بعد .. شوية خرج من بيتو واتاجه لبيت ابتسام.. انا خفت دخل بدون استأذان هز ليها الكمان وهي كتبكي..
- لاش مدخلة هاد الزبل للدار.. واش اللي يقولك شي مصيبة ديريها.. (كيقصدني انا)
بدات كتبكي وحنا كلنا كنشوفو فيه وانا شدني واحد الطم فمي تقول تخيط مقدرتش نهضر .. هرسو قدامنا كلنا .. ميكما عليكم شوية باغين تركبو على ظهرنا.. عطيناكم قيمة ..
خرج الفقصة ديالو وخرج .. بحال الا كان عارف باللي كلشي هادشي درناه فغيابه .. بحال الا كلن غا ميك علينا.. بحال الا كان كيراقبنا.. هاد بنادم غيسطيني شنو بغا ..
0 Commentaires