الجزء 18
اشنو غاندير كيفاش غانتفك منو.. هادي اول جملة قلتها مللي حليت عيني فالصباح وشفتو حدايا.. حتى فالاحلام ولا كايجيني على شكل كوابيس.. واش ماعياش .. انا عييت فبلاصته.. واش هاد الحقد كله مخبيه فقلبه.. فين هاداك اللي كان كيقول كنبغيك.. ومقادرش نعيش بلا بيك.. هادا ماشي حب.. هادا كابوس.. عندي حلول محدودة.. اما نطلب الطلاق ونخسر عائلتي.. او نبقى عايشة فالجحيم طول حياتي .. وعندي حل ثالث.. اني ننتاحر.. وننهي عذاب الكل.. في كل هذه الحالات انا ميتة.. منقدرش نتسبب فاي الم لعائلتي.. ولكن شنو ذنبي.. ان الراجل اللي تزوجته صدق حثالة..
- صباح الزفت..
هاد الجملة خرجت من فم مصطفى.. اللي تلفت عندو لقيتو عاد فاق..
- نوضي وجديلي ماناكل.. دغيا ..
نضت وانا فمي بحال الى مديور ليه السكوتش.. مكنهضرش .. جيت نخرج من البيت وانا نحس بالغثيان.. مشيت كنجري للطوليط باش نرد داكشي اللي فكرشي.. بقيت كنرد.. حتى كانو غايخرجو مصارني.. غسلت فمي وخرجت وانا مقادراش نوقف على رجلي.. جا عندي وشاف فيا بنظرة حادة وحجبانه معقدهم..
- واش راكي حاملة..
معرفتش منقوليه.. جا عندي وشدني من دراعي :جاوبيني واش راكي حاملة من داك الحمار..
- طلق مني راك قصحتيني.. انا مابيني وبينو والو..
- دابا نشوف.. كنقسم ليك بالله.. الى صدق داكشي اللي فكرشك منه.. كنقسم ليه باللي غانقتلك ونقتله.. واش فهمتي..
لاحني فالارض.. مشا بدل حوايجو ورجع عندي قالي زيدي قدامي نمشيو للطبيب..
نضت لبست جلابتي.. وانا مقهورة.. ماشي حيت شك فيا ولا حيت خايفة.. انا متأكدة من نفسي.. انا مقهورة بسبب الحمل.. الحمل يعني السجن المؤبد..
مشيت معاه داني للطبيب.. بقيت معاه كنستناو نوبتنا وطول الوقت كنت ساكتة وماقدا نهضر بحضوره.. وليت كنخاف منه.. اه.. حيت هادا مبقا كيخاف من حتى واحد.. وصلت نوبتنا .. عيطات علينا البنت باش ندخلو:
الطبيب: مرحبا بالسي مصطفى.. مرحبا امدام.. خير انشاء الله..
مصطفى: منى فاقت اليوما وهي كتتقيا.. هادو علامات الحمل.. وعفاك ادكتور واش ممكن نعرف واش انا هو اب الولد اللي فكرشها ..
الطبيب: واخا تفضلي معايا امدام نفحصك..
نضت مع الطبيب وفحصني.. ورجع لبلاصته وقال: خاصنا نديرو شي تحاليل .. ضروري خاصنا نديروها .. ونهضرو مللي يخرجو التحاليل..
مصطفى: فوقاش غايخرجو هاد التحاليل..
الطبيب : غنكتبليكم ورقة استعجالية بعد ساعة على الاكتر غايخرجو هاد التحاليل..
مشينا نديرو التحاليل .. بقينا نستناو فيهم.. مللي خرجو..
الطبيب: الحمد لله .. التحاليل صدقو مزيانين .. ومافيك والو..
مصطفى: شنو كتقصد ادكتور واش حاملة ولا ماحاملاش..
الطبيب: اشمن حمل كتهضر عليه.. الرحم ديال مراتك متضرر بزاف بسبب اخر اجهاض دارتو.. بسبابك نتا .. احتمال ضعيف تولد مرتك.. ماشي هادشي هو المهم دابا.. المهم هي صحتها.. التحاليل درتهم حيت شكيت باللي اتصابت بواحد الفيروس خطير.. ولكن الحمد لله .. مافيها والو..
مصطفى: يعني.. مبقاتش غاتولد مرة اخرى؟
الطبيب: صحتها دابا هي المهمة.. نسا عليك الحمل دابا.. قوليلي امدام .. واش مكاتكليش؟ حيت التحاليل بينولي باللي عندك نقص شديد فالفيتامينات والمعادن.. خاص تاكلي..
انا ساكتة مكنهضرش..
بقا الطبيب كيخطب وانا مكنهضرش.. مغانكدبش الى قلت ان هضرته ماشكلات بالنسبة ليا اي اهمية .. حيت مبغيتش نولد مع هاد الراجل ابدا.. ومبغيت اي حاجة تربطني بيه.. اه وليت كنكرهو كره العمى.. وبالنسبة ليا هاد القدر هو اجمل حاجة وقعات فحياتي.. الله استجاب لدعائي..
0 Commentaires