الجزء 17
بقيت فالدار وانا كنفكر فداك الراجل وكيفاش هضر معايا ونقص من قيمتي .. النهار كله وانا ساهية .. مروان فهم باللي غضبت من ديك الهضرة وبقا كيحاول يخرجني من المود ويعتذر مني .. هو ماشي ذنبو .. فالليل وقع مالم يكن بالحسبان.. مصطفى جا للدار ولقاني كنتعشى مع مروان ولابسة البيجامة... وحتا مروان كان لابس حوايج سبورت .. جعر بمعنى الكلمة..
- شنو كاديري امدام مع هادا بوحدكم فدارو...
- ماشي سوقك ..
- شناهيا ماشي سوقي نتي مرتي.. ومغنسمحلكش نطعنيني فرجولتي ..
جا عندي بواحد السرعة وشدني من شعري وهو فقمة الغضب جا عندو مروان بدا يدابز معاه وهو يعطيه بواحد البونية ..
- الحمار اش هادشي درتي راه السيد مريض ..
- خايفة عليه اقليلة العراض .. انا غانوريك ..
بقا جارني وخرجني من داك الدار وانا بديك الحالة .. خرجت وانا نلقا خويا كيستناه بالطوموبيل .. هادشي اللي كنت خايفك منو طحت فيه .. كلشي عرف اني كنت مع راجل غريب فدارو .. مشافش فيا مع اني كنت كنستنجد بيه بعينيا يعتقني من مصطفى اللي كان كيعاملني بحال شي ساقطة .. دخلني فالطوموبيل وهو كيسب .. اما خويا مهضرش كأنه متافق مع داكشي اللي كيقول مصطفى واللي كايديرو.. وصلوني لدار بابا.. ودخلوني بحال شي حولي غاديين يذبحوه .. محاكمة جماعية .. والرابح فيها هو مصطفى اللي غايخرج منها بطل .. خطأ كبير ارتكبته مللي مشيت مع مروان .. حتى واحد ماخلاني نهضر ولا ندافع على راسي .. مذنبة فنظرهم وحشمت بعائلتي وبشرفها .. مكرهتش لوكانت الارض تشقات فداك اللحظة وبلعاتني.. على انني نعيش داك المرقف وداك الظلم.. وكملت مللي بداو كيستعطفو مصطفى انه يعفو عليا ويقبل بيا.. هادو مكرهوش يجلدوني مية جلدة بالمرة باش يكملو عليا الحكم .. انا اللي عطيت لمصطفى الموس باش يذبحني به .. انا اللي درتها لراسي هو اللي صدق بريىء وانا المذنبة.. حتى واحد مسمع مني.. جرني مصطفى قدامهم بحال شي بهيمة .. وداني للسجن ديالو من جديد .. رجعت لنقطة البداية .. ولكن هاد المرة.. الحرب بيني وبينه ولات مكشوفة.. وباينة..
- دخلي الكلبة .. نتي متستاهليش الرحمة .. انا غانوريك.. خيانتك غادفعي ثمنها غالي بزاف ..
اختاريت الصمت هاد المرة.. عائيلتي اللي ولداتني مسمعوش مني.. كيفاش بغيتو هو يسمع ويقتانع اني مخنتوش.. تأليف دودي العيساتي..
دازو ايام سوداء بمعنى الكلمة.. كيعاملني فيها مصطفى بحال شي كلبة جابها من الزنقة.. عطاوه عائلتي الرخصة ومسولوش فيا.. مابقا خايف من اي واحد يحاسبو على داكشي اللي كايدير فيا .. وانا ساكتة .. حتى الخدمة ديالو سمح فيها وبقا مقابلني انا.. اش غايدير بالخدمة مادام عندو فلوس قلب ولدي.. اللي غايقدرو يعيشوه مزيان.. ويقدر يدير بيهم مشاريع.. مقابل غا السبان والضرب.. عايشة الجحيم معاه .. واحد النهار سمعنا الدقان..
- شكون..
- حل الباب البوليس ..
حل مصطفى الباب ولقا البوليس ومعاهم مروان..
الضابط: عندنا بلاغ باللي راك حابس مرتك وكتمارس عليها العنف..
مصطفى: الله يهديك الشاف واش كاين شي حد كيحبس مرتو.. هاديك راه مرتي.. وزايدون اشمن عنف كتهضر عليه وشكون هادا اللي مبلغ بينا.. واش هادا .. هادا انا اللي نبلغ بيه حيت كيدصر على مرتي..
الظابط: عيط لينا عليها نهضرو معاها..
مصطفى: واخا .. هي تقوليك بنفسها .. السعادة اللي رانا عايشين فيها ..
جا دخل عندي للبيت.. وقال: سمعيني مزيان غاتخرجي دابا وتقوليلهم راني عايشة السعادة مع راجلي.. وطلقي من داك التغوبيشة اللي فوجهك.. ضحكي والا غاندمك وغنفضحك ديم الساعة عائلتك عمرهم ماغايعاودو يشوفو فيك..
خرجت ومقدرتش نشوف فمروان..
الظابط: قوليلي ابنتي .. واش راجلك كايمارس عليك اي نوع من العنف.. واش حابسك..
- لا .. انا عايشة بخير معاه وهو مكيعنفنش ومحابسنيش..
مروان: منى 😰 هضري قولي الحقيقة.. غانعاونك انا ..
الظابط : السي مروان واش مراكش شايف باللي السيدة مابها والو .. الى بقينا هنا كتر من هنا غانكونو كنختارقو القانون.. هادو مزوجين .. وهي اللي خاصها تدعي وتهضر.. سمح لينا السي مصطفى على الازعاج..
مروان : منى ..
مصطفى: خرج برا ولا ندمك.. وغانهضر مع داك باك اللي مقادرش يجمعك مني..
كلشي مشا مصطفى سد الباب موراهم .. وتلفت عندي.. غفلني بواحد الطرشة .. حتى سالي الدم من نيفي..
- اشنو درتلك عاود تاني..
- تابعك حتى لهنا مقادرش يعيش بلا بيك.. انا غانشوه ليك داك الوجه حتى يوللي مقادرش يشوف فيك .. لا هو ولا غيرو..
مصطفى ولا حاقد.. وجرب فيا كل انواع التعذيب .. خرج غدايدو فيا .. كل مرة اشنو كيجرب فيا ..
0 Commentaires