رجل بقلب طفل - الحلقة 16

الجزء 16
الغد ليه صيدت انا ومروان .. وليت كنعشق الصيد معاه .. جات المحامية فالعشية هضرت معاها .. وواعداتني انها غادي ترفعلي قضية ديال الطلاق.. طمئناتني انها غادي تربح القضية.. بقيت فالدار مع مروان كل نهار صيد .. وليت محترفة .. لقيت الضالة ديالي فالصيد.. 
- منى شنو رأيك ندوزو لمرحلة اخرى من الصيد.. 
- على الصيد فيه مراحل.. 
- طبعا.. كاين الصيد الساحلي واللي كنديروه دابا .. وكاين الصيد فوسط البحر .. وكاين الصيد في اعالي البحار .. وكاين الصيد في اعماق البحار..
- او اعماق البحار؟؟ كيفاش كيديرو ليها.. 
- كيلبسو كومبينيزون... وكيغوصو فالبحر.. الحوت اللي بانلك كتنيشي عليه بالسهم وكتصيديه لراسك 
- ونتا كدير هاد الغوص .. يعني كتعرفلو.. 
- كنت كنديرو قبل مانمرض.. ووقفت بعد المرض .. ولكن دابا بسبابك نقدر نديرو مرة اخرى.. شنو رأيك نعلمك .. 
- موافقة.. عمري توقعت ندير هادشي كله .. 
- ههه معايا غاتتعلمي كلشي انشاء الله.. 
ركبنا فقارب صغير وجابلي العدة ديال الغوص .. الغوص صغيب بزاف خاصه السوفل..دوزت بزاف باش نتعلم .. ولكن الصيد تحت الماء مازال مزعمت عليه .. عاد يالله قادرة نشد توازني وتنفسي تحت الماء.. ماشي بحال مروان تبارك الله عليه.. واحد النهار .. بقينا كنتعلمو فالغوص وكيوريلي كيفاش .. حتى ضلام الحال .. رجعنا فالمركب .. وحنا لابسين الكومبينيزون ..حتى كنتفاجئو بواحد الراجل كيستنانا فالدار..
مروان: بابا .. 
الراجل: شفتك غبرتي علينا ..ساعة نتا ناشط هنا شكون هادي.. 
مروان: هادي .. هادي .. مدام منى .. اللي عطاتني قلب ولدها .. 
الراجل: واش كدير معاك هنا .. راجلها قالب الدنيا عليها وهي ناشطة معاك هنا.. كل مرة يجي يصدعني عليها 
محملتش راسي يهضر عليا بديك الطريقة .. خصوصا اني كنبانليه ناشطة وانا لابسة الكومبينيزون وداخلة كنضحك مع مروان.. 
مروان: لا ابابا.. عفاك متهضرش بهاد الطريقة عليها..
الراجل: مكيهمنيش شكون معاه.. الواليدة ديالك راها مشتاقة ليك وبغات تشوفك .. عطيها شوية من وقتك راها مقهورة عليك.. ومتبقاش تابع غا الخوا الخاوي.. 
مشا بعدما شاف فيا بنظرة حقد.. لوماحتارمت مروان كنت غانوريه .. هادا هو اللي شرا قلب ولدي .. هو السبب وراس الحرباء.. بقا مروان كيحاول يبرد الجو ويعتذر.. 
- انا غانمشي ننعس.. وغدا غانمشي بحالي من هنا.. 
- لا كنترجاك ماتمشيش.. عفاك امنى .. كنترجاك.. 
- مروان.. باك عندو الحق.. انا باي حق غادي نجلس هنا... مكانجيك والو.. 
- انا .. غير.. ولفتك وولات حياتي مضوية بيك.. الى مشيتي غاتنقص حاجة مني.. خليك قريبة مني عفاك.. 
- مروان .. 😪واخا .. على قبلك نتا .. غانبقا .. 
- الله يحفظك ..شكرا بزاف..